2 Pi 2 - Bible en langue Bulu

Bekulu mejô be ne minsos

¹ Bekulu mejô be ne minsos be nga too fe e be bôt. Avale te fe e zañe jenan, beyeʼele be ne meduʼan ba ye zu a nyiñeli mbia miñyeʼelan ôteʼetek e be mia, a kui vôme ya kate nyô a nga kôté be, a zen éte, ba ye dutu njañan e be bebien atemetem.

² Abui bôt da ye tôñe be e bijabô biab été: amu be, zene benya mejôô ja ye biaséban;

³ a ôzañ akume wob été, ba ye diane mia a minkobô meduʼan; mfaʼa wop, aso ayap, ntyiʼan ajô wop ô nji bômbô zezé nalé fe njañane wop teke ke ôyo.

⁴ Amu Zambe a nji jamé beéngele be nga kop. Ve a nga wua be étôtôlan e vôm a baʼale be asu nkaʼane bengôkop e dibi été môse ntyiʼane mejô.

⁵ Avale te fe a nji nyii si ya melu kôa, ve a nga baʼale, melu ndôn é nga jine mbia be bôt, Noé, wua ya bôte muam be nga nyiñ, nyô a nga too mben.

⁶ Zambe a nga jiane minlame ya Sodom a Gomore mi bo ve asub asup, éveʼela asu mbia be bôte ya melu ôsu.

⁷ Ane a nga nyii Lot, zôsôa môt, nye a nga to mbametan ézezañe bewôé bôt be ne bijabô bete.

⁸ Zôsôa môt ate, nye a mbe a nyiñik ézezañe jap, a mbe a yenek a wôk e mam mese be mbe be boʼok; môs ane môs , amu mimboone miap mi mbe ékolé ôbak, nsisime wé ya zôsôa môt ô nga tôbane njuk.

⁹ Nalé a ne na, Nti a ne nguleya vaa bezôsôô be bôte bé meveʼele été, a baʼale bikotekote bi bôt ngume vôm, asu ya ve be melep e môse ntyiʼane mejô.

¹⁰ Osusua, a ye lebe ba ba tôñe mbia minkômban ya minsône miap, a biasé éjôé Zambe. E ba ba dañe buni bebien, ébiasé e nkobô, be ne teke semé bitôtoʼo bitétéa ya yôp, ve taa bie.

¹¹ Ve e to na, beéngele be ba dañe bitétéa bite e ngu a éwôlô, be be nji ve bie mekua ma liti ébiasé e mise me Nti.

¹² Ve bôte bete, be ne teke fek, ane betite ya fé mbe be ne mbialane na ba ye bili melam a wôéban; ba ta jôm be nji tuʼa yem. Ba ye wôéban ane betite ya fé.

¹³ Ba ye nyoñe maʼane ya ékotekote mboone jap. Ba yene mvaé na, be jalé mbia minkômbane miap a môs . Ntabane wop ézezañe bôt, ô ne ôson a ékolé ôbak, éyoñ ba tabe bisulan bi ndiane bienan be wôʼô mvaé ya meduʼane map.

¹⁴ Mise njalan a mejian , be ne teke jaé mboon abé , be dutuʼu minsisim mia yeñelan, be betéʼé ôdoʼé yʼôzañ akum, be ne bone biyoʼé.

¹⁵ Eyoñe be liʼiya e zen é ne zôsôô be nga fuʼu fé a ntôñane zene Balam e mone Béor, nye a nga ku mebôbelaʼa été amu nkômbane ya nyoñ ékotekote maʼan.

¹⁶ Ane a nga nyoñ minkomekan amu melo mé. Nalé mvumvuʼu mone éjakas ô nga kobô ane tyiñe môt a telé akute mboone nkulu mejô.

¹⁷ Bôte bete be ne aval ane menjeñ me ne mvelan, a aval ane minkut mia tindiban a ôkôs, Zambe a baʼaleya be éto, e vôm a ne édoʼo dibi.

¹⁸ Ba kobô bivuvuʼu minkobô mi too tee éfia ja wôʼé. Ba belane minkômbane miap mia dañ ôson asu ya bi e ba be ndôme tundan e nsamba bôt wo nyiñ ékotekot e melam mab été.

¹⁹ Ba kaʼa be éto beti, ve bebien be too belo ya bibole bi mam. Amu môt a ne ôlo ya jôme ja jôô nye.

²⁰ Amu nge ba be kôlô ya e mvine mame ya si nyô été amu ñyemane ya yeme Nti a Nyii wongan Yésus Krist, ba beta ku a kañese mam mete, ényiñe jap ja suʼulane bo angôndô ya abé , a lôt aval é nga too.

²¹ E nga ye bo mvaé mfaʼa wop nge be nga ye bo te taté yeme zôsôa zen , a lôte na, be taté yem, a lume mfufub atiñ ô nga vebane be be mvus.

²² E jam e nga kui e be be, da kale e ngana nyô na: Mvu ja beta di bendôlô bé, a ngale ngôé, éyoñ a maneya woban, a beta ke bume mbotoʼété.