Am 9 - Bible en langue Bulu

Ñyenan wo suʼulan. Ayaa da suʼulan

¹ Me nga yene Nti a tele fefele ataʼa metunaʼa. Ane a nga jô na: bibiʼi e beyôme mekône yôp, nalé bibôñaʼa bia ye koé; nyoñe bibôñaʼa bite a bibi be bie bese minlô. Ma ye bo na mvoñe bôte jap é jañ a nkpwaté mekôn. Nyô ase ya be be a ye kômbô tup, a ye bo te ngu, a teke wua ya be be a ye nyiñ.

² Toʼo ba ke sobô vôme ya miñwuan, wo wom wo ye vaa be wé; toʼo ba bete yôp, ba ye silibane si.

³ Toʼo ba ke sobô abôbône nkôle Karmel yôp, ma ye ke jeñe be wé a bi be; toʼo ba wondé e mise mam a ke sobô e mañ été, ma ye bendé nyo é lôbe be.

⁴ Nge besiñ bap ba kee be minkôm, ma ye bendé nkpwaté mekôn ô wôé be. Ma ye fombô be mfombane abé , sa wu mvaé.

⁵ Nti Nyô a ne Nti minsamba mewosan, nyô a nnambe si je ve buʼulan, bôte bese be too été be ntoo e beta ôlun été; si éte ése ja vus, ane vôme Nil a kui ndôn, a ja beta sis, ane ôsôé ya Ejipte.

⁶ A nga lôñ étabaʼa jé e yôp, a telé ñyem e yôp; a kôane mendime ya mañ, a mialane me si: jôé dé e ne Nti.

⁷ Ye mi nji funane bobefame ya Etiôpi e mfaʼa wom, a bon be Israél? Nalé Nti a jô, ye me nji vaa Israél si ya Ejipte, ane Befilisteñ ya Kaftor a Besirieñ ya Kir?

⁸ Ô lôô Nti Nyô a ne Nti a fombô ayoñ e ne mekua. Ma ye jiane de e si nyô.

⁹ Ve ma ye bo te jiane nda bôte Yakob ése, nalé Nti a jô: amu ô lôô, ma ye ve mebendé mam, a belane meyoñ mese mfaʼa ya sôʼôsane nda bôt Israél, ane môt a belan éseʼese, jôm éziñ teke ku si.

¹⁰ Bebo abé bese ya ayoñe dam, ba ye wu a nkpwaté mekôn, mbe ba jô na: njuk wo ye bo te subu bebé, a wo ye bo te kañese na: njuʼu te ô kui a nnambe bia.

Ngakaʼa Nkômane mam

¹¹ Môs ôte, ma ye bete ébeme David ja ndeñetan, a mane kôme mevôm mese me ne ntuan été; mevôm mese me nga mane tyamban, ma ye bete me si, a beta lôñ ébeme te, ane é mbe melu mvus.

¹² Ane ba ye nyoñe mebukaʼa ya nda bôt Edom, a ma ya ba meyoñ ase, vôm be nga loone jôé dam, nalé Nti a jô, nyô a tôé mam mana mese.

¹³ Ô lôô melu ma zu, nalé Nti a jô, mme nyô a faʼa si, a ye wulu nyô a kôane mvoñ e fefe, a nyô a miate bibuma bi rézeñ, a ye wulu nyô a miase mvoñ e fefe. Melu mete, mendime bibuma, ma ye lôt me soo minkôle yôp, nalé fe minkôle mise, mia ye jôʼé mendim bibuma map me lôt.

¹⁴ Ma ye beta soo minkôm ya ayoñe dam Israél: ba ye beta lôñe bitison bi nga mane tyamban, a ba ye tabe bie. Ba ye bé mefube mindiʼi mi woon, a nyu woon ya été. Ba ye bé mefup a di bidi bia ye yô été.

¹⁵ Ma ye beta tooé be e si jap, a ba ye bo te beta kôlô été: si, nyô me nga ve be, nalé Nti Nyô a ne Nti, e Zambe wôé, a jô!