BERÔMEÑ 10 - Bible en langue Bulu

Nti Beyude a bikuu

¹ A bobejañ, nkômbane ya nleme wom a meyeʼelan, mfaʼa Zambe bi ne na be nyiñ.

² Amu me ne ngaa na, ba dañe nyeʼe Zambe, ve nyeʼan wop ô nji bo éfufube ya ñyeman été.

³ Amu na, éyoñe be nga dimi zôsôô a so be Zambe, a jeñ éñwobe bebien, be nji suu bebiene si, e be zôsôô a so be Zambe.

⁴ Amu asuʼulane metiñ e ne Krist, nde zôsôô a ye veban e be nyô ase a buni.

⁵ Môze émien, a tili ajô zôsôô a so metiñe na: E môt a ye tôñe nye a ye nyiñ a nye.

⁶ Ve zôsôô a so amu mbunan, a kobô na: Te jô nleme wôé été na za a ye bete yôp? Nalé a ye bo aval ane nge wo zuu Krist si.

⁷ Nge jô na za a ye sis édoʼo si? Da ye bo aval ane nge wo vaa Krist ézezañe miñwuan.

⁸ Ve a jô aya? A jô na: Ajô te e ne wo bebé anyu dôé été a e nleme wôé été. Ajô te e ne ajô mbunan, nde te bia kañete.

⁹ Nge wo mem anyu dôé na, Krist a ne Nti; a nge wo buni e nleme wôé été na, Zambe a nga wômôlô nye miñwuan, wo ye nyiñ.

¹⁰ E ne na; mbunan ya buni e nlem été, wo kee môt e zôsôô été; a mmemane ya mem a anyu, wo kee môt ényiñ été.

¹¹ Amu ntilane wo jô na: Môt ase a buni, nye a ye bo te veban ôson nyô.

¹² Ajô te, nkandan ô nji bo zañe mone Beyude, a mone Grék. Bese be bili Nti wua, nyô a ne abui ésôs, e be ba bese ba loone nye.

¹³ E ne na: Nyô ase a loone jôé Nti a ye nyiñ.

Bese be nji bo mewôk

¹⁴ Nde be nga ye loone nye aya, nge be nji buni nye? A be nga ye buni nye aya, nge be nji wôʼô ajô dé? A be nga ye wôʼô de aya, teke nkatefoé?

¹⁵ A nkatefoé a nga ye kat aya, teke lômban. Amu Ntilan wo jô na: Ngoʼo akaʼa abeñe mebo ya ba ba kañete mbamba mefoé me né.

¹⁶ Ve bese be nji buni Mbamba Foé. Amu Ezayi a jô na, a Nti, za a nga buni foé jangan?

¹⁷ Ajô te mbunane wo so nkatane foé, a nkatane foé ô ne nkañetane ya ajô Krist.

¹⁸ Ma sili na: Ye be nji wôk? Yaa, be nga wôk! Tyiñe jap é nga wôʼé si ése, a mejô map me nga kui mekuʼu ya si nyô.

¹⁹ Nde ma sili na, ye Israél a nji wôk? Môze a tatéya jô na: Ma ye ve mia minlem mi ne aban , e be bôte bese be nji bo ayoñ. Ma ye sômôlô mia mi yaa nsusuʼu ayoñ.

²⁰ A Ezayi a bo ayoʼo ya jô na: Me nga yené e be ba be nji jeñe ma. Me nga liti mamien e be ba be nji sili ma jôm.

²¹ Ve mfaʼa Israél a jô na: Ngume nté môs , me nga sam ayoñ e ne melo a ékange kange mo.