Am 4 - Bible en langue Bulu

Mewosan ma tôñe minkukum mi binga

¹ Vôʼôlaʼan ajô di, mia bimvumvut bi binga ya Samari; mia mia tibili bingôngole bi bôt, a koʼotô mimbubua, a mia jô benyô beyôm, môt ase na: zaʼa jôme ya nyu, a e nyaʼak.

² Nti nyô a ne Nti a maneya kane ngana e be émien a étyi jé yôbe na: ô lôô, ma zuu abé mfaʼa wônan: ba ye ke ba feneke mia a mintoñ bityé, a môt ase a ye funan ane kos é tii nnop.

³ Ba ye tulane môt ase ya be mia abé mfine dé ya akaʼa e ne nlam, a mia ye wua miabebien Hermon été, Nalé Nti a jô.

Israél a bene kôñelan nlem

⁴ Zaʼan Bétél a boʼon abé; kelan Gilgal a dañe dañe bo abé . Zaʼan betit benan ba yiane tyiʼiban metyé mese, nalé fe mengab awômô menan môse milal mise.

⁵ Boʼone mimveane mienane ya mvean akéva a jôme ja vusu fembé, a yôtaʼan foé mimvean mia ve ane nlem wo kômbô amu e jam mia nyeʼe nde le, mia bone bʼIsraél, Nalé Nti a jô.

⁶ A ma me lômeya mia mfumbale zaé e bitisone bienane bise été: njembane fembé e menda menan mese: vʼakôsa bo nalé, mi nji bulan e be ma, Nalé Nti a jô.

⁷ A ma me nga bene noo mia mveñ ngon éla ôsu, te na nkôane bidi ô kpwaan; me nga noo mveñ e tisone nyô, a boo te noo je e tisone fok; mveñ é nga noñ afube di, a afube mveñ é nji noñ e nga mane kôt.

⁸ Bitisone bilaa bi nga ke jeñe mendime ya nyu e be nyô fok: ve évé jap é nji man: akôsa bo nalé, mi nji bulan e be ma, nalé Nti a jô.

⁹ Me nga bibi mia a mieñgele a fos; abui mefube denan, ma me ne ndik wo ve woon, befigié a be olivié benan, me nga bo na zas é mane di bie: ve akôsa bo nalé, mi nji bulane be ma, Nalé Nti a jô.

¹⁰ Me nga lôme bim a jiane biyeme bienan avale me nga bo bôte ya Ejipte. Me nga bo na bisoé bendôman bienan bi mane wu bita a ve bikabela bienan e mo besiñe benan. E minkane mienan été, me nga bo na môé menan me jaé ne lut a ényume bibole mimbim: vʼakôsa bo nalé, mi nji bulan a be ma, nalé Nti a jô.

¹¹ Me nga bo mia mi tek, te fe ngule nyô, avalʼane éyoñe Zambe a nga jiane Sodom a Gômor. Ve me nga nyii fe bevoʼo ya be mia ane vôme ba vaa ésiʼi e mbume nduan été: akôsa bo nalé, mi nji bulan e be ma, nalé Nti a jô.

¹² Ajô te, a Israél, nne ma ye bo wo nalé; a amu ma ye bo wo nalé, kômesaʼane tôbane Zambe wôé, a Israél.

¹³ Amu, ô lôô, nyô a nga bo minkô a té évuñulu, a bo môte na a yem asimesan dé, nyô a tyendé éfufube tyé é bo dibi, a a wulu yôbe ya mevôm me ne mbetan: jôé dé é ne na Nti, Zambe minsamba mewosan.