BETYIʼI MEJÔ 1 - Bible en langue Bulu

Israél a tabe e Kanaañ

¹ Eyoñe Yasua a wuya, bone bʼIsraél be nga yemelane nkômbane Nti a sili nye na: za ya be bia a ye taté bet a wosane bôte ya Kanaañ?

² Ane Nti a nga yalane na: Yuda e nye a ye bet amu me veya si éte e mo mé.

³ Nde Yuda a nga jô Siméoñ, monyañe wé na: zaʼa bia wo bi ke éfase si be nga ve ma a wosane Bekananééñ; bia wo fe bia ye ke éfase si be nga ve wo. Ane ba Siméoñ be nga ke.

⁴ Ane Yuda a nga ke, a Nti a nga ve Bekananééñ a Beférézieñ e mo map. Nde be nga bôé bôte toyini awôme ya be be e Bézék.

⁵ Be nga koone Adoni-Bézék e Bézék a wosane nye. Nde be nga bôé Bekananééñ a Beférézieñ.

⁶ Ane Adoni-Bézék a nga tup; ve be nga tôñe nye a bi nye. Nde be nga tyiʼi nye beyôm bʼanyu ya mo a mebo.

⁷ Ane Adoni-Bézék a nga jô na: Bejô bôte mewôme zañgbwa, beyôm bʼanyu ya mo a mebo ntyiʼan, be mbe be tokéʼé mebukaʼa bidi e tawôlô wome si; Zambe a bulane ma e jam me nga bo. Nde be nga kee nye e Yérusalem, vôm ate a nga wu.

⁸ Ane bone be Yuda be nga wosane Yérusalem a nyoñe nye; be nga wôé bôte yʼété a meyo me nkpwaté mekôn a diʼi tison a nduan.

⁹ Akôlô ya valé, nde bone be Yuda be nga ke ôsu a wosane Bekananééñ be nga too e nkôle yôp, ba be nga too e Négéb a ba be nga too njeʼese si ya éwome mañ.

¹⁰ Ane bone be Yuda be nga wosane Bekananééñ be nga too Ebroñ; melu mvus Ebroñ a mbe jôé na Kiryat-Arba; ane be nga wôé Sésayi, Ahiman a Talmayi.

¹¹ Akôlô ya valé nde Yuda a nga wosane bôte ya Debir; jôé Debir melu mvus e mbe Kiryat-Séfer.

¹² Ane Kaléb a nga jô na: Ma ye ve ngo jam Aksa e be môt a ye bôé tisone Kiryat-Séfer a nyoñe je;

¹³ ane Otniél, e mona Kenaz, monyañe mongôô Kaléb, a nga nyoñe je; nde Kaléb a nga ve nye Aksa ngo jé a luʼu je.

¹⁴ Eyoñe Aksa a soya, nde nga tindi nnôme wé Otniél a sili ésaa wé Kaléb afup. Ane Aksa a nga yôô éjakase jé a tebe si. Nde Kaléb ésaa wé a nga sili nye na: Wo kômbô jé?

¹⁵ Nde a nga yalane nye na: Boʼo ma jame di mbôlô ô nga ve ma si ya Négéb; vaʼa fe ma menjeñe mendim; ane Kaléb a nga ve nye menjeñe ya Palestine akôé a ma ya Palestine nké.

¹⁶ Ane bone be mone Kénieñ, ntyia Môze, be nga Kôlô tisone melen ba be bone be Yuda, e nkôte si ya Yuda, e si arade nké, a ke tabe e bôt été.

¹⁷ Ane Yuda ba monyañe wé Siméoñ, be nga ke bôé Bekananééñ be nga too e Téfat, a mane tyame tison éte a loone je na Orma.

¹⁸ Ane Yuda a nga beta fe nyoñe Gaza a éfuse si ése yʼété, nalé fe Askaloñ a éfuse si jé, Ekroñ a éfuse si jé.

¹⁹ Nti a mbe be Yuda nyoñan a nga nyoñe si minkô, vʼa nga kate nyoñe si ya bôt be nga too si ya mbiʼili amu be nga bili bevagoñe bityé.

²⁰ Be nga ve Kaléb Ebroñ, avale Môze a nga jô; nde a nga mane wôlé nye bone bʼAnak bela.

Bekananééñ bevok be nga nyiiban

²¹ Mvôʼô Bényamin be nji kui na be wôlé Beyébuzieñ be nga too Yérusalem e si jap: Ajô te Beyébuzieñ be nga tabe e Yérusalem ba be mvôʼô Bényamin a kui e môse wu.

²² Ane nda Yôsep é nga ke wosane tisone Bétél, a e Nti a nga too be be.

²³ Be nga taté lôme bôt be looé tison, jôé yʼété melu mvus é mbe Luz.

²⁴ Nde belooé si be nga yene môt a soʼok e tison été a jô nye na: litiʼi bia e vôm bi ne nguleya nyiin e tison été wôna bia ye mvamane wo.

²⁵ Nde nga liti be zen : ane be nga jiane tisone Bétél a meyo me nkpwaté mekôn, ve be nga liʼi môt ate a nda bôte jé ése.

²⁶ Ane môt ate a nga ke e sii Behétieñ; a nga lôñe tisone wé a yôlé je Luz: Tison éte é beʼe jôé te a kui e môse wu.

²⁷ Manasé a nji ke wôlé bôte ya Bétséañ a mevôm me tii a nye e si jap, avale te fe tisone Tanak a mevôm me tii a je, tisone Dor a mevôm me tii a je, tisone Yibleam a mevôm me tii a je, tisone Megidô a mevôm me tii a je; Bekananééñ be nga kômbô tabe si éte.

²⁸ Eyoñ Israél a nga bo ôbe ngu, be nga futi Bekananééñ ésaé belo si ve be nji ke wôlé be si.

²⁹ Efrayim a nji ke wôlé Bekananééñ be nga too tisone Gézer e si jap, ajô te be nga too ézezañe bôte yʼEfrayim e Gézer.

³⁰ Zabuloñ a nji ke nyoñe bôte ya Kitroñ si, nge ba ya Nahalol, ajô te be nga tabe ézezañe ya bone be Zabuloñ, ve be nga too bisaé bi ôlo si.

³¹ Azér a nji ke nyoñe si bôte ya Ako nge nyô bôte ya Sidoñ, Alab, Akzib, Elba, Afik a Rehôb;

³² A bone bʼazer be nga tabe ézezañe Bekananééñ, bôte ya si éte, amu be nji ke nyoñe si jap.

³³ Néftali a nji ke nyoñe sii bôte ya Bét-Sémés, nge nyôô bôte ya BétʼAnat, ajô te a nga tabe ézezañe Bekananééñ, bôte ya si éte; ve bôte ya Bét-Sémés a ba ya Bét-Anat be mbe ntindan ya bo bisaé bi alo.

³⁴ Beamorééñ be nga tindi bone be Dañ e minkô, teke ve be éyoñ ya siliki e mbiʼili.

³⁵ Beamorééñ be nga kômbô tabe e Ar-Erés, e Ayaloñ a e Sablim ve wo ndaa Yôsep é nga titi be yôp a be mbe ntindan ya bo bisaé bi alo.

³⁶ Nnéa si Beamorééñ a mbe a tatéʼé abete Akrabim, akôlô Séla a lôte valé.