2 Tes 1 - Bible en langue Bulu

Ntili kalate a mebatan

¹ Ma, Paul, bia Silvain a Timôté bi too, ma tili keké bebuni ya Tésalônik é ne e be Zambe Esaa wongan a e be Nti Yésus Krist.

² Mvam é boʼo be mia a mvoʼé , bi soʼo be Zambe Esaa a be Nti Yésus Krist.

Meyaé e mbunan été akôsa bo étibelaʼa

³ Bia yiane ve Zambe akéva éyoñ ése ajô denan a bobejañ, a e ne foʼo zôsôô nalé amu mbunane wônan wo liti abui meyaé nyeʼane mi bili e zañe jenan, wua a nyô mbok, a wo yaé e be môt ase ya e be mia.

⁴ Avale ya na mi ntoo e jam bia nguane de e bekeké be Zambe été, amu mbane wônan a mbunane wônan e bitibelaʼa a meveʼele mia jibi été.

⁵ Bitibelaʼa bite a meveʼele mete bi ne ndeme zôsôa ntyiʼane mejô Zambe; bia sôñe na mi bo e ba ba yian éjôé Zambe nje mia tôbane je minjuk.

⁶ Yaa, e ne zôsôô mfaʼa Zambe na a bulane melunga e be ba tooé mia e melunga été;

⁷ a na a ve mia awoʼon a bia, e mia ba tibili éyoñe Nti Yésus a ye yené, nyô a ye so yôp baa mingungule beéngele

⁸ e nduan ja yôñ été, e mfaʼa ya bo akunaʼa e be ba be nji yeme Zambe a ba be nji ve Mbamba Foé Nti Yésus mewôk.

⁹ Melebe map ma ye bo njañane ya nnôm éto, ôyab a asu Nti a éfufube ya éto ntômba jé,

¹⁰ éyoñ a ye so môs ôte, mfaʼa ya nyoñe duma e be mimfufube mié, a ésemé e be ba bese be nga buni nye: ve mia mi nga buni nkañetane foé wongan.

¹¹ Amu ajô te bia yeʼelan ajô denan biyoñe bise, ane Zambe wongan a ne yene mia ane ba ba yiane nloon a nga loone mia. A na, a e ngule jé, a ve mia ngule ya bo mame mese me ne mvaé a bo fe mbunane wônane na ô fôʼôsan.

¹² Ajô te jôé Nti wongan Yésus da ye wum e be mia, a mia e be nye, aval ane mvame Zambe wongan a Nti Yésus Krist é né.