BERÔMEÑ 16 - Bible en langue Bulu

Mebendé; mebatan; minkômban

¹ Ma bendé mia ajô Febé, kale jangan, diakon ya e keké é ne Kenkréa.

² Nyoñane nye be Nti, aval ane da yiane mimfufup. Volaʼane nye mfaʼa ya jam ese a ye yi na mi volô nye. Amu a nga bo ésaé ya volô bôt abui, aval ane mamien.

³ Mi silaʼane me Priska ba Akilas, beébe bebo bisaé bam e be Krist.

⁴ Be nga ve bebien asu ya kaman ényiñe jam. Saa ma étam ma ve be akéva, ve nalé fe bekeké bese ya bikuu.

⁵ Silaʼane fe ma keké é wôʼô sulan e nda jap. Silaʼane ma nyô ma nyeʼe Epayinét, mbômô ébuma ya Azi e be Krist.

⁶ Silaʼane ma Marie nyô a nyoñe njuʼu abui mfaʼa wônan.

⁷ Silaʼane ma Andrônikus ba Yunias, bivuvumane biam, mbe bia be be bi mbe nsamba minkôm. Be ne minlômane ya duma. Be mbe ma ôsu, mfaʼa ya bo ba be Krist.

⁸ Silaʼane ma Ampliatus, nyô ma dañe nyeʼe be Nti.

⁹ Silaʼane ma Urbeñ, ébe mbo ésaé wongan, a nyô ma nyeʼe, Stakis.

¹⁰ Silaʼane ma ba ya nda Aristôbul.

¹¹ Bataʼane ma Hérôdioñ évuvumane jam. Silaʼane ma ba ya nda Narsis ba buni Nti.

¹² Silaʼane ma Triféne, a Trifôze, mbe be nga ve bebiene njuʼu abui e be Nti. Silaʼane ma éñwom Persis, nyô a nga jibi abui njuk e be Nti.

¹³ Silaʼane ma Rufus, ntobane be Nti a nyia wé a ne fe nyia wom.

¹⁴ Silaʼane ma Asim Krist, Flégon, Hermés, Patrôbas, Hermas a bobejañe baa be be be né.

¹⁵ Mi silaʼane ma Filôlôg a Yuli, Neré a kale jé Olimpas a mimfufube mise baa be be be né.

¹⁶ Mi bataʼan, wua a nyô mbok, a nlatane menyu ô ne mfuban . Bekeké bese ya Krist ba batane mia.

¹⁷ Ma yeʼelane mia a bobejañ na, mi saʼale ba ba té mengam a mam ma kolé ôbak, mbe bete ba liʼi ñyeʼelan mi nga nyoñ. Kelane be ôyap.

¹⁸ Amu balé bete be nji bo Krist Nti wongan bisaé, ve mebume map mebien. Mbe bete, a élen nkobô jap ya éwonoʼo, ba duʼu minleme mi ba be ne biyebeyebe.

¹⁹ Ajô te, ma vak amu ajô denan. Ve ma yi na, mi yeme kandé mame me ne mvaé a bo mfuban mfaʼa mam me ne abé .

²⁰ A Zambe ya mvoʼé a ye fite Satan e mebo menane si. Mvame Nti wongan Yésus é tabeʼe be mia.

²¹ Timôté, ébe mbo ésaé wom, a sili mia, nalé fe Yason a Sôsipatrôs, bivuvumane biam.

²² Ma, Tertius, ntili kalate nyô, ma batane mia e be Nti.

²³ Gayius, nyô me too nda , a nyô ngume keké wo sulane be nye, a batane mia. Eraste, nkale akume ya tison a sili mia, nalé fe Kartus, mojañe wongan.

²⁴ E mvame Nti wongan Yésus Krist é tabeʼe e be mia bese. Amen!

Duma e be Zambe étam

²⁵ Nde e be nyô a bili ngule ya yemete mia, aval ane Mbamba Foé ma kat a né, éyoñe ma kañete Yésus Krist, aval ane nkulane nsolane jam ô nga baʼaleban évôl été aso biyoñe ya nnôm éto ô né,

²⁶ ve éyoñe ji, ô yenébaneya a bobane na meyoñe bikuu me yeme wô a zene mintilane bekulu mejô, aval ane njôane Zambe a too nnôm éto ô né, asu ya kee be e mewôʼô ma so mbunan été,

²⁷ e be Zambe ate étam, susuʼa mfefek, duma e boʼok amu Yésus Krist, nnôm éto. Amen.