2 Tes 3 - Bible en langue Bulu

Melep ajô meyeʼelan a ésaé

¹ A bobejañ, yeʼelaʼan ajô dangan, nalé ate ajô Nti e ne ngule ya jiʼa mialan a wum aval ane e né e be mia,

² nde bia ye kôtéban e be ba be ne ézezam a mbia be bôt; amu bese be nji bi mbunan.

³ Nti a ne nyô ya buni: A ye yemete mia a baʼale mia mfaʼa mbia môt.

⁴ Mfaʼa wônan, bi too ndi e be Nti na, e jam bia bendé mia, mia bo de a mia ye ke ôsu a bo de.

⁵ Nti a wuluʼu minleme mienan e nyeʼane Zambe été a e mbane njibane be Krist été.

⁶ Bia bendé mia a jôé Nti Yésus Krist a bobejañ na: Mi tyetebe e mojañ ase a nyiñ e joʼojoʼo ényiñ été, saa ane fulu mi nga nyoñe be bia é né.

⁷ Amu miabebien mia yem ane mia yiane vu bia; amu bi nji nyiñ e joʼojoʼo été e zañe jenan.

⁸ Bi nji di bidi bi môt éziñ akap; ve e mboon ésaé été a e njuʼu été, bi nga saé alu ba môse na bi bo te bo mbeʼe be môt éziñe ya be mia.

⁹ Akôsa bo na bi nga yiane sili, ve bi nga kômbô bo, mfaʼa wônan, éveʼela mia yiane vu.

¹⁰ Yaa, éyoñ bi nga too mia bebé, bi nga ve mia abendé di na: Nge môt éziñ a nji kômbô bo ésaé, a boʼo fe te di.

¹¹ Amu bia wôʼôtane na bôt bʼéziñ ba nyiñ joʼojoʼo ényiñ e be mia, avale di na éyoñe ba yiane saé, ba viane bo biduñ.

¹² Bia bendé bôte bete e be Nti Yésus Krist, a lebe be na: Be boʼo ésaé évôvoé été, a be jaʼa bidi bebien ba ye bi.

¹³ Ve mia, a bobejañ, te mia tek a mboone mvaé.

¹⁴ Nge môt éziñ a bo te ve mejô ya kalate nyô mewôk, litaʼane jam a bo, a bo te fulane mam a nye, nde a ye wôʼô ôson.

¹⁵ Ve te yenane nye ane nsiñ, ve ve nye bijô ane monyañ.

Mbamba njôan a mebatan

¹⁶ Nti ya mvoʼé émien a vaʼa mia mvoʼé éyoñ ése, a mezene mese. Nti a tabeʼe be mia bese.

¹⁷ Ma Paul, ma batane mia a wo wom. Avale di nde ma sane kalate ase: e ntilane wom ñwô le.

¹⁸ E mvame Nti Yésus Krist é tabeʼe e be mia bese.