2 Pi 3 - Bible en langue Bulu

Môse Nti ô nji langan

¹ A bidima bemvôé biam, e kalate baa ñhe ma tili mia nyô. E bebaane été, aval ane ma baʼalane mia mam, ma kômbô vumelan asimesan e ne mvoʼé e minsisime mienan été.

² Ma kômbô na mi simesane mejô mimfufube bekulu mejô mi nga jô melu mvus, mebendé me Nti a Nyii bôt mme minlômane mienan mi nga kalane mia.

³ Yeman ôsusua na, e melu ma suʼulan, e bôt ba ye nyiñ ane minkômbane miabe mibien mi né ba ye yené. Ba ye woé mia

⁴ a jô na: Ye a nji liʼi ngakaʼa na a zu nga? Nde ñhe, a ne vé? Beésa bangan be maneya wu, ve mam mese me ngenan avale da ane éyoñe ntéane biôm!

⁵ Ba vañe vuane jame dina na: Zambe a nga té yôp a si a mejô yʼanyu den a ntoo ayab éyoñ. Si é nga kandane mendim a é nga kômban a mendim,

⁶ a mendime fe, ma ya beta ndôn, e mme me nga tyame nnôme si.

⁷ Mfaʼa yôp a si yʼéyoñe ji, nkobô Zambe wuwua ñwô wo baʼale bie asu nduan ja ye tyame bie. Bi ne mbaʼalan asu môse ntyiʼane mejô a njañane bebo abé .

⁸ Ve jame da e ne, nde mi nji yiane vuan, a bidima bemvôé biam, nalé a ne na: Mfaʼa Nti, môse wua ô ne ane toyini mimbu a toyini mimbu ane môse wua.

⁹ Nti a nji langan asu ya tôé ngakaʼa jé, avale bevoʼo ba simesan. Ve a ne ôjibi mfaʼa wônan, amu a nji kômbô na za nge za a jañ; ve a kômbô na bese be bi éyoñe ya lume abé mvus.

¹⁰ Ve môse Nti wo ye so ane ñwuwup. Yôp da ye jañe môs ôte a beta éduñ a ne ékowoñ, ateté ya yôp da ye tyamban a nduan, si a biôme bise bi ne été ja ye bo momo.

¹¹ Mbôlô biôme bise bia ye jañ avale te, yemane ñhe e jam mia yiane bo! Ntabane wônan wo yiane bo étyi ô beʼe nlatan a Zambe ane sitam .

¹² Mia yiane yange môse Zambe mi vaʼa ngule jenan ése asu ya na ô jiʼa so. Môs ôte wo ye bo wu yôp da ye tyamban a nduan e môse ateté ya yôp da ye nyemé a ayôñe minkabaʼa mi nduan.

¹³ Ve Zambe a nga ve ngakaʼa mfefé yôp a mfefé si, e vôme zôsôô a ye tabe, e jame bia yange e nde le.

¹⁴ Ajô te, a bidima bemvôé biam, nté bia yange môs ôte, vaʼane ngule jenan ése na mi bo mfuban a teke jame ya komekane mia e mise me Zambe, a na mia be nye mi tabe mvoʼé .

¹⁵ Wôʼane jame dina na, ôjibi Nti wongan wo ve mia afôla ya nyiiban, aval édima mojañe wongan Paul a nga tili mia a feʼe Zambe a nga ve nye.

¹⁶ Jam a nga tili e bekalate bé bese été nde le, e vôm a kobô ajô te. Mefôla mʼéziñ me ne été me too ayaé ya wôk; minsusuk a ba be ne tee ngum été, ba vôôn atinane yʼété, avale fe ba bo mengabe befe ya Mintilan. Ajô te ñhe ba dutu njañan wobe bebien.

¹⁷ Ve mfaʼa wônan, a bidima bemvôé biam, mi bili ayemé éyoñe ji. Tabaʼane ñhe ntye, te kañesane na bikobe bi bôt bi ne te ko jam éziñe woñ bi tuli mia fé, a te veʼelane dimili e ngul ébé mi bili.

¹⁸ Ve kelan ôsu a yaé e mvam a ñyeman Nti wongan a Nyii wongan Yésus Krist. Duma e boʼo be nye ataté éyoñe ji a kui nnôm éto! Amen.