2 Tes 2 - Bible en langue Bulu

E mam ma fombô nsoone Krist

¹ Mfaʼa nsoone Nti wongan Yésus Krist, a nsulaʼane wongan e vôm a too, bia sili mia jame da a bobejañ,

² na mi nji yiane jiʼa dañe jañele fek, nge ko woñ a nkulane mejô éziñ, nge njôan éziñ, nge kalate éziñ ba liti mia, aval ane nge mame mete ma so e be bia, a mame mete me ne bo mia mi buni na, e môse Nti ô soya.

³ Môt éziñ a boʼo te duʼu mia a zen éziñ. E jam ôsu da ye taté boban e ne na: Nliʼane mbunan, a nyô a wosane wô a ye yené, mone ya njañan,

⁴ nyô a tebe a wosane jôm ése ba loone Zambe, nge ji ba kañ, a kui vôme ya tabe, émien, e nda Zambe, a yôtane na a ne Zambe.

⁵ Ye mia vuane na, me mbe me kobôʼô mia jame te éyoñe me nga to mia bebé?

⁶ A éyoñe ji, mia yem e jôm ja telé nye, ane a ye yené ve éyoñe jé émien.

⁷ Amu ndimba jam yʼabé é nga bo ésaé; da sili éyoñe ji ve na be telé nyô a bi je e fefe.

⁸ Eyoñe te ñhe nsoone mbo abé wo ye yené nye Nti Yésus Krist a ye tyam a évuñulu ya anyu dé a jiane nye a éfufube ya nsoone wé.

⁹ Nsoone mbo abé wo ye yené a ngule satan , a ngule mimboon mevale mese: bitua bi mam, mesimba meduʼan.

¹⁰ A mindutan mi ékotekot mevale mese e be ba ba jañ, amu be nji nyoñe nyeʼane benya mejôô ñwô ô nga yiane nyii be.

¹¹ Ajô te Zambe a lôme be ngule ja bo na be jañe fé a nje ja ye bo be na be buni minsos,

¹² nde e ba bese be nga bo te buni benya mejô ve yen ékotekot mvaé, ba ye tyiʼibane mejô.

Nyemane ngul e mbunan été

¹³ Ve mfaʼa wongan bia yiane ke ôsu a ve Zambe akéva amu ajô denan, a bobejañ Nti a dañe nyeʼe, amu Zambe a nga tobe mia aso atataʼa asu ya nyiiban a Nsisim wo fubu, a mbunane benya mejôô.

¹⁴ Jame te nde a nga loone mia a nkatane Mbamba Foé wongan na mi bi étôtoʼo Nti wongan Yésus Krist.

¹⁵ Nde a bobejañ, tebaʼane ngu a baʼale miñyeʼelane ya kôa bi nga yeʼele mia a menyu mangan nge bekalate.

¹⁶ Nde Nti wongan, Yésus Krist émien, a Zambe Esaa wongan, nyô a nga nyeʼe bia, a ve bia amu mvame jé, mvolane minlem ô ne nnôm éto, a mbamba ndi nlem ,

¹⁷ a volôʼô mia minlem, a yemeteʼe e mia e mame mese mia bo été a mam mese mia jô été asu mboone mvaé.