BETYIʼI MEJÔ 15 - Bible en langue Bulu

Samson a Wosane Befilisteñ

¹ Eyoñ é lôteya, melu ba kôane fôn, nde Samson a nga ke yene minga wé a bili étoñ ékela. A nga jô na: Ma ye nyiin étune nda minga wom. Ve ésaa minga wé a nji ve nye nkañesane ya nyiin.

² Esaa minga a nga jô Samson na: Me nga yene na wo vini nye nde me nga ve nye nyo mvôé. Ye monyañe mongô wé a nji dañe nye? Nyoñe nye éjiane jé.

³ Nde Samson a nga jô be na: Eyoñe ji ma buni na me nji bo mekua e be Befilisteñ nge ma bo be abé .

⁴ Ane a nga ke a bi minkemvak mintete mila; a nga nyoñ kômbé, a tiñeti minkemvak mibaé mibaé e menjem a tyelé kômbé ébañe njem ébaé ése.

⁵ Ane a nga boʼé kômbé a suu minkemvak e mefube me fône Befilisteñ, nde mebam a bikumba bi fôn bi nga mane dik, a éwoñ é nga dik a kui mefube bʼôlivié.

⁶ Ane Befilisteñ be nga jô na: Za a te bo jame di? Eyalan é nga so na: Samson, nnôme ngone môte ya Timna amu a nga nyoñe minga wé a ve nye mvôé nnôme ngone wé. Nde Befilisteñ be nga bet a mane diʼi minga ate a ésaa wé. Samson a nga jô be na: Ye nalé mia viane bo?

⁷ Ma ye jôʼé vʼakekui me kuneya mamiene be mia.

⁸ Ajô te a nga wosane be a wôé be mbia ñwôan. Mvuse valé a nga kôlô a ke tabe e mbas akoʼo yʼEtam.

⁹ Ane Befilisteñ be nga bet a vule minkane ya wosane Yuda a mialan a kui Léki.

¹⁰ Nde bôte ya Yuda be nga jô na: Amu jé mi beteya a zu wosane bia? ane be nga yalane na: Bia te zu kaʼa Samson, bi bo nye avale fe a boya bia.

¹¹ Ajô te bôte toyini éla ya Yuda be nga ke e mbas akoʼo yʼEtam a jô Samson na: Ye ô nji yeme na Befilisteñ be titi bia yôp? Jé ô nga bo bia ji? A nga yalane be na: Me nga bo be avale be nga bo ma.

¹² Be nga jô nye na: Bia te zu kaʼa wo na bi ve wo e mo Befilisteñ. Samson a nga jô be na: Kanane ma ngana na mia ye bo te wôé ma.

¹³ Be nga yalane nye na: Momo; bia kômbô foʼo ve na bi kaʼa wo a ve wo e mo map, ve bia ye bo te bo na ô wu. Nde be nga kaʼa nye a mimfefé minkol a soo nye mbas akok.

¹⁴ Eyoñ a nga kui Léni, ane Befilisteñ be nga bete metyiñ be nga ke tôbane nye. Nde Nsisime Zambe ô nga bi nye. Ane minkole mi mbe nye mo mi nga bo vʼane éfumulu nkol ja diʼi e nduane, a mengataʼa mé me nga mane kulane nye mo.

¹⁵ A nga yene mfefé ntyetyeʼ éjakas, ane a nga same wo a nyoñe wô; nde a ntyetyeʼéjakas, a nga wôé Befilisteñ toyini.

¹⁶ Ane Samson a nga jô na: A ntyetyeʼéjakase wua, me wôéya bôte toyini. A ntyetyeʼéjakase wua, me boya avise mimbim.

¹⁷ Eyoñe jame te e maneya, a nga wua ntyetyeʼ éjakas ôyap. Ajô te be nga yôlé vôm ate na Ramat-Léhi.

¹⁸ Eyoñ évé é biya Samson, a nga loone Nti a jô na: Wo ô nga kalan e beta ñyiane nyô e wo mbo ésaé wôé; éyoñe ji ye me ne nguleya wu évé a ku e mo me bôt be nji bo ntyiʼane metye?

¹⁹ Nde Nti a nga sal akôm e ne Lehi zañ, mendim ve vam été. Ane Samson a nga nyu a beta nyoñe ngu. Ataté éyoñ éte be nga loon anjeñe te na: Eyin-Akoré anjeñe te e ngenan e Lehi a kui môse wu.

²⁰ Samson a mbe ntyiʼi mejô Israél melu Befilisteñ be nga too, tañe mimbu mewôm mebaé.