BERÔMEÑ 15 - Bible en langue Bulu

Jeñane mvaé bôte befe saa vʼénjenan étam

¹ Ve e ne ajô dangan bia mingungul e mbunane na, bi beʼe mimbeʼe ya ba be ne atek, a bo te jeñe ve mvaé jangan.

² Môt ase ya be bia, a jeñe na a bo mam me ne mvaé e be môt a ne nye bebé, asu ya kômôtô nye.

³ Mfaʼa Krist a nji jeñe mvaé jé émien, ve aval ane e ne ntilane na: meta ya ba be nga ta wo, me nga viane jimbi ma.

⁴ Amu mam mese me nga tilibane melu kôa, me nga tiliban asu ya nyeʼelane wongan. Nde amu njiban a mvolane minlem mbie bia so mejô me Zambe été, bia ye bi ndi nlem .

⁵ Nde Zambe ya njiban a mvolane minlem a boʼo mia na, ñwôkaʼane a bo e zañe jenan, aval ane nkômbane Yésus Krist ô né,

⁶ nde mia ye ve Zambe duma, Esaa Nti wongan Yésus Krist, mi to nleme wua a tyiñe jia.

Yésus, mbo ésaé bôte bese

⁷ Aval ane Krist a nga nyoñe mia, nyoñane fe mia mia nalé, amu duma Zambe.

⁸ Ma yemete de na, amu ntôéane mejô Zambe, nde Krist a nga bobane mbo ésaé ya ba be ne mintyiʼane metye, mfaʼa ya jalé mengakaʼa a nga kaʼa bemvamba.

⁹ Ve mfaʼa bikuu, bia wumu Zambe amu mvame jé, aval ane e ne ntilane na: ajô te ma ye wumulu wo, ézezañe meyoñe bikuu, a ma ye yia jôé dôé bia.

¹⁰ A beta fe jô na: a meyoñ , vaʼane fufulu a bôte bé.

¹¹ A na: a meyoñe mese, wumulaʼane Nti, a bôte bese be kute nye mefas.

¹² Ezayi a jô fe na: éfaʼalé Yesé ja ye so, nyô a zu tebe a jôô meyoñ . A ma ye telé ndi nleme jap e be nye.

¹³ Nde Zambe bi too nye ndi nlem , a jaléʼé mia a mevak, a mvoʼé e mbunan été, nde mia ye jaé ne lut e ndi nlem amu ngule Mfufube Nsisim!

Esaé Paul e be bikuu

¹⁴ Wôna, mfaʼa wônan, a bobejañe bam, ma buni na miabebien mi ne nkôman, njalan a nya ñyemane, a nguleya leban mia mia.

¹⁵ Ve akôsa bo nalé, asu ya vumelan asimesane denan, me nga tili mia mevôme mʼéziñ a ayoʼo ese, aval ane mvam Zambe é nga vebane be ma é né na,

¹⁶ me bo mbo ésaé Yésus Krist e be bikuu, ntelan étyi asu Mbamba Foé Zambe, nde bikuu bia ye bo mvean, ñwô ôte, a ntunane Mfufube Nsisim, wo ye yené mvaé e mise me Zambe.

¹⁷ Ajô te ma yiane bo mebun e be Yésus Krist ajô ésaé Zambe.

¹⁸ Amu me mbe te ngule ya kobô jam, vengevenge ve di Krist a nga belane ma de na, me dutu meyoñe bikuu me bo mewôk,

¹⁹ a zene ya kobô, a mimboon, mendem a bitua bi mam, a ngule Mfufube Nsisim. Nde ataté Yérusalém, mefôla me nga bôman, a kui Iliri, me nga tuʼa kate Mbamba Foé Krist

²⁰ Ve me nga tyiʼi na, me kate Mbamba Foé ve vôme jôé Krist e ngenane te kateban, amu me za lôñ e mbôkaʼa môte mfe a nga bôʼô yôp,

²¹ a bo ane ntilan wo jô na: e ba Foé é nji katebane be be, ba ye yen, a ba be nji tame wôʼô je ba ye yem.

Mimvañan mi Paul

²² A jame te ebien nde e nga kamane ma biyoñ abui na, me bo te zu e be mia.

²³ Nde éyoñe ji, amu me nto te vôme ya bo ésaé mefôla ma, a na, aso mimbu abui, me bili beta nkômbane ya zu e be mia,

²⁴ éyoñe ma ye ke Panya, me too ndi na, ma ye yene mia éyoñe ma ye lôt a nyoñe mvolane wônan. Eyoñe te ma ye bi maʼa ya tabe jaʼane abe melu bia be mia.

²⁵ Ve éyoñe ji, ma ke Yérusalém ajô ésaé mimfufup.

²⁶ Amu Masédôan a Akayi be nga tyiʼi na, ba ye liti mfulane minlem, a zene ya volô mimfufube ya Yérusalém mi ne azoé été.

²⁷ Yaa, bebiene be nga tyiʼi nalé, a be nga yiane bo nalé. Amu nge bikuu bi nga bo benyoñe ngabe ya mame mabe ya Nsisim, wôna ba yiane fe volô be a biôme ya minsôn.

²⁸ Eyoñe ma ye mane kôme jame te, a kalane be mimveane mite, éyoñe te ma ye lôte be mia a ke Panya.

²⁹ A ma yeme na, éyoñe ma ye zu be mia, ma ye zu njalan a bibotane bi Krist.

³⁰ Ve ma yeʼelane mia a bobejañ, amu Yésus Krist Nti wongan, a nyeʼane ya Nsisim na,

³¹ me bo te ku e mo me ba be ne te buni Yudé, a na, mvolane ma kee wô Yérusalém ô nyoñebane mvoʼé e be mimfufup.

³² Nalé a ye bo me na, me kui e be mia a mevak, amu nkômbane Zambe na, me bi awoʼon bia be mia.

³³ Nde Zambe ya mvoʼé a tabeʼe be mia bese. Amen.