BESAM 8 - Bible en langue Bulu

Etôtoʼo Zambe a duma môt

¹ Sam David a évete beyia bia. Mvete ya Gat ba bôm.

² A Nti, e Zambe wongan, akaʼabeñe jôé dôé e ne si ése! Wo ô nga telé éjijine jôé ô dañe yôp.

³ A anyu minkeñelé mi bon a benyañebéé, ô nga té a telé ngule jôé ôsu besiñe bôé, mfaʼa ya tooé nsiñ a nyeʼe akunaʼa évô.

⁴ Eyoñe ma fombô yôbe dôé, mboone ya mo môé, ngon a ateté ô nga telé,

⁵ môt a ne jé ane ô ne simesane nye? A mona môt ane ô ne nyoñe ngab a nye?

⁶ Ô nga kôme nye a liʼi ve tyôtyoé ya bo ane Zambe, nde ô nga jalé nye duma a étôtok.

⁷ Ô nga ve nye njôan e be mimboone ya mo môé. Ô nga futi mam mese e mebo mé si.

⁸ Mintômba a benyaʼa bese nsamba, toʼo na betite ya mefan;

⁹ anone ya yôb a kose ya mañ, jôm ése ja wulu e mendime me mañe si.

¹⁰ A Nti e Zambe wongan! akaʼabeñe jôé dôé e ne si ése.