BERÔMEÑ 12 - Bible en langue Bulu

Mféfé ényiñ e be Krist

¹ Ajô te a bobejañ, ma yeʼelane mia, amu nkoon éngôngole Zambe na, mi ve menyôle menan ane vevee étyiʼa, étyi e ji Zambe a yene mvaé. Nalé ate a ye bo nkañane wônan wo yian.

² Te mia vu si ndôn ya melu ma. Ve boʼone mveñesan, zene ya tyendé ñyemane wônane mfaʼa ya yemelan jé é ne nkômbane Zambe. Nalé nye ane mvaé a nya mvoʼé e mise mé.

³ Amu mvam é nga vebane be ma, ma jô môt ase ya be mia na: A bo te simesan émien a lôte nné, ve simesan aval ane mfefek, te bo énguñ; môt ase aval ane abime mveane Zambe a nga ve nye e né.

⁴ Amu bi ne bibuʼa abui, e nyôle jia été. A bibuʼa bise bi nji bi aval ésaé da.

⁵ Avale te bi ne abui, ve bi too nyôle jia e be Krist. Bi too bibuʼa, jia a ji évok, môt ase ngabe jé.

⁶ A bi bili mvean aval a ne mvam é nga veban e be bia. Ye ô ne wu ya kulu mejô? Belaʼane wô a mbunan.

⁷ Ye môte wua a bili mvean ésaé? A boʼo ésaé. Ye mfe a bili mveane ya yeʼele? A yeʼeleʼe.

⁸ Aval ane mfe, e wu ya leb, a lebek! Nyô a ve a vaʼak a ésôs. Nyô a jôô, a bômbôʼô évevé ya jôô. Nyô a ko bôt éngôngo, a boʼok a mevak.

⁹ Nyeʼan ô boʼo te meduʼan. Mataʼan abé beta mmatan; kabetaʼane mbaa be mam.

¹⁰ Nyeʼane ya bobenyañ ô late mia wua a nyô mbok. Bômbaʼan évévé ya semane mia mia.

¹¹ Boʼone Nti bisaé ayôñ e ne tee njem été, e Nsisim wo kundi été.

¹² Vaʼan e ndi nlem été, jibaʼan e biyoñe bi ôlun, a bo mbane meyeʼelan été.

¹³ Mi volaʼane mimfufup mi ne mebua été, jikaʼa boon anyep.

¹⁴ Botaʼan a te yoʼan.

¹⁵ Vaʼan a ba ba vak, yian a ba ba yi.

¹⁶ Boʼon ôsimesane wua, wua a nyô mbok. Saʼalane beta binyiñ, keʼane minleme mienan e mam me ne si. Te yenane miabebien ane mimfefek.

¹⁷ Te butane môt abé a abé . Bômbaʼan évevé ya bo bôte bese mvaé.

¹⁸ Nge e ne ngule ya bo, aval ane da yiane mia, tabaʼane bôte bese mvoʼé .

¹⁹ Te kunane miabebien a bôte ma nyeʼe, ve jôkaʼan ayaa Zambe e bo ésaé. Amu e ne ntilane na: Akunaʼa e ne éndam, ma ma ye yaʼane bôt, nalé Nti a jô.

²⁰ Ve nge nsiñe wôé a wôʼô zaé, vaʼa nye bidi. Nge a wôʼô évé, vaʼa nye jôme ya nyu. Amu a mboone te, wo kutane nye maʼa me nduan e nlô yôp.

²¹ Te jôʼé na abé e dañe wo, ve dañe abé a mboone mvaé.