BERÔMEÑ 6 - Bible en langue Bulu

Nwuan amu abé , ve nyiñan amu Yésus Krist

¹ Bia ye ñhe jô aya? Ye bia ye ke ôsu a tabe abé été nde mvam ja ye nenenen?

² Teke foʼo bebé! Da ye bo aya na, bi too miñwuan mfaʼa abé , bi beta fe vebe mfaʼa abé ?

³ Nge na, ye mia dimi na nge bia bese bi nga duban e be Yésus Krist, nalé a ne na, bi nga duban awu dé été?

⁴ A zene ya nduban awu dé été, e ne na, bi nga jambe bia be nye. Nalé ate, aval ane Krist a nga wômô ñwuan, étôtoʼo Esaa été, bia fe bia yiane nyiine mfefé ényiñ.

⁵ Amu nge e ne foʼo nalé na bi nga tuʼa lat ngume nlatan a fulan awu dé été, da ye fe bo nalé mfaʼa ñwômane wé.

⁶ E ntukaʼa wôʼan ajô di: nnôme môte wongan ô nga tyeléban élé a nye, nde nyôle abé nyô ja ye ndaman, ane bia ye bo te fe bo belo bʼabé.

⁷ Amu na, e nyô a wuya, a kôlôya éto ôlo ya abé .

⁸ Ve nge bi wuya bia be Krist, bia buni na bia ye fe nyiñ bia be nye.

⁹ Bia tuʼa yeme na, ñwômane miñwuan, Krist a nji fe wu. Awu e nji fe jôô nye.

¹⁰ Amu ñwuan a nga wu, a nga wu mfaʼa abé éyoñe jia ya biyoñe bise. Wôna mfaʼa ényiñ, a vee mfaʼa Zambe.

¹¹ Avale te fe mia, yenane miabebiene na mi ne miñwuane mfaʼa abé , a bevevee, amu Zambe, e be Yésus Krist.

¹² Jeñane ñhe na, abé e bo te beta jôô e biwuwua menyôle bienan été a bo mia na mi ve mbia minkômbane mié mewôk.

¹³ Te belane bibuʼa bienane mfaʼa ya bo abé , aval ane bikpwelé bia bo ékotekot. Ve aval ane bevevee be bôt ba so miñwuan, boʼone Zambe ésaé a belane bibuʼa bienan ane bikpwelé bi zôsôô .

¹⁴ Amu na, abé da ye bo te fe jôô mia, amu mi nji fe bo metiñe si, ve e mvame si.

Mboone zôsôô

¹⁵ Nde jé? Ye bia ye bo abé amu bi nji bo metiñe si, ve mvame si? Teke bebé!

¹⁶ Ye mi nji yeme na, éyoñ mia bo mia bebiene bebo bisaé môt éziñ, aval ane belo mfaʼa ya ve nye mewôk, mi ne belo bé, nge a nji bo belo bʼabé da kee mia awu été, wôna belo mewôk ma kee mia e mam me zôsôô été.

¹⁷ E mvaʼane Zambe akéva! Amu vôme mi nga to belo bʼabé, mi nga ve éveʼela ya nyeʼelan mi nga nyoñ mewôʼô ma so nlem .

¹⁸ Nde amu mi kôtébaneya éto belo bʼabé, mi ntoo belo be zôsôô .

¹⁹ Ma kobô ane môt, amu ateʼe denane ya minsôn. Aval ane mi nga belane bibuʼa bienan ane belo be mam me ne mvin a nzametaʼane, mme ma suʼulan ébiasé mfaʼa Zambe, avale te fe belaʼane bie ane belo be zôsôô , nye ate a kee mia vôme ya bo mia mfuban .

²⁰ Eyoñe mi nga too belo bʼabé, mi nga too beti mfaʼa mam me ne zôsôô ,

²¹ za avale bibuma mi nga wum éyoñe te? Eyoñe ji mia wôʼô bie ôson, amu asuʼulane ya été e ne awu.

²² Ve éyoñe ji, amu mi ntoo nkôtane mfaʼa éto belo bʼabé, mi ntoo belo be Zambe, a mia wume bibuma bia kee mia e mfuban été; asuʼulane dap e ne ényiñe ya melu mese.

²³ Amu maʼane mʼabé me ne awu, ve mveane zesé Zambe, ô ne ényiñe ya nnôm éto e be Yésus Krist Nti wongan.