BERÔMEÑ 13 - Bible en langue Bulu

Kristen a bejôô bôt

¹ Môt ase a suʼu émiene si e be ba ba jôô. Amu teke éjôé é né, nje é nji so e be Zambe. A e bi bi né, bi ne ntelane wé?

² Ajô te môt a wosane njôô, a kañge ntaʼane mam, aval ane nkômbane Zambe ô né. Avale bôte te da dutu mekua e be bebien.

³ E ne été na, bejôô be nji bo éko woñ éyoñe môt a bo mvaé, ve éyoñe môt a bo abé . Ye wo kômbô bo te mate njô bôt, boʼo ñhe mam me ne mvaé, a wo ye nyoñe meseʼesaʼa mé.

⁴ Amu a ne mbo ésaé Zambe asu mvaé jôé. Ve nge wo bo abé , wôna ko woñ, amu a nji beʼe nkpwaté mekôn ébeʼe beʼe. Aval ane mbo ésaé Zambe, a kun, a liti ayaa e be mbo abé .

⁵ Amu ajô te e ne mvaé ya bo mewôk, saa amu woñe ya meleb étam, ve amu ajô mone môte ya nleme fe.

⁶ Nalé ate mia yaʼane toya . E bôt ba nyoñe nye, be ne nlômane Zambe, asu ya tuʼa bo ésaé te.

⁷ Nde vaʼane môt ase jôm é ne énjé, toya , e be nyô a yiane nyoñe toya, tas, e be nyô a yiane nyoñe tas, woñ, e be nyô ba yiane ko woñ, ésemé, e be nyô a yiane nyoñ ésemé.

Nyeʼan e zañe bobenyañ

⁸ Te biane môte mvôla, vengevenge ve mvôla nyô na mi nyeʼesane mia mia. Amu nyô a nyeʼe môt a ne nye bebé, a jaléya nkômbane ya metiñ ne lut.

⁹ E ne été na, metiñ aval ane: te bo mejian , te wôé môt, te nyamete, a ma mevoʼo mese, ñwômesane ya mese, ô ne éfia jina été na: Wo ye nyeʼe môt a ne wo bebé ane wo nyeʼe womien.

¹⁰ Nyeʼan ô ne te bo môte mfe abé . Ajô te nyeʼan ô ne mboone metiñ ô ne ngum.

Awolo ya vee ôyo

¹¹ Mia yem aval éyoñ avé nde bi ntele di: awolo ya vee ôyo wônan nde di. E ne été na, e môse wu, nyiane wo dañe bia bebé a lôte éyoñ bi nga buni.

¹² Alu e ntoo abui, môse ñwô ô ntoo bebé. Nwuʼane mimboone mi mame me dibi e fé a, e njaane biôme mewosane bi éfufup.

¹³ Nwulaʼane zôsôô , aval ane a môs , saa e mbia ndian a e nsoʼone bilam, saa ébamba a e mbia bivôé, teke mintañete nge aban .

¹⁴ Ve mi jaane Nti Yésus Krist, a te veane miabebien e mame ya minsôñ, amu ajô ya jalé mbia minkômbane mienan.