BERÔMEÑ 2 - Bible en langue Bulu

Zôsôa ntyiʼane mejô Zambe

¹ Ajô te ô nji bi éfia ya kabe je, wo, avale môt ese ô né, a wo wo ve môte mfe mekua, wo kpweʼele womien. Amu womien wo bo avale mame te.

² Amu ba yeme na, ntyiʼane mejô Zambe wo boban e benya mejôʼ été, e be ba bese ba bo avale mame te.

³ Ye wo simesane na, wo wo ve ba ba bo avale mame te mekua, ô boʼo fe ane be, wo ye saʼale ntyiʼane mejô Zambe?

⁴ Nge na, ye wo biasé abui afu nleme Zambe, abui njibane dé, a abui ésôs dé, ô vuane na, abui afu nleme dé te e ne mfaʼa ya dutu wo na ô kôñelane nlem ?

⁵ Amu ayet nleme dôé, te kômbô kôñelan, wo naane womien abui ayaa, éyoñe môs ayaa wo ye kpwaan, ñwô ôte zôsôa ntyiʼane mejô Zambe a ye yené;

⁶ nye ate a ye yaʼane môt ase aval ane mimboone mi mame mié mi né.

⁷ Enyiñe ya melu mese e be ba bese, amu mbane wop ya bo mvaé, ba jeñe étôtok a duma, a jôm é ne te tyendé.

⁸ Ve ayaa a ôson, mfaʼa ba, mbe bete, amu nkañgane wop, ba bene benya mejôô, a suu bebiene si ékotekot été.

⁹ Mintaé a woñ bia ye zu e be môt ase a bo abé , Beyude ôsusua, wôna Begrék.

¹⁰ Etôtok, duma, a mvoʼé bia yange nyô ase a bo mvaé, ôsusua Beyude, wôna Begrék.

¹¹ Amu nsemane mingume mi bôt ô nji bo e be Zambe.

¹² E ba bese be nga bo abé te yeme metiñ, ba ye fe wu tee metiñ. E ba bese ki be nga bo abé be bili ñyemane metiñ, ba ye tyiʼibane mejô a éfufube metiñ.

¹³ Amu na, saa ba ba wôʼô metiñ a melo, mbe be ne zôsôô e mise me Zambe, ve ba ba baʼale me, mbe ba ye kabe e mise me Zambe.

¹⁴ Eyoñe bikul bia bo e mam metiñ ma jô aso abialé, be te yeme metiñ, be ntoo metiñ e mfaʼa wobe bebien, akôsa bo be nji bi metiñ.

¹⁵ Ba liti na, nkômbane metiñ ô ne nkpwelane minleme miap. Mone môte ya minleme miap a ne fe ngaa, a zôsôô ya minleme miap a ve be bijô nge kale be.

¹⁶ Nalé nye a ye yené, ane Mbamba Foé wom ma kañete a né, e môse Zambe, e be Yésus Krist, a ye tyiʼi mboon ôse ya bôt ô ne nsolan.

Melo me Israél

¹⁷ Ve nge wo, ô beʼe jôé mone Beyude, ô yeʼe atiñ a tabe mebun e be Zambe wôé,

¹⁸ wo wo yeme nkômbane wé, wo, amu ô nga yéʼé ane metiñ, wo yeme kandé jôm é ne foʼo nyaa.

¹⁹ Wo wo liti na ô ne nliti zene mindindim, éfufube ya ba be ne dibi été,

²⁰ ô ne ñyeʼele bedimi mam, a ñyeʼele ayôme bongô. Wo ô bili édoʼo ñyemane benyaa mejôô ja so metiñ été;

²¹ ajô te, wo wo yeʼele môte mfe, ve te yeʼele womien! Wo yeʼele bôte na te wup, ve womien ô wubuk!

²² Wo tyili bôte mboone mejian , ve womien ô boʼo mejian ! Wo vini nkañane bezambe befe, ve ô nyoñe biôme ya menda me zambe map.

²³ Wo bo mebun amu ñyemane metiñ, ve wo biasé Zambe amu ntyamane metiñe wôé.

²⁴ Ve aval ane e ne ntilane na: Jôé Zambe e ne mbiasebane be meyoñe bikuu amu mia.

²⁵ Teke bisô, ntyiʼiban atyel ô ne mfi, nge wo baʼale metiñ. Ve nge wo tyame metiñ, ntyiʼiban atyele wôé été, ô ne fe ane môt a ne nsôso.

²⁶ Ve nge môt a ne nsôso, a baʼale metiñ, ye nsôsole wé wo ye bo te lañebane nye ane ntyiʼiban atyel?

²⁷ Nyô a ne nsôso mfaʼa minsôn ve a baʼaleʼe metiñ, a ye ve wo mekua, e wo ô bili kalate metiñ, ô too fe ntyiʼan atyel e minsôn, ve ô tyame metiñ.

²⁸ Ajô te saa melitane ya atan e mme ma bo mfañe mone Beyude, nge ndeme ntyiʼan atyele ya minsôn ja yené a mis, nje é ne jôm ébien ntyiʼan atyel ô né.

²⁹ Ve jôm é ne nsolan nje é ne mone Beyude a, ntyiʼan atyel ô ne wu ya nlem , e wu wo so Nsisim, sake metiñ, nyôlé ate a ne môt a nyoñe meseʼesa saa be bôt, ve be Zambe.