BERÔMEÑ 1 - Bible en langue Bulu

Mebatan

¹ Ma, Paul, mbo ésaé Yésus Krist, nloone ya bo nlôman a ntelan étyi mfaʼa ya kate Mbamba Foé Zambe.

² Mbamba Foé ate, Zambe a nga mane kaʼa nye, anyu bekulu mejô bé, e mimfufube mintilan été,

³ ajô Mone wé, nye ate, mfaʼa minsôn, a nga bialé e mvoñe bôte David.

⁴ Wôna mfaʼa Nsisim, a nga litibane na, a ne mona Zambe, a ngule ya ñwômane wé aso miñwuan, e ne na, Yésus Krist, Nti wongan.

⁵ Amu nye, bi nga nyoñe mvam ya bo nlôman , mfaʼa ya kee meyoñe mese me ne te yeme Zambe e mewôʼô me mbunan été, amu duma dé.

⁶ Mia fe mia lañeban été, amu nloone Yésus Krist a nga loone mia.

⁷ Mvam a mvoʼé bi soʼo e be Zambe Esaa wongan, a be Nti Yésus Krist, bi tabeʼe be ba bese Zambe a nyeʼe be nee Rôm a e be mimfufup amu nloone Zambe.

Paul A nyeʼe bebuni ya Rôm

⁸ Ma taté ve Zambe wom akéva amu Yésus Krist, ajô mia bese. Nalé, amu foé ja katebane vôm ase si nyô na, mia buni.

⁹ Amu Zambe ma bo ésaé ya kate Mbamba Foé Mone wé, a ne me ngaa. Ma simesane mia biyoñ bise e meyeʼelane mam été,

¹⁰ me siliʼi nye te tek, aval ane nkômbane wé na, me bi éyoñe ya zu e be mia.

¹¹ E ne bebela na, me bili beta nkômbane ya yene mia, ane me ne kalane mia mvean éziñe ya Nsisim, mfaʼa ya yeme ngul e mbunan été;

¹² nge na, ane mi ne volebane minlem, bia be mia, e vôme mi to a zene ya mbunan ô nga vebane be bia bese fufulu, éñwom a éñwônan mibaane.

¹³ A bobejañ, ma yi mi yeme na, me jaéya vañe biyoñ abui na, me zu e be mia. Ve a zu kui e môse wu, teke ngule ya bo nalé. Me yi na, me bi bibuma ya Nsisim e zañe jenan, aval ane me tameya bi e be meyoñe bikuu.

¹⁴ Amu me bili mvôla e be Begrék a e be bilobelobô, e be bedimi mam, a e be beyeme mam.

¹⁵ Nalé ate nye ñhe a ne nkômbane wome na, me kate fe mia Mbamba Foé, mia mi too Rôm.

¹⁶ Amu me nji wôʼô Mbamba Foé ôson, amu a ne ngule Zambe, mfaʼa nyiane ya môt ase a buni, ôsusua Beyude, wôna Begrék.

¹⁷ E be nye, zôsôô éziñ ya Zambe a yené été, ataté e mbunan a suʼulane mbunan; ane e ne ntilane na: Nyô a ne zôsôô amu mbunan, a ye nyiñ.

E bebela a bi bôte minkôm

¹⁸ E ne na: Zambe a liti ayaa dé e soʼo yôp, e mfaʼa ya abé ese, a ékotekot ése ya bôt, mbe bete ba kame bebela na a yené.

¹⁹ Amu e jame be ne yeme mfaʼa Zambe, e ne be ne ngeññ, amu a nji ke be de solé.

²⁰ Amu aso ntéane ya si nyô, miñyeman mi Zambe mia dañ, mis me ne te yen, e ngule jé ya nnôm éto a éto jé ane Zambe, bia yené e biôme a nga té été. Ajô te be nji bi éfia ya kaleban je.

²¹ Amu zene nyôna na, be yeme Zambe, ve te ve nye akéva da yiane nye. Ve be nga viane jañ e mbia be asimesane bap été, a minleme miap ya te fek mi nga ku dibi été.

²² E nduʼane bebiene na be ne fek, be nga viane suʼulane bo mekut.

²³ Be nga folan étôtoʼo Zambe a ne te tyendé a biveʼela bi môt a tyendé, bi anon, bi betit ba wulu a mebo menyin, a bi betite ba woñ.

²⁴ Ajô te Zambe a nga suu be e mezene me mbia minkômbane ya minleme miap, e mame ya mvin, mme mete ba ve menyôle map bebien ôson.

²⁵ Be nga folane benya mejôô me Zambe a minsos, a viane kañe mintéane mi biôm, ve te kañe nté biôm émien, e nyô a nee ébotane nnôm éto, amén .

²⁶ Ajô te Zambe a nga liʼi be e mboone mbia minkômbane mi ôson été. Avale ya na, binga bap be nga tyendé mboone ya abialé, ntabane befam a binga, a bo mboon ô ne te yian abialé bôt.

²⁷ Befame fe avale da, be liʼi mfulaʼan ya fulane binga, be nga jaé ayôñe minleme ya kômbô fulane beebe, nselaʼane a abialé bôt, a bo mame me ne ôson e zañe jap a suʼulane nyoñe maʼane me nkobane zene wop.

²⁸ A, mbôle be nga bo te yene mvaé ya baʼale ñyemane wo so be Zambe, Zambe a nga liʼi be e ñyemane ya te fek été, amu ajô te be nga bo mam be nji yiane bo.

²⁹ Be ne njalan a ékotekot mevale mese, e ne na: Mbia be mam, mboon éngôngôt, mbia minlem, miñyamete, ñwôane bôt, ntañete, meduʼan, asum, mfuk,

³⁰ besiñe Zambe, beté ntañete, mebun, ngunguan, atyeñ e mboon abé , ébiasé e be bebiaé bap,

³¹ mekut, betyame bilat, teke minlem, tee nkoon éngôngol.

³² Akôsa bo na ba yeme ntyiʼane Zambe wo liti na, e ba ba bo avale mame te, ba yiane wu, be nji bo me ve mboon étam, ve ba kale ba ba bo me.