BETYIʼI MEJÔ 10 - Bible en langue Bulu

Tôla a Yahir, betyiʼi mejô yʼIsraél

¹ E mvus awu Abimélék ane Tôla e mona Pua, e mona Dôdô, môte ya Isakar, a nga tebe mfaʼa ya nyii Israél; a nga too e Samir, e minkôle yʼEfrayim.

² A nga tabe ntyiʼi mejô Israél tañe mimbu mewôm mela a mila; ane a nga wu a jambe e Samir.

³ Eyoñ a wuya, nje Yahir a nga tebe a too môte ya Galad; a nga tyiʼi mejô Israél tañe mimbu mewôm mebaé a mibaé.

⁴ A nga bili bobefam mewôm melaa be mbe be betek e bone bijakase mewôm melale yôp, be bili fe bitisone mewôm mela, be nga loone fe bie na bitisone bi Yahir, bise bi too e si ya Galad.

⁵ Ane Yahir a nga wu a be nga jame nye soñ e Kamôn.

Yefté, ntyiʼi mejô yʼIsraél

⁶ Ane bone bʼIsraél be nga beta bo mam me nʼabé e mise me Nti, be nga kañe Bebal a Beastarté, bezambe ya Siri, bezambe ya Sidon, bezambe ya Môab, bezambe ya Amon a bezambe Befilisteñ. Be nga liʼi Nti teke saane nye.

⁷ Nde Nti a nga yaa Israél, a kuane nye e mo Befilisteñ a Beamônite.

⁸ Be nga ndeñele a kpweʼele bone bʼIsraél mbu ôte, be nga bo fe bone bʼIsraél bese be mbe e Yordane yat, e sii Beamoreeñ ya Galad avale te.

⁹ Beamônite be nga dañe Yordan a ke wosane Yuda, Bényamin a ndaa Efrayim. Israél a nga nyiñ e beta ôlun été.

¹⁰ Nde be nga yône be Nti a jô na: bi boya wo abé , amu bi liʼiya Zambe wongan a kañe Bebal.

¹¹ Ane Nti a nga jô bone bʼIsraél na: Bôte yʼEjipte, Beamorééñ, Beamônite Befilisteñ,

¹² Besidônieñ, Amalék a Maôn be nga tibili mia, a éyoñ mi nga yône be ma, ye me nji nyii mia e mo map?

¹³ Ve mia mi liʼiya ma a kañe bezambe befe. Ajô te maa ye ke beta nyii mia,

¹⁴ Kelan! A yônan e be bezambe mi tobeya, be nyii mia éyoñ yʼôlun!

¹⁵ Nde bone bʼIsraél be nga jô Nti na: bi boya abé . Boʼo bia ane wo yene mvaé. Ve da na kañeseʼe nyii bia den!

¹⁶ Ane be nga vaa bezambe ya bikuu be mbe e zañe jab a saane Nti: Nde Nti a nga wôʼô ôlun amu mbia be mam be nga kui e be Israél.

¹⁷ Ane Beamônite be nga sulane vôme wua a vule minkan e Mispa.

¹⁸ Bôt, bivete ya Galad, be nga jô bana a bana na: Môte mbé a ye taté ke wosane Beamônite? Nye a ye bo évete ya bôte bese ya Galad.