BESAM 5 - Bible en langue Bulu

Meyeʼelan me môt a jaʼé nkaman mfaʼa bikotekote bi bôt

¹ Sam David mfaʼa évete nsamba bia, be bôme mimfañ.

² Keʼe alo mejô mam, a Nti! Wôʼô ntate wom!

³ Keʼe alo ñyône nloone wom a njô bôte wom a Zambe wom! Wo ma yeʼelane nye.

⁴ A Nti, mametyé, wo wôʼô tyiñe jam; mametyé ma tebe wo mis a yange.

⁵ Amu ô nji bo Zambe a yen ékotekote mvaé; abé e nji tabe vôm ô né.

⁶ Mekute me bôt me ne teke tebe mvoʼé e mise môé, wo vini ba bese ba bo ékotekot.

⁷ Wo wôé ba bese ba kobô minsos. Nti a wôʼô bôte metyi a mvô angôndô.

⁸ Ve ma, amu beta mvame wôé, ma ke e nda jôé, e woñe wo yiane wo été, ma kute meboñe si ôsu ya nda Zambe jôé é nʼétyi.

⁹ A Nti! wuluʼu ma e zôsôô wôé été; amu ba ba wosane ma, kôme zene jôé njeʼese ôsu viam.

¹⁰ Amu teke jame ya buni e mejô mab été, minleme miab été mi ne ve bilik, éngoñe jabe ki ve soñ é yoo, ôyeme viab ba bo wô meduʼan.

¹¹ Boʼo be ane bôt ba yiane mekua, a Zambe! mam ba bôndé me kele be na be ku! Bene be amu bizuʼu mewôé me bôte map, amu ba bene njôane wôé.

¹² Eyoñe te ba bese ba sobô be wo ba ye vak. Ba ye fône nnôm éto a wo ye kamane be; ba ye vaʼa be wo, ba bese ba nyeʼe jôé dôé.

¹³ Amu wo Nti, wo botane zôsôa môt, wo bômane nye mvam anʼében.