BETYIʼI MEJÔ 11 - Bible en langue Bulu

¹ Yefté, môte ya Galad, a mbe éwôlô môta mewosan, a too fe mone ya be minga ébamba, a Galad nye a nga biaé nye.

² E minga Galad a nga biaé fe nye bobefam. Eyoñ be nga bo benya bôtô, nde be nga titane Yefté be jôʼô nye na: Woo ye ke nyoñ ngab élik e nda ésaa wongan, amu ô ne mone ya be minga mfe.

³ Ane Yefté a nga tube bobenyañ a ke be ôyab a ke tabe éfuse si ya Tôb. Nde bôt be ne teke ésaé ya bo be nga sulan e fefele Yefté; ba be nye ve bo awoso, be nga boʼo be kuik a ke mulu mewosan.

⁴ Eyoñ é lôteya, ane Beamônite be nga wosane Israél.

⁵ A amu Beamônite be nga wosane Israél, nde bemvendé ya Galad be nga ke nyoñe Yefté e si ya Tôb.

⁶ Be nga jô Yefté na: Zaʼak a wo ye bo évete mewosane jangan, a bia ye wosane Beamônite.

⁷ Nde Yefté a nga yalane bemvendé ya Galad na: Ye mi nji vini ma a titane ma e nda bʼésaa wom? Amu jé mia zu be ma éyoñ jina, yʼamu mi ntele njuk ôlun été?

⁸ Ane bemvendé ya Galad be nga jô Yefté na: Bia zu foʼo be wo éyoñ ji amu nalé, bia be wo bi ke, ô wosane Beamônite a bo évete jangan, ji bôte bese ya Galad.

⁹ Nde Yefté a nga yalane bemvendé ya Galad na: Nge mia kee ma na me wosane Beamônite, a Nti a ve be ôsu viam, ma foʼo ma ye bo évete jenan.

¹⁰ Ane bemvendé ya Galad be nga jô Yefté na: Nti a ne ngaa ya bia bese nge bia ye bo te bo avale wo jô.

¹¹ Eyoñe te Yefté ba be bemvendé ya Galad be nga ke. A nga tebe bôt ôsu ane nlô a évet; A nga baʼalan nkobô ôse a nga kobô asu be Nti e Mispa.

Yefté a dañe Beamônite bita

¹² Yefté a nga lôme minlôman e be njô bôte Beamônite be jô nye na: wo yi jé be ma ane wo tebe ma e ngame yat a zu bo si jame bita?

¹³ Ane njô bôte Beamônite a nga yalane minlôman mi Yefté na: Amu Israél a nga nyoñe si jam éyoñ a nga so Ejipte ataté Arnôn a kui Yabôk a Yordan. Eyoñe ji bulaʼane ma je évôvoé été.

¹⁴ Ane Yefté a nga beta lôme bôt e be njô bôte Beamônite

¹⁵ be jô nye na: avale di Yefté a jô na: Israél a nji ke nyoñe sii Môab nge sii Beamônite.

¹⁶ Bebela a ne na éyoñ Israél a nga so Ejipte, a nga wulu e nkôte si a kui évele mañ, a a nga kui e Kadés.

¹⁷ Eyoñe te Israél a nga lôme minlôman e be njô bôte ya Edom be jô nye na: Jôkéʼé ma me lôt e si jôé. Ve njô bôte ya Edom a nji kômbô wôʼô jam éziñ, avale te fe a nga bo e be njô bôte ya Môab, nye fe ve ben. Ane Israél a nga tabe e Kadés

¹⁸ Nde a nga wulu e nkôte si, a saʼale sii Edom a Môab; be nga kuu e si ya Môab e mfaʼa jôb da tôô; nde be nga vule minkan e Arnoñe yat, teke nyiin e sii Môab amu Arnoñ a ne nnéa sii Môab.

¹⁹ Israél a nga lôme bôt e be Sihoñ, njô bôte Beamorééñ, njô bôte ya Esboñ a jô na: Jôkéʼé bia bi lôt e si jôé akekui e vôm bia ke.

²⁰ Ve Sihoñ a nji bi Israél ndi abime da yiane na a jôʼé nye a tulan éfuse si jé; nde Sihoñ a nga sulane bôte bé bese, a vule minkan e Yahas a wosane Israél.

