BERÔMEÑ 4 - Bible en langue Bulu

Abraham ésaa bebuni

¹ Nde bia ye jô aya ajô mvamba wongan Abraham? Jé nje a nga nyoñ a zene minsôn?

² Nge Abraham a nga kabe amu mimboone mi mam, wôna a bili éfia ya bo je mebun, ve saa ñhe asu Zambe.

³ Yaa, ntilan wo jô jô aya? Wo jô na: Abraham a nga bi mbunan mfaʼa Zambe, ane ô nga lañebane nye zôsôô .

⁴ Amu môt a bo ésaé, e maʼane mé me nji lañeban ane mveane mvam , ve aval ane jôm é ne énjé a yiane nyoñ.

⁵ Ve mfaʼa môt a nji bo ésaé, ve buni môt a kale mbia môt, mbunane wé wo lañebane nye zôsôô .

⁶ Amu nalé David a kobô ajô môte Zambe a lañe zôsôô , saa amu mimboon mi mam, vôm a jô na:

⁷ Ebotan a ba bikotekot biap bi ntoo njaman , a mam abé map me nto mbutan;

⁸ ébotan a môt, nyô Nti a ye bo te taʼasan abé .

⁹ Ye ébotane ji é ne ve asu ba be ne ntyiʼibane metye, ye é nji bo fe asu ba be ne minsôso? Bia jô na: Mbunan Abraham ô nga lañebane nye mfaʼa zôsôô .

¹⁰ Ve nsili ô ne na: E nga bobane nalé a za zene? Ye ôsusua, ye mvuse ntyiʼan atyele wé? Sa mvus ve éyoñe te a ngenane te tyiʼiban atyel.

¹¹ Ve ndeme ntyiʼan atyel é nga vebane be nye aval ane sitame zôsôô a nga nyoñ amu mbunan, éyoñ a nga to nsôso. Ajô te ñhe a nga boban éyoñe jia jia ésaa bebuni bese be ne minsôso, ane zôsôô ke a ne lañebane be be,

¹² a bebuni be ne ntyiʼibane metye, mbe bete, saa ve amu be ne bôte ya mvoñe bôt é ne ntyiʼibane metyel étam, ve amu ba baʼale fe mbunane ésaa wongan Abraham, te yen a za tyiʼiban atyel.

¹³ E ne bebela: saake amu mbaʼalane metiñ, vʼamu zôsôô a so amu mbunan, nde ngakaʼa ya nyoñe si ane ngap é nga veban e be Abraham a e mvoñe bôte jé.

¹⁴ Nge amu mbaʼalane metiñ nde ba bo benyoñe ngap élik, wôna mbunan wo volô jé, a zen éte, ngakaʼa é ne momo.

¹⁵ Amu metiñ ma dutu ayaa. A vôme metiñ me nji bo, ntyamane metiñe ke ô ne momo.

¹⁶ Ajô te ngakaʼa é nga veban amu mbunan, nde ja ye bo mveane zesé Zambe mfaʼa mvoñe bôt Abraham ése, sa mfaʼa ba ba ve metiñe mewôk étam, ve nalé fe mfaʼa ba bese ba buni, aval ane Abraham a nga buni, Abraham a ne ésaa bia bese,

¹⁷ aval ane ntilane wo jô na: Me nga bo wo ésaa meyoñe me bôt abui. A ne ésaa wongan asu nyô a nga buni; e Zambe a wômôlô miñwuan a bo biôm bi ne momo na bi tabe.

¹⁸ A ntabane ndi nleme mfaʼa jôme môt a mbe te ngule ya veʼe feʼe ya tabe je mebun, ve nye, a nga buni, a suʼulane bo ésaa meyoñ abui, aval ane njôane wuna na: Nalé e mvoñe bôte jôé ja ye bo.

¹⁹ A nji bo bisô amu nyôle jé, akôsa bo a ntoo bebé ntete mimbu a minga wé Sara, wua ane nyô mbôk, be mbe ane miñwuan mfaʼa miaé.

²⁰ Be nji sôane ngakaʼa Zambe. Ve be nga bo ngule minlem, amu mbunan a ve Zambe duma.

²¹ Be mbe njalan a ndi nleme na e jame Zambe a tiñetiya, a bili ngule ya tôé de.

²² Amu ajô te mbunan ôte ô nga lañebane nye mfaʼa zôsôô .

²³ Amu na, sa ve mfaʼa wé étam, nde ntilan wo jô na: E nga lañebane nye.

²⁴ Ve nalé fe mfaʼa wongan, bia bete mbunan wo ye fe lañeban, amu bia fe bia buni nyô a nga wômôlô Nti wongan e miñwuan;

²⁵ nyô a nga wu ajô minkobane miangan a wômô mfaʼa mekabe mangan.