Ag 2 - Bible en langue Bulu

Nti a ve belôñe nda Zambe baa ngule nyôl

¹ E ngone zamgbwale é too melu mewôm mebaé a da, Nti a nga kobô anyu nkulu mejô Agé na:

² Kobôʼô Zôrôbabél e mone Séaltiél, ngovina ya Yuda, a Yasua e mone Yôsadak, ntuni nnen, a bôte bevoʼo yʼayoñ, a jô be na:

³ za ya be mia a nga yene nda nyô éyoñ é nga too abeñ yʼôsusua? A éyoñe ji mi lôô je aya? Ye é nji yené ane zesé jôm e mise menan?

⁴ Eyoñe ji a Zôrôbabél, boʼo ngu, nalé Nti a jô. Boʼo ngu a Yasua, e mone Yôsadak, ntuni nnen, boʼone ngu, a bôte ya si nyôna ése! Nalé Nti a jô, a boʼon ésaé! Amu me ne be mia, nalé Nti a ne Ngul ése a jô.

⁵ Te koone woñ! Mi simesaʼane nkobô me nga kobô mia, éyoñ mi nga kôlô Ejipte, a Nsisime wom ô nʼézezañe jenan;

⁶ amu avale di nde Nti a ne Ngul ése a kobô na: éyoñ éfe jia, anaʼana, ma ye kpwé yôp a si, mañ a si ba telé mebo.

⁷ Ma ye kpwé meyoñ mese. Biôme bôt be ne kômbô mevale mese bia ye so. A ma ye jalé nda nyô a étôtok, nalé Nti a ne Ngul ése a jô.

⁸ Argent a nʼéñwom, a or a nʼéñwom, nalé Nti a ne Ngul ése a jô.

⁹ Etôtoʼo ya nda baa nyô, ja ye dañe ji ya nda yʼôsu, nalé Nti a ne Ngul ése a jô; a e vôme nyô nye ma ye ve mvoʼé , nalé Nti a ne Ngul ése a jô.

Ngakaʼa bibotan

¹⁰ Mbu baa Darius a nga jôô, e ngon ébulu é too melu mewôm mebaé a menyin, Nti a nga kobô nkulu mejô Agé na:

¹¹ Avale di nde Nti a ne Ngul ése a kobô na: siliʼi betuni nyeʼelan ajô te na:

¹² nge môt éziñ a beʼe tit é nʼétyi akuʼu éwomane dé ya si, a akuʼu te da nnambe belet, bidi, woon, mbon nge adi afe éziñ, ye jôme te ja ye bo étyi? Betuni be nga yalane na: momo!

¹³ Agé na: nge môt éziñ a ntoo te mfuban amu nnambane mbim, a nge a nnambe biôme bite bise, ye bia ye bo te mfuban ? Betuni be nga yalane na: bia ye bo te mfuban .

¹⁴ Eyoñe te Agé a beta kobô a jô na: avale di nde bôte ba be né avale te nde ayoñe di e né asu dam, nalé Nti a jô, nde mimboone mise ya mo map mi né; jôme ba ve ma le é ne mvin.

¹⁵ Ajô te fasan éyoñe ji, mfaʼa ya jam da zu boban ataté den a ke ôsu, te na be beté akoʼo di avoʼo yôp e nda Zambe Nti,

¹⁶ jé é nga boban? Eyoñe môt a nga ke angune dé na a biete biate bi fône mewôm mebaé, a nga koone ve biat awôm; éyoñ a nga ke e kase na a biete lita woone mewôm metan, a nga koone ve mewôm mebaé.

¹⁷ Me nga mane ndamane bibuma yʼésaé jenan: me nga bo na bidi mia bé bi kôt nge boé e minkuʼu bilé, me nga bo na metaʼa me ku, ve mi nji bulane be ma Nti.

¹⁸ Tukaʼa fombane jam da ye boban ataté môse wu. E môse wu, ñwô be maneya bôôé mbôkaʼa ya nda Zambe, e ngon ébulu, e too melu mewôm mebaé a menyin, Tukaʼa baʼalane jame te.

¹⁹ Nga fôn é maneya mengun? Mindiʼi mi woon, befigié, begrenadié a beôlivié be nji wume jôm. Vʼataté den ma zu sôôé mia bibotane biam.

Mengakaʼa asu Zôrôbabél, nyô Nti a nga top

²⁰ Môse te ôbien, ngon é too melu mewôm mebaé a menyin, Nti a nga kobô Agé éyoñe baa.

²¹ A nga sili nye a kobô Zôrôbabél, ngovina ya Yuda, e mone Sealtiél na: Ma, Nti yʼémo, ma ye kpwé yôp a si.

²² Ma zu kpwé bejô bôt a mane ngule ya bijôé ya si; ma ye bo na bevagoñ be ku a bôte ba wulu be, bikabela bia ye wu, a bewulu bikabela ba ye wôan e zañe jap.

²³ Ve môs ôte ma ye ve wo ésaé, wo Zôrôbabél, ô ne mbo ésaé wom. Wo ye bo ma édima, vʼane sitame jame mamien, amu wo me tobeya señe jam. Jam ma jô nde le, ma, Nti yʼémo.