2 Tim 2 - Bible en langue Bulu

Nyoñe ngabe jôé ya mintaé

¹ Ajô te wo, a mone wom, boʼo ngul e mvam é ne bia be Krist Yésus été.

² Nyeʼelan ô nga nyoñe be ma e mise bengaa abui, vaʼa wô bôt be ne ba ya tabe bee ndi, mbe bebien ba ye bo ngul ya beta yeʼele wô bôte befe.

³ Nyoñe ngabe jôé ya mintaé aval ane mbamba mone bezimbi Krist Yésus.

⁴ Teke môt, éyoñ a tyiʼi na a nyiine bezimbi, a beta tyelé nleme yôb a ényiñe zesé môt nge a kômbô ve nyô a nga nyoñe nye nkaʼa mvus.

⁵ Avale te fe nsôngane bivôé: teke mbo bivôé a nyoñ ékate duma, vengevenge ve a nga sôngan a seméʼé metiñe bivôé.

⁶ Mbé mefup a wu njuk, nye a yiane taté nyoñe ngabe bibuma jé.

⁷ Wôʼô jam ma jô. Akôsa bo nalé, Nti a ye volô wo na ô wôʼô mam mete mese.

Simesaʼane Yésus ñwômane miñwuan

⁸ Simesaʼan Yésus Krist ya mvoñe bôt David ñwômane miñwuan, aval ane Mbamba Foé ma kañete a jô,

⁹ a nye ate ma wuu nye mintaé a kaʼabane mengataʼa aval ane nge me ne mbia môt. Akôsa bo nalé, Mbamba Foé Zambe nye a nji bo nkaʼane ngataʼa!

¹⁰ Ajô te ma jibi mame mese, amu mintobane mi bôt, nalé be fe ba ye bi nyian ô nee be Krist Yésus a étôtoʼo ya nnôm éto.

¹¹ Njôane wu ô ne wu ya buni: nge bia wu a nye, bia ye nyiñ a nye.

¹² nge bia wu mintaé a nye, bia ye jôô a nye. Nge bia dimi nye nye a ye dimi bia.

¹³ Nge bia bo te bo ba a too be ndi, ve nye a ye bo étabe ndi jangan, amu a se ngule ya dimi émien.

Nkatane benya mejôô e zôsôô été

¹⁴ Boʼo be na be simesane mame mete mese, a kañete asu Zambe na, be saʼale meluman, bifia bi nji volô jôm, bia jaa ve ba ba vôʼôlô bie.

¹⁵ Ô vaʼa ngule ya yené asu Zambe, ane nyô a veʼelebaneya, ane mbo ésaé a ne te wôʼô ôson, nyô a yeʼele bôt benya mejôô zôsôô .

¹⁶ O saʼaleʼe mbia minkobô . E ba ba ve bebien été, ba ye yaé a ke ôsu abé été.

¹⁷ Bifia biap, bi ne ane fôl ja nen. Avale te Himené a Filétôs be né.

¹⁸ Be nga kee nya nyeʼelane e fefe a veʼe feʼe na ñwôman miñwuan ô maneya boban. Nalé ate ba kpwéé mbunane bôt abui.

Mbôkaʼa Zambe a nga bôôé

¹⁹ Akôsa bo, ngule mbôkaʼa Zambe a nga bôôé é ne. O bili sitam nje é ne éfia jina na: Nti a yeme ba be ne émbé, a na: nyô ase a loone jôé Nti, a kele abé ôyap.

²⁰ E beta nda été, saa ve meviek me or mme me né étam, nge ma me argent; e ma bilé a ma mʼétek me ne fe été. Mevok me ne asu mebelane ma yiane duma, e ma mevok asu mebelan me ne si.

²¹ Nyô a bo émien mfuban , a ye bo vieʼe mebelane ma yiane duma, étyi a mfi e be masa, wu wo yiane mbamba mboon ase.

Mbo ésaé Nti

²² Mateʼe mbia minkômbane bisoé, jeñe zôsôô , mbunan, nyeʼan a mvoʼé mia be ba bese ba loone jôé Nti be too mfubane minlem.

²³ Ve zesé bisô ya tee fek, saʼaleʼe bie. Amu wo yeme na bia dutu mejô.

²⁴ Ve mbo ésaé Nti a nji yiane bo môta mejô, ve mbamba môt e be bôte bese, ngule ya yeʼele, a njibane nselaʼan asimesan.

²⁵ A yiane yeʼele ba ba sôane nye a njeʼebane nlem . Za a yem nge Zambe a ne volô be na be kôñelan a yeme benyaa mejôô,

²⁶ be bulan e be bebien a kôlô mevote me Satan, nyô a nga bili be minkôm a belo ya nkômbane wé?