Am 1 - Bible en langue Bulu

Nkulan mejô wo wosan Damas, Tir, Edom, Amon, Môab; wu wo wosan Yuda a Israél

¹ Minkulan mejô Amôs, a mbe wua ya bebii mimbam biyem ya Tison Tekôa, mmie mi nga litiban e be nye me wosaʼan Israél, melu Ozias a nga too njô bôte ya Yuda a melu Yérôbôam, mone Yôaz, a nga too njô bôte ya Israél, mimbu mibaé ôsu, mfôʼôsane si ô ngenane te boban.

² Ane a nga jô na: mvam ayoʼo Nti ja so Sioñ yôp, a tyiñe jé ja wôʼé é soʼo Yérusalém. Amu ajô te, mevôm mimbam biyem mia di a ne e beta ôlun été, a abôbône karmel é maneya kôt.

³ Avale di Nti a jô na: amu bôte ya Damas be boya abé da dañ biyoñ bilaa, binyin, ma ye bo te bulan ayaa dame mvus: amu be nga tibi bôte ya Galad yôp a mintoñ bityé ba tyaʼa mie bidi:

⁴ ma ye lôme nduan é diʼi nda njô bôt Azaél, a ja ye kôñelane biwôlô menda me njô bôt Ben-Adad asup:

⁵ a ma ye buʼu ôlé étyé wo dipe mbé akaʼa ya Damas a jiane bôt be too mbiʼili Aven, a nyô a bili ntum éjôé ya nda njô bôt Eden, a ba ye kee bôte ya Siri minkôm e si ya Kir, nalé Nti a jô.

⁶ Avale di Nti a jô na: amu bôte ya tisone Gaza be boya abé da dañ biyoñ bilaa, binyin, ma ye bo te bulan ayaa dame mvus: amu be nga kee mingumba minsamba mi bôte minkôm e be bôte ya Edom.

⁷ Ma ye lôme nduan é diʼi mekaʼa ya tisone Gaza, a bo beta biwôlô menda ya été ve asup.

⁸ Ma ye jiane bôte bese ya tison Asdôd, a nyô a bili ntum éjôé ya tison Askalôn, a wo wom wo ye ke tison Ekroñ e ngame yat, a mebukaʼa ya Befilisteñ (éyoñ ayaa dam e lôteya) ma ye jañ, nalé Nti nyô a ne Nti a jô.

⁹ Avale di Nti a jô na: amu bôte ya tisone Tir be boya abé da dañ biyoñ bilaa, binyin, ma ye bo te bulan ayaa dame mvus: amu be nga kuane mingumba minsamba minkôm e be bôte ya Edom, teke simesan élat e zañe bobenyañ.

¹⁰ Ajô te ma ye lôme nduan é diʼi mekaʼa ya tisone Tir a bo biwôlô menda ya été vʼasup.

¹¹ Avale di Nti a jô na: amu Edom a boya abé da dañ biyoñ bilaa, binyin, ma ye bo te bulan ayaa dame mvus: amu a nga titan monyañ wé Israél a nkpwaté mekôn, teke éngôngol ébiene nlem; ayaa dé da nyabe bifus melu mese, a a baʼale de nnôm éto.

¹² Ajô te ma ye lôme nduan é diʼi Téman, a nduan éte ja ye bo biwôlô menda ya Bôtsra asub asup.

¹³ Avale di Nti a jô na: amu bon bʼAmon be boya abé da dañ biyoñ bilaa, binyin, ma ye bo te bulan ayaa dame mvus: amu éyoñ be nga kômbô nene si jap a bita, be nga kui vôme ya sale mebum me binga ya Galad be mbe mebum.

¹⁴ Ajô te ma ye diʼi mekaʼa ya Raba a nduan; nduan éte ja ye diʼi biwôlô menda mé a ayaa dam da ye yené môse bita e beta évuñulu été, a môse ôlendé, ézezañe beta ôkôs été.

¹⁵ Njô bôt wop a ye ke minkôm ba be bivete bié nsamba wua, nalé Nti a jô.