2 Tim 3 - Bible en langue Bulu

Minjuʼu ya biyoñ bia suʼulan

¹ Tukaʼa yeme jame dina na, melu ma suʼulan, biyoñ bi ne ayaé bia ye bo.

² E ne na, bôt ba ye bo mimfôfom, benyeʼe moné, ngunguan a mebun, bekobô Zambe ébiasé, a bekange bebiaé bap, bikalak, te semé jôm é ne étyi,

³ ba ye bo teke minleme mebum, njet, bibôta, be te jôô bebien, évô, besiñe mam me ne mvaé.

⁴ Bekoñe bôt, mbia minlem, ndim amu mebun, benyeʼe mimvôman a lôte Zambe.

⁵ Ba ye bi mbunan ane ébutaʼa ékpwaé, ve be too ba ba sôane ngule Zambe. Saʼaleʼe fe avale bôte te!

⁶ Bevoʼo ya be be ba nyiin menda menda a dutu abibinga e ne njalan a mam abé e mevote map, e nde ete e ntoo alo ya minkômbane mevale mese.

⁷ Ba jeñe zene ya yéʼé éyoñ ése, ve tee ngule ya kui vôme ya yeme benya mejôô.

⁸ Aval ane Yanés a Yambrés be nga tebe Môze e ngame yat, avale te fe bôte bete ba tebe benya mejôô e ngame yat; be ne bôt be bili nsisim ézezam a mbunan ô ne atek.

⁹ Ve ba ye bo te ke ôyab ôsu amu bôte bese ba ye yemelane akute, mboone dap, aval ane e nga yené be Yanés a Yambrés.

Melep mfaʼa Timôté

¹⁰ Ve wo, ô nga jiʼa tôñe ma e nyeʼelane wom, e ntabane wom, e mefeʼe mam, e mbunan, e njiban, e nyeʼan, e mban,

¹¹ e bikpweʼele a e mintaé me nga tôbane bie Antiôche, Ikôn a Listre. Avale bikpweʼele me nga tôbane bie. A Nti a nga vaa ma bie bise été.

¹² Amu ba bese ba kômbô nyiñ e mbunane Krist Yésus été, ba ye wu ékpweʼele:

¹³ ve mfaʼa mbia be bôt a belaa minsos, ba ye yaé abé été, a duʼu bôt befe a bebien.

¹⁴ Ve wo, tebeʼe ne bip e mam ô nga yéʼé a kañese ane benya mejôô été. Wo yeme be beza ô nga yéʼé me.

¹⁵ Aso ébôboʼo abialé dôé, wo yeme Mimfufube Mintilan; mi bili ngule ya ve wo feʼe ja ke kui nyian a zene ya mbunan ô ne be Krist Yésus.

¹⁶ Ntilan ôse ô ne wu wo so e be Zambe, a mvolan asu ya yeʼele, asu ya komekan, asu ya sôane bôte zôsôô , asu ya yaʼale e zôsôô été,

¹⁷ nalé môta Zambe a ye jaléban a bo nkôman asu mbamba mboon ase.