BERÔMEÑ 8 - Bible en langue Bulu

E Nsisim wo ve ényiñ

¹ Ajô te éyoñe ji, mekua me nji fe bo e be ba be ne be Krist Yésus.

² Amu atiñe Nsisim ényiñ e nga vaa ma atiñ abé a awu.

³ E jam e mbe ayaé mfaʼa atiñ , amu ateʼe ya minsôn, ve Zambe a nga bo de, vôm a nga lôme Mone wé a zu nyoñe mbia nyôle wongane ya minsôn, a bo étyiʼa mfaʼa abé . A nga ve abé mekua e minsôn été.

⁴ Ajô te zôsôô , ane metiñe ma sili, a ye jalébane be bia, bia bete bi nji wulu a minsôn, ve a Nsisim.

⁵ E ne été na, e ba be ne éjôé minsône si, ba tôñe mame minsôn. Ve ba be ne éjôé Nsisim si, ba tôñe mam me Nsisim.

⁶ Enyiñe minsôn ja suʼulan awu, ve ényiñe Nsisim ja suʼulan ényiñ a mvoʼé .

⁷ Amu ôsimesane mboone mame minsôn wo siñe Zambe. O nji ve nkômbane Zambe mewôk, a ô nji bi ngul éte.

⁸ A ba be ne éjôé minsône si be voʼo yene mvaé e mise me Zambe.

⁹ Ve mia, mi nji fe bo éjôé minsône si, ve e ji Nsisime si. Eyoñ e ne na, Nsisim a too e be mia été. Nge môt éziñ a nji bi Nsisime Krist, a nji bo éñwé.

¹⁰ Nge Krist a too e be mia, akôsa bo na menyôle menan me ne jôm awu a abé , ve Nsisim ô ne ényiñ e be mia amu zôsôô .

¹¹ A nge Nsisime nyô a nga wômôlô Yésus miñwuan ô too e be mia, nyô a nga wômôlô Yésus Krist miñwuan a ye fe ve biwuwua menyôle bienan ényiñ a zene Nsisime wé ô too e be mia.

¹² Ajô te ñhe a bobejañ, bi bili mvôla, saa mfaʼa minsône na bi nyiñ ane nkômbane minsôn ô né.

¹³ Amu nge mia nyiñ aval ane minsôn mia yi, mia ye wu. Ve nge mia wôé mbia mimboone mienane ya nyôl amu Nsisim, mia ye nyiñ.

¹⁴ Amu ba bese Nsisime Zambe wo wulu be, mbe be ne bone be Zambe.

¹⁵ Mi nji nyoñe Nsisime wo bo mia belo a beta ve mia woñe minlem, ve wu wo ve mia éto bon , a ñwô ôte bia yôtane na: Abba! Tate!

¹⁶ Nsisime te ôbien wo kate Nsisime wongane na, bi ne bone be Zambe.

¹⁷ A nge bi ne bon , wôna bi ne benyoñe ngabe ya élik, benyoñe ngabe bʼéliʼi Zambe, bia be Krist. Nge bia nyoñe ngabe mintaé mié, bia ye fe nyoñe ngabe étôtoʼo jé.

Etôtoʼo ya melu ôsu

¹⁸ Ma tuʼa yeme na, mintaé ya éyoñe ji mi ne te veʼan a étôtoʼo ja yiane litibane be bia.

¹⁹ Amu bitétéa bia yange a abui évevé, nlitane bone be Zambe.

²⁰ Amu bi nji vañe ke éjôé ngule momo si, ve a ngule njôane nyô a nga kañese na e bo nalé. Bi bili ndi nlem ,

²¹ amu bia ye vas éto ôlo éndaman, mfaʼa ya nyoñe ngab éto fili, a étôtoʼo bone be Zambe.

²² Bia yeme na, bitétéa bia tat éyoñe ji, a wôʼô mintaé aval ane mi nkôʼôlane mie.

²³ Saa ve bie étam, ve bia bebiene fe, e bia bi bili bembômô bibuma be Nsisim, bia tat e minlem été, bi yangeʼe nyoñan éto bon , a nkôtane nyôle jangan.

²⁴ Amu bi nga nyiibane foʼo, ve ô ngenane ve ajô ndi nlem . Amu na, za a tabe ndi nlem a jôm a lôô a mis? Nyenane ya yene jôme môt a too je ndi nlem ô nji fe bo ndi nlem .

²⁵ Ve ntabane ndi nleme mfaʼa jôm bi nji yen, ô ne ajô ya yange je a abui mban a njiban.

²⁶ Avale te fe, Nsisime wo volô bia ateʼe dangan été. Amu bi nji yeme yeʼelan ane da yian. Ve Nsisim ôbien wo yeʼelane señe jangan a mintat mi ne teke atoté.

²⁷ A nyô a yemelane minlem, a yeme minkômbane mi Nsisim. Bia yeme na, Nsisime wo yeʼelan señe mimfufup, aval ane nkômbane Zambe ô né.

²⁸ Mfaʼa ôvok, bia yeme na, mfaʼa ba ba nyeʼe Zambe, mame mese ma fulane suʼulane mvaé; mbe be nga loban ane mbôndane feʼe wé ô né.

²⁹ Mbe bete a nga taté yem ôsusua, a telé be be funan éveʼela Mone wé; ajô te, a ye bo ntôle ya bizuʼu bi bobenyañ.

³⁰ E ba a nga taté top, mbe bete a nga loon; a ba a nga loone bete, mbe fe a nga kale; a e ba a nga kale bete mbe bete fe a nga wumulu.

Nyeʼane Zambe

³¹ Bia ye jô aya mfaʼa mame mete mese? Nge Zambe a ne ngame jangan, za a ye tebe bia e ngame yat?

³² E nyô a nga bo te kamane Mone wé émien, ve a nga ve nye asu dangan, a ye bo te ve bia mame mese tyiñe jia a Mone wé ate aya?

³³ Za a ye boʼolô mintobane mi bôt mi Zambe jam? Zambe, nye a kale.

³⁴ Za a ye ve mekua? Yésus Krist a nga wu, a fe na, a wômôya, nye a to mbo nnôme Zambe, a yeʼelan ajô dangan.

³⁵ Za a ye kandé bia a nyeʼane Krist? Ye njuk, ye woñ, ye ékpweʼele, ye zaé, ye soé, ye angôndô, ye fansoñ?

³⁶ Ane e ne ntilane na: Amu ajô dôé bia wôébane ngume môs . Be nga lañe bia ane betit ba yiane wôéban.

³⁷ Ve mfaʼa mame mete mese, bi ne bedañe ya ôsu, amu nyô a nga nyeʼe bia.

³⁸ Yaa, me too ndi nleme na: Saake awu, saake ényiñ, nge be éngele, nge bijôé, nge mame ya éyoñe ji, nge ma ya melu ôsu, nge mengule mʼéziñ,

³⁹ saake ôyabe yôp, nge édoʼo si, nge ététéa éziñ. Teke jôm ja ye bo nguleya kandé bia a nyeʼane Zambe ô nga yené e be Yésus Krist Nti wongan.