2 Tim 4 - Bible en langue Bulu

Kate Mbamba foé

¹ Ma bendé wo a jôé Zambe, di Krist Yésus a ye zu tyiʼi bevevee a miñwuan mejô, amu ñyenane wé a éjôé jé na:

² kobôʼô ajô Zambe, vaʼa ngu, éyoñ ja yian, a ji é ne te yian! Komekaʼan a yaa bôt, lebek, éyoñ ése e njiban été, a e nkômbane ya yeʼele été.

³ Amu éyoñ ja ye zu, e too bebela na, bôt ba ye bo te jibi mbamba miñyeʼelan. Ve aval ane minkômbane miap mibien mi né, a ngômelane ya melo map, ba ye bômane bebien a jama beyeʼele.

⁴ Ba ye vaa melo map e ñwôʼane benya mejôô, a vôʼôlô minkana.

⁵ Ve wo, jôʼô womien e mfaʼa mame mese. Jibiʼi mintaé, boʼo ésaé nkatefoé, jaléʼé ésaé jôé.

Eyoñe nkôlane Paul

⁶ Mfaʼa wom me ne mbon ba sôé étyiʼa nyô. Eyoñ akôlô dam é kpwaneya.

⁷ Me maneya wosan abeñe mewosan. Me sondôya mmatane mbil. Me baʼaleya mbunan.

⁸ Ataté éyoñe ji, ékate zôsôô é ne me mbaʼalan, nje Nti, zôsôô Ntyiʼi mejô a ye ve ma môs ôte. A saa ve ma étam, nalé fe ba bese ba ye nyeʼe e nsoone wé.

Mebendé ma suʼulan

⁹ Jeñe zen ése ya jiʼa zu koone ma.

¹⁰ Amu Démas a liʼiya ma, amu nyeʼane mame ya émo ji. A keya Tésalônik, Krésens ke e Galati, Tite ke Dalmati.

¹¹ Luk étam nye bia nye bi né. Nyoñe Mark nsamba wôé éyoñe wo zu, amu a ne ma mfi ésaé été.

¹² Me lômeya Tisik Eféze.

¹³ Alôʼô me nga liʼi Trôas e ndaa Karpôs, ô zaʼa de éyoñe wo zu, a bekalate, a dañedañ ba be ne mvulekan.

¹⁴ Alékzandre, nlui melui, a nga bo ma abé abui. Nti a ye yaʼane nye aval ane mimboone mié mi né.

¹⁵ Wo fe tabeʼe nye ntyel, amu a wosane mejô mangan mbia ñwosan.

¹⁶ Teke môt a nga too ma fefe, éyoñ ôsu me nga kat ajô dam, bese be nga liʼi ma. Ve da, dili e boʼo te lañebane be ane jam.

¹⁷ Ve Nti a nga volô ma. A nga ve ma ngu, ajô te Mbamba Foé a ye kateban, a wôʼôban e be bikule bise aa ma. A me nga kôtéban anyu ngbwengbwem.

¹⁸ Nti a ye kôté ma mfaʼa mbia mboon ase a nyii ma asu éjôé jé ya yôp. Duma e boʼo be nye nnôm éto a nnôm éto. Amen!

Mebatan ma suʼulan

¹⁹ Bataʼane ma Priska a Akilas, nalé fe nda bôte Onésifor.

²⁰ Eraste a nga liʼi Korént. Me nga liʼi Trôfime a Konôk e Milé.

²¹ Jeñe zen ése ya zu éyoñ ôyôn ô ngenane te taté. Ebule, Pudéns, Lin, Klôdia a bobejañ bese ba batane wo.

²² Nti a tabeʼe a Nsisime wôé. Mvam é boʼo be mia bese.