BESAM 7 - Bible en langue Bulu

Womien tyiʼi ajô dam

¹ Jia David a nga yia Nti ajô Kus e mone Bényamin.

² A Nti, e Zambe wom! e be wo nye ma jeñ asoé dam; nyiʼi ma be bekpweʼele bam bese a kôtéʼé ma,

³ a za nyabe ma ane ngbwengbwem ja kee jôm a te bi te môt a kôté je.

⁴ A Nti, e Zambe wom! nge me boya jame te, nge mvô é ne e mo mam été,

⁵ nge me bulaneya abé e be nyô a mbe a nyiñe ma mvoʼé , nge me foneya nsiñe wom te kʼétom,

⁶ nsiñe wom a ntoo ve tôñe ma a nambe nsisime wom, a woʼotôʼô ényiñe jame si, a bôôé duma dam e mbuluʼu été!

⁷ Ayaa dôé été, kôlôʼô si a Nti, kôlôʼô si a wosan ayoʼo ya besiñe bam. Veʼe ôyo asu dam, e wo ô nga telé metiñ!

⁸ Ekôane bôt é bômaʼane wo! bulaʼan ô too je nya ôyabe yôp!

⁹ Nti a tyiʼi bôte mejô: a Nti, tyiʼi ma ajô aval ane zôsôô wom a né, a aval ane me ne mfuban teke bijô!

¹⁰ Teléʼé abé bikotekote bi bôt bia bo a yemete zôsôa môt, a wo wo yemelane minlem a mebun me bôt, e Zambe a ne zôsôô !

¹¹ Ebene jam é ne fefele Zambe, nyô a nyii ba be ne minleme zôsôô .

¹² Zambe a ne zôsôa ntyiʼi mejô, e Zambe a ne nguleya wôʼôlun môs ôse.

¹³ Nge a bo te bulane be nye, ékotekote môt ja jebe nkpwaté mekône wé, a kolé élaé jé a sôñe je nkôman.

¹⁴ Vʼa kômesan mengale ma wôé asu dé a mekoñ ma diʼan asu dé fe.

¹⁵ A saé asu ékotekote mboon. A nyoñ abume mam abé a biaé ékotekot.

¹⁶ A yooé ébé, a faʼa je a a ku ébé émien a nga fak.

¹⁷ Abé dé da ku e nlô wé yôp. A évô jé ja beta sise nye mvom asu.

¹⁸ Ma ye kañe Nti amu zôsôô wé, ma ye yia bia asu duma ya jôé Nti, nyô a nʼôyabe yôp.