²¹ Ane Nti, e Zambe Israél, a nga ve Sihon a bôte bé bese e mo mʼIsraél, nde Israél a nga bôme be. Ane Israél a nga nyoñe sii Beamorééñ ése é mbe vôm ate.

²² Be nga nyoñe sii Beamorééñ ése, ataté Arnoñ a kui Yabôk, a ataté nkôte si a kui Yordan.

²³ Nde ñhe éyoñe ji ane Nti, e Zambe Israél, a wôléya Beamorééñ si ôsu ayoñ Israél, ye wo, éyoñe ji, wo kômbô wôlé je?

²⁴ E jôme zambe wôé kemôs a ve wo ô bi, ye wo ye bo te bi je? A jôm ése Nti, e Zambe wongan, a veya bia ôsu viangan, ye bia ye bo te bi je?

²⁵ Ye wo dañe Balak, e mona Tipor, njô bôte ya Môab? Ye a nga kui na a bo Israél mejô, nge bo nguleya wosane nye?

²⁶ Den a ntoo mimbu mintete mila Israél a too Esboñ a mevôm ma bômane nye, Aroér a mevôm ma bômane nye a e bitison bise bi ne e mebôñ ya Arnoñ: Amu jé mi nji kôté bie éyoñ éte?

²⁷ Sake ma me nga bo wo abé , ve wo wo bo ma abé éyoñ wo wosane ma. Nti, nyô a ne ntyiʼi mejô, a boʼo ntyiʼi mejô e môse wu e zañe bone bʼIsraél a Beamônite!

²⁸ Ve njô bôte Beamônite a nji ke vôʼôlô mejô mese Yefté a nga lôme na be kate nye.

²⁹ Nsisime Zambe ô mbe be Yefté éyoñ a nga tulane Galad a Manasé; a nga lôt e Mispa ya Galad; akôlô ya Mispa ya Galad, a nga vam e be Beamônite.

³⁰ Nde a ve Nti ngakaʼa na: nge wo ve Beamônite e mo mame na me dañe be ndañan ô ne ngumba,

³¹ e môt ase a ye kui mimbé ya nda jame na a zu tôbane ma nsoone ma so e Beamônite a mevaʼa mese, a ye veban e be Nti, a ye vebane ngumba.

³² Ane Yefté a nga ke e be Beamônite a wosane be, a Nti a nga ve be e mo mé.

³³ Nde a nga dañe be mbia ndañan, ataté Aroér a kui Minit, tañe bitisone mewôm mebaé, a kui Abel-Keramim. Beamônite be nga silibane si ôsu bone bʼIsraél.

Ngone minga Yefté

³⁴ Eyoñ Yefté a nga bulan e nda jé Mispa, ane ngo jé é nga kui atan a zu tôbane nye a mengom a mebôk . A mbe atyiʼi mone dé; a nji bi mone mfe, fam nge minga.

³⁵ Eyoñe Yefté a nga yene nye, ndʼa nga nyabe mengômesane mé a jô na: A ngo jam, ô wuaya ma e beta njuʼu été, ô ne wua ya ba ba bo ma me wôʼô ôlun! Me nga dañe kui anyu e be Nti, a me se nguleya bulane mvus.

³⁶ Ane ngo jé é nga jô nye na: A ésaa wom, ô nga dañe kui anyu asu be Nti, boʼo ma aval e nga kui wo anyu, amu éyoñe ji Nti a kuneya wo e be besiñe bôé, Beamônite.

³⁷ A nga beta jô ésaa na: E jame di e vabaʼane be ma: Vaʼa ma ngon ébaé! Ma ye ke minkô a yôn éto éndune jam bia be bemvôé be binga bam.

³⁸ Ane Yefté a nga yalane na: Kelek! nde a suu nye tañe ngon ébaé. Ane a nga ke ba be bemvôé be binga bé a yôn éto éndune jé e minkô.

³⁹ Eyoñe ngon ébaé é kuiya, nde a nga bulan be ésaa, nde ésaa a nga jalé ntiñetan a nga tiñeti e be nye. A mbe éndun. Ataté éyoñe te fulu é nga nyiin Israél été na:

⁴⁰ Mbu ôse, begobebinga yʼIsraél ba ke jem abôʼô ngone Yefté, môte ya Galad, tañe melu menyin.