BERÔMEÑ 14 - Bible en langue Bulu

Mingungul a mintetek

¹ Nyoñane nyô a ne atek e mbunan été. A te veane nye mekua mfaʼa ya asimesane dé.

² Mbunane môte wua, wo ve nye ngule ya di jôm ése. Ve môte mbok, amu atek, a di ve bijebejeba.

³ Nyô a di a boʼo te biasé nyô a ne te di. A nyô a ne te di a boʼo te biasé nyô a di, amu Zambe a nga kañese nye.

⁴ O ne za wo tyiʼi éza mbo ésaé ajô? Nge a ku, nge tebe, e ne ajô masa wé. A ye tebe ngu amu Nti a bili ngule ya telé nye.

⁵ Môt éziñ a kandé mimôs, mfe ki a lôô mis avale da. Môt ase, e ntyiʼan ô ne éñwé été, a boʼo njalan a mbunan.

⁶ Nyô a kandé mimôs, a bo de mfaʼa Nti: nyô a di jôm ése, a di mfaʼa Nti: e ne été na, a ve Zambe akéva.

⁷ Nalé fe na, teke môte wua ya be bia a nyiñ a émien, a teke môt éziñ a wu mfaʼa wé émien.

⁸ Amu nge bia nyiñ, bia nyiñ amu Nti, a nge bia wu, bia wu e be Nti. Ajô te jaʼane bia nyiñ, nge wu, bi ne ba be Nti.

⁹ Amu Krist a nga wu a beta wômô, amu a ye bo Nti miñwuan a nyô bevevee.

¹⁰ Ve wo, amu jé wo ve monyoñ mekua? A wo, amu jé wo biasé monyoñ? Yaa, e ne été na, bia bese bia ye tebe asu éto ntyiʼane mejô Zambe.

¹¹ Amu e ne ntilane na: ane me vee, nalé Nti a jô, aboñ ese da ye kutubane si asu dam, a ôyem ôse wo ye ve Zambe duma.

¹² Ajô te môt ase a ye yalan ajô dé émiene be Zambe.

¹³ Ajô te e mboʼone te veane wua a nyô mboʼo mekua. Ve bi tyiʼi na, môt a bo te bôôé monyañe jôme ja kolé nye ôbak nge kpwéé nye.

¹⁴ Ma yem, a ma tuʼa buni amu Nti na: Teke jôm é ne mvin e be ébien, ve jôm é ne mvin e mise me môt a yene na é ne mvin.

¹⁵ Nge wo di bidi biziñ bia ve monyoñ ôlune nlem , ô nji fe wulu ane da yian e nyeʼan été. Tabeʼe ntyele na, nyô Krist a nga wu amu ajô dé, a jañ amu ndiane wo di zesé bidi.

¹⁶ E mvaé jenan é boʼo te toteban abé e be bôt.

¹⁷ Amu éjôé Zambe é nji bo ndian a nyuan, ve zôsôô , mvoʼé a mevak e mfufube Nsisim été.

¹⁸ Mboone Krist ésaé, avale te, ñwô ô ne mvaé e be Zambe, a nkañesane be bôt.

¹⁹ Nde, e njeñane mam me ne mvaé, a nkômôtane ya kômôtô wua a nyô mbok.

²⁰ Te tyam ésaé Zambe amu ajô bidi. Yaa, jôm ése é ne mfuban . Ve é ne abé ya di, éyoñe ja kolé môte mfe ôbak.

²¹ Jam e ne mvaé e ne na, ô bo te di tit, nge nyu bilam, e ne na a bo jam da kolé monyoñ ôbak.

²² Baʼaleʼe mfaʼa wôé, asu be Zambe, e ndi nleme mbunane wôé wo ve wo. Mevak e be nyô a nji ve émiene mekua asu be Zambe éyoñ a bo mame ya mbunane wé.

²³ Ve môt a di a bili bisô e nlem a bili mekua, amu mboone wé ô nji so ndi nleme ya mbunan. A e jam ese e nji so ndi nleme ya mbunan e ne abé .