Am 5 - Bible en langue Bulu

Nkulu mejô a yôn ajô Israél

¹ Vôʼôlaʼan ajô di ma yiane tot e too abé mfaʼa wônan, ñyôn a nda bôt Israél!

² Israél a kuya avalʼane édune ngone minga, aa ye fe kôlô si: e nye le a ne étam kayale e si jé ébien, a teke môt a ye bete nye si.

³ Amu avale di Nti a jô ajô nda bôt Israél na: nkane bita, bôte toyini ya bitison binyin wo ye ke wosane bie, ntete bôt étam ñwô wo ye so mvoʼé; a nkane bita ya tisone fe, bôte ntet, ba ye ke wosan, awôm étam nde da ye bulane mvoʼé .

⁴ Mejô Nti a jô nda bôt Israél mme ma na: bulaʼane be ma, éyoñe te mia ye nyiñ.

⁵ Te jeñane ma Bétél, te keane Gilgal, te silikane Birséba: amu bôte ya Gilgal ba ye ke minkôm a asuʼulane ya Bétél e ne bidim.

⁶ Bulaʼan e be Nti, nalé mia ye nyiñ; nalé momo, wôna a ye kute nduan e nda bôte Yôsep été, nje ja ye diʼi a teke môt a ye dime je a kamane Bétél.

⁷ Mia mia veñesane nya ntyiʼane mejôô a bo élok é ne ayô anʼôvuta, a sôʼôlô bôt be ne zôsôô si.

⁸ Nyô a nga bo ateté ya Oyôn a di ya ésep, nyô a kôñelan afibe dibi e bo éfufube môs , a môs ô bo alu, nyô a nyôñe mendim e mañ a sôé me me mialan si: Jôé dé e ne Nti.

⁹ A ve ngungule môte na be sa wô a nsaane biôm wo nyiin e tison é bili ôlem a ngul ése.

¹⁰ Bôt ba siñe nyô ase a wosan ékotekot aba mejô, nalé fe nyô ase a kobô bebela e nlame nlam été.

¹¹ Ajô te, amu mi maneya kpweʼele nzôzoé a wube nye mvoñe jé, mi maneya lôñe menda mekok me ne mbaan, ve mia ye bo te tabe été; mi maneya bé mbamba mefube me ndiʼi woon, ve mia ye bo te nyu woon ya été.

¹² Amu ma yeme na mimboone mienan mia dañ abé mi ne abui, a abé denan étua anen, mia mia kpweʼele bezôsôô be bôt, a nyoñ éboteze, a bo na bingôngole bi bôt bi bo te kabe e vôme ba tyiʼi mejô e mbé akaʼa ya nlam.

¹³ Ajô te bezôsôô be bôt mia vini a siñ, ba tabe évô avale biyoñe te, amu bi ne mbia biyoñ.

¹⁴ Jeñane mvaé, sa abé , ndemben mia ye nyiñ, a nalé ate Nti, Zambe ya minsamba mewosan, a ye tabe be mia avale mia jô.

¹⁵ Vinaʼan abé , nyekaʼane mvaé; mbé akaʼa ya ba kobô mejô, boʼone na zôsôô nye a kabe: ndôʼôtô na, éyoñe te Nti, Zambe minsamba mewosan, a ye ko mebukaʼa ya nda bôte Yôsep éngôngo.

¹⁶ Amu mam mana mese, Nti, Zambe minsamba mewosan, Nti a jô na: miñyôn mia ye boban mevôm ba semé na: huii! Ba ye loone bôt ba bo ésaé mefup na be fulan a bôte bevok ôlun été, a loone fe bôt be bili ñyôn ane ngum asu ésaé na be yôn.

¹⁷ Eyoñe ma ye lôt ézezañe jôé, nalé Nti a jô, miñyôn mia ye bo e mefube me ndiʼi woon mese.

Môse Nti

¹⁸ Bidim a bôt ba nyamete môse Nti! Jé mia yange na ja ye bo e môse Nti? Amu mfaʼa wônan, môs ôte wo ye bo wu afibe dibi, sa ñhe éfufup.

¹⁹ (Môs ôte) wo ye funan ane môt a tube ngbwengbwem, éyoñe te Urs a viane tôbane nye; nge na ane môt a nyiin e nda jé été, a beté wo mfin, éyoñe te nyo ja viane lôbe nye.

²⁰ Ye a se nalé na, môse Nti wo ye soo afibe dibi, saa ñhe éfufup, ye a se nalé na wo ye bo ékukut, teke faé?

²¹ Ma siñ a biasé mebôʼô menan; bensulaʼane benan be mam me Zambe, me nji beta kômbô be.

²² Eyoñe mia ve ma mimvean ba diʼi ngumba e nduan, a mimveane mevoñ, teke mvaé éziñ ma yen été. Me nji fombô fombô biyem bi ne avoñ mia soo ma bie ane mimvean asu nlatane ngbwa.

²³ Kelanʼéduñe bia bienan ôyap, a me nji kômbô beta wôʼô tyiñe ya memvete menan.

²⁴ Jame ma kômbô é ne na: nya ntyiʼane mejô a lôt ane mendim, a zôsôô ane nlôtʼôsôé a se nguleya vele.

²⁵ Nté mimbu mewôm menyin, me nga wulu mia nkôte si, ye mi nga tyiʼi ma biyem a ve ma mimvean a nda bôt Israél?

²⁶ A éyoñe te, ye mi nga beʼe mendem me zambe njô bôte wônan Sakut a zambe oteté wônan Kévan ane mia bo môse wu, e biôme miabebien mi nga ba? Mia yeme bebela na mi nji tame bo nalé.

²⁷ Ajô te ma ye kee mia minkôm, mi koléʼé Damas abo si, nalé Nti a jô, jôé dé é ne Zambe ya minsamba mewosan.