ABDIAS 1 - Bible en langue Bulu

Nkulane mejô asu Edom

¹ Nyenane Abdias. Avale di nde Zambe, Nyô a ne Nti, a kobô Edom: bi nyoñeya foé é soʼo be Nti, nlôman ô lômbaneya be meyoñ : kôlaʼane si! Nkôlaʼane si, bi tebe Edom e ngame yat, asu ya wosane nye!

² Tame yen, me boya wo tyôtyoé meyoñ été, o ntoo jôme ékpweʼele ja dañ.

³ Mebune ya nleme wôé me duʼuya wo, wo ô too e mimbane ya mekoʼo été, wo étabaʼa jôé é ne mbetane yôp, a jô womiene na: za a ye sili ma a kui si?

⁴ Toʼo wo bete yôp ane ndôé, toʼo dumbaʼa dôé e ne nlôñan e vôm ateté e né, ma ye koé wo wé, nalé Nti a jô.

⁵ Nge miñwuwup, besa biôm yʼalu, ba zu be wo, tame yen ane wo ye liʼi teke jôm! Ye ba ye bo te wube jôm ja volô be? Nge bekolé bibuma bi ndik ba zu be wo, ye ba ye liʼi jôm éfe, vengevenge ve bisañeté bibuma?

⁶ Ngoʼo Esô, be maneya tyase nye! Be maneya kulane mesoé mé mese!

⁷ Bôt ba be be be nga bo élat be maneya tindi nye a kui nné si. Be nga duʼu nye, bemvôé bôé be dañeya wo. Be nga belane bidi biôé asu dôé anʼôlam; ba jô na: fek é ne nye momo!

⁸ Ye sa môs ôte, nalé Nti a jô, ñwô ma ye vaa Mimfefeʼe yʼEdom, a vaa ñyeman e nkôl Esô?

⁹ Biwôlô bi bôte biôé, a Téman, bia ye kumetane minlem, nalé ate ba ye vaa môt ase nkôl Edom, amu mewôé me bôt!

¹⁰ Amu abé ô nga bo monyoñ Yakob, ôson wo ye jaé wo nyô. a ba ye jiane wo nnôm éto,

¹¹ e môs ô nga tele asu dé e môse bôte befe be nga kee nkane mewosane wé minkôm, éyoñe bikuu bi nga nyiine mimbé mié, a do Yérusalém abia, wo fe ô mbe ane wua ya be be.

¹² Te fombô môse monyoñ, môse bidime wé. Te vak ajô bone be Yuda, môse ba bube mo nduan, te kui anyu ne ndama e môse yʼôlun!

¹³ Te nyiin e bitisone bi bôte bam, e môse ba tôbane mbia jam, a wo fe te fombô bidime biap e môse ba tôbane mbia jam, a te nnambe akume dap e môse ba tôbane mbia jam.

¹⁴ Te tebe maʼane me zen a wôé bôte ba tup, nge koñe bôt ba nyiñ môse yʼôlun!

¹⁵ Amu môse Nti ô ntoo bebé asu meyoñe mese; aval ô nga bo, nde ba ye bo wo. Maʼane môé ma ye ku e nlô wôé yôp.

¹⁶ Avale mi nga nyu e nkôle wom ô nʼétyi yôp, avale te meyoñ mese ma ye nyu tekʼawoʼon, ba ye nyu a min, ba ye bo ane nge be nji tame veebe.

Akunaʼa Israél

¹⁷ Ve ba ba nyiñ ba ye bo nkôle Siôn, ba ye bo étyi, a nda Yakob ja ye beta nyoñe biôme bié.

¹⁸ Nda Yakob ja ye bo nduan a nyô Yôsep ki nkabaʼa nduan; ve nda Esô ja ye bo mimbop nje nda Yakob a nyô Yôsep ba ye diʼi; teke môt éziñ a ye nyiñ e nda Esô, amu Nti a kobôya.

¹⁹ Ba ya Négéb ba ye nyoñe nkôle Esô, ba ya Séféla ki si Befilisteñ; ba ye nyoñe fé Efrayim a fé ya Samari; Bényamin a ye nyoñe Galad

²⁰ bekee minkôm, nkane mewosane bone bʼIsraél, ba ye nyoñe si Bekananééñ a kui Sarépta, a bekee minkôme ya Yérusalém be ne Séfarad ba ye nyoñe bitisone ya Négéb.

²¹ Bekôté bôt ba ye bete nkôle Siôn, asu ya tyiʼi nkôl Esô mejô; a njôan wo ye bo wu Nti.