Ag 1 - Bible en langue Bulu

Eyoñe ya beta lôñe nda Zambe

¹ Mbu baa Darius a nga jôô, valé ngone saman é too alu da, Nti a nga kobô nkulu mejô Agé. A nga bendé nye na a kate Zôrôbabél, ngovina ya Yuda, e mone Séaltiél a Yasua, ntuni nnen, e mone Yôsadak na:

² avale di nde Nti a ne ngul ése a jô na: ayoñe di da jô na éyoñ é ngenane te kpwaan, éyoñe nda Nti ja yiane beta lôñeban.

³ Ane Nti a nga kobô be anyu nkulu mejô Agé na:

⁴ ye e ne mvaé na mi tabe abeñe menda éyoñe nda jam é ne ntyaman?

⁵ Nde éyoñe ji Nti a jô na: fasane mboone wônan!

⁶ Mi béya abui, ve mi kôaneya tyôtyoé. Mia di ve teke jaé. Mia nyu, ve teke jaé. Mia jaé ngômesan ve teke wôʼayôñe nyô; mbo ésaé a nyoñe maʼane mé, ve ma ku e mfek ô ne ntuan.

⁷ Nti a ne Ngul ése a jô na: fasane mboone wônan!

⁸ Betane nkôl, Zaʼane bilé a lôñe nda : ma ye yene je mvaé a ma ye nyoñe duma, nalé Nti a jô.

⁹ Mi nga yange abui bidi, ve tame yenan abime tyôtyoé mi kôaneya. Abime mi nga zuu de menda menan, me maneya mialane de a mvebe wom. Amu jé? Nalé Nti a ne Ngul ése a jô? Amu nda jam é ne ntyaman, ve môt ase ya be mia ki a boʼo vʼésaé ya nda jé.

¹⁰ Ajô te yôp da kame mia meloʼo mé, a bidi biziñ teke fe faa.

¹¹ Me kuliya mfum e si jenan a minkô, e fôn, e mfefé woon, e mbon, e mfaʼa ya jôm ése ja faa si, e bôt a betit a ésaé ése mo menan ma bo.

¹² Ane Zôrôbabél e mone Séaltiél, Yasua ntuni Nnen, e mone Yôsadak a e bôte bevoʼo bese yʼayoñ be nga bo tyiñe Nti, e Zambe wobe mewôk, avalʼane mejô nkulu mejô Agé a nga kobô me mbe, avale fe ane nlômane Nti, e Zambe wop, a nga lôme nye ô mbe; a bôte bese be nga ko woñ asu Nti.

¹³ Nde Agé, nlôman Nti, a nga jô bôt avalʼane foé Nti é mbe na: ma me ne be mia, nalé Nti a jô.

¹⁴ Ane Nti a nga vele nsisime Zôrôbabél, e mone Séaltiél, ngovina ya Yuda ôyo, nalé fe nsisime Yasua, e mone Yôsadak, ntuni nnen a nsisime bôte bevoʼo yʼayoñ. Nde be nga zu bo ésaé e nda Nti a ne Ngul ése, e Zambe wop,

¹⁵ e mbu baa njô bôte Darius a nga jôô, ngone saman é too melu mewôm mebaé a menyin.