2 Tim 1 - Bible en langue Bulu

Mebatan

¹ Ma, Paul, nlôman Krist Yésus, amu nkômbane Zambe, aval ane ngakaʼa ényiñ é ne e Krist Yésus été é né.

² Ma tili mone wom ma kôme nyeʼe Timôté. Mvam, nkoon éngôngo a mvoʼé , bi boʼo be wo, bi soʼo be Zambe Esaa a e be Krist Yésus, Nti wongan.

Mvean akéva

³ Me ne njalan a ñyeman ma yeme mvaé Zambe a boya ma, nyô ma bo ésaé mvuse bemvamba, a mone môte ya nlem wom a too mfuban , éyoñ ése ma simesane wo alu baa môs . Ma tote jôé dôé meyeʼelan mam été.

⁴ Eyoñ ma beta simesane miliʼi môé, ma dañe kômbô beta yene wo, nde ma ye jaé ne lut a mevak.

⁵ Ma simesane mbunane wôé ô ne tee meduʼan. Mbunan ô nga taté tabe e be émvame jôé Lois a e be nyua Enis, ñwô te, ma tuʼa buni nalé na, ô too be wo.

⁶ Ajô te, ma bo wo ô simesane wômôlô mveane Zambe ô nee be wo, ataté éyoñ me nga beté wo mo.

⁷ Amu Zambe a nji ve bia nsisime woñ, ve Nsisim ô ne ngu, nyeʼan a wu njôane nlem .

⁸ Ajô te te wôʼô ôsone ya bo ngaa Nti wongan, a te wôʼô ma ôson, ma mbôk amu nye. Ve nyoñe ngabe mintaé jam amu Mbamba Foé, ô buniʼi e ngule Zambe,

⁹ nyô a nga nyii bia a loone bia mfufube nloon, saa amu mimboone mi mam miangan, ve amu nkômbane wé émien a mvame jé, e mvam é nga vebane be bia aso biyoñe ya nnôm éto e be Krist Yésus,

¹⁰ é maneya yené éyoñe ji a nsoone nyii wongan Krist Yésus. E nye a nga tyam awu a bo na ényiñ a te wu bi faé amu Mbamba Foé,

¹¹ nye ate ma, me nga teléban nkatefoé, nlôman a nyeʼele.

¹² Amu ajô te ma jibi mintaé mite. Ve me nji wôʼô ôson, amu ma yeme nyô me nga buni. A me too ndi nleme na, a bili ngule ya baʼale ngabe mbunan é nga vebane be ma akekui môs ôte.

¹³ Bii mimfufube mejô ô nga wôʼô be ma, ane mbôkaʼa, e mbunan a e nyeʼan été, mbie bite bi nee be Krist Yésus.

¹⁴ Baʼaleʼe mbamba ngabe mbunan ngule Mfufube Nsisim a too be bia.

¹⁵ Wo yem na, e ba bese ya Azi be nga liʼi ma, aval ane Figél a Hermôgén.

¹⁶ Nti a sôʼô mvame jé e nda bôt Onésifor, amu a nga ve ma ngule nlem biyoñ abui, a a nji wôʼô mengataʼa mam ôson.

¹⁷ Ve nné ane a nga kui Rôm, a nga viane jeñe ma a mevak a yene fe ma.

¹⁸ Nti a volôʼô nye na, a yene nkoon éngôngol e be Nti môs ôte. A bisaé bise a nga bo ma Eféze, wo étam wo yeme bie nya ñyemane.