2 Pi 1 - Bible en langue Bulu

¹ Ma, Simon Pierre mbo ésaé a nlôman Yésus Krist, ma tili e ba be nga nyoñ avale étôtoʼo mbunane da ane éñwongan, amu zôsôô Zambe wongan a Nyii wongan Yésus Krist.

² Mvam a mvoʼé bi boʼo be mia abui abui amu ñyemane Zambe a Yésus Nti wongan.

Nloone ya belane mefulu bekristen

³ Ngule Zambe é nga ve bia e mam mese ma yian asu ényiñ a mbunan, e vôm é nga bo na bi yeme nyô a nga loone bia na bi bo benyoñe ngabe ya étôtoʼo jé a e ngule jé ja fôʼôsan.

⁴ Amu étôtok a e ngule jé bite nde akum é ne beta tañ, ngakaʼa mfaʼa wongan, é nga vebane be bia; ndembene mia ye nyiine fufulu ényiñ a éyekaʼa Zambe amu akume te, valé mi vasebaneya, a ngul ése, ébol ényiñ, nje minyamete mia ve si nyô ane bidi.

⁵ A amu amu ate émien nde ñhe, éyoñe mi maneya fulan e ngule jenan ése, a latane mbunane wônan a mbamba mefulu; mbamba mefulu a ñyeman,

⁶ ñyeman a njôane miabebien; njôane miabebien a mban; mban a ntaban ane bebuni;

⁷ ntaban ane bebuni a amvôé bobenyañ; amvôé bobenyañ a nyeʼan.

⁸ Amu nge mi bili mbamba mefulu mete abui abui, me se nguleya jôʼé mia te fôʼôsan nge minkôkôm asu ya yeme Yésus Krist Nti wongan.

⁹ E ne été na, nyô a nji bi me a ne e ndindime wo bôp: a vuane na a nga tuneban e mfaʼa mam abé mé ya melu Kôa.

¹⁰ Ajô te a bobejañ, betaʼa yemane ngu, asu ya yemete nloone wônan a ntobane wônan; éyoñe mia bo nalé, teke mbia jam éziñ a ye kui na mi ku.

¹¹ Eyoñe te ñhe, e bebela été, e nyiane ya nyiin nnôm éto éjôé Nti wongan a Nyii wongan Yésus Krist, wo ye vebane be mia akap.

Mewôʼô mejô minlôman a bekulu mejô

¹² Me bili nkômbane ya baʼalane mia de, akôsa bo mia yem a tebe ngul e benya mejôô ya éyoñe ji.

¹³ Ve ma buni na, e ne zôsôô nté me vee si nyô na, me fôʼô mia éyoñ ése a mbaʼalane ma baʼalane mia mam mete.

¹⁴ Amu ma yeme na, me mbeme kandan ébeme jam avale Nti wongan Yésus Krist a nga liti me de.

¹⁵ Ve ma ye jeñ éyoñ ése na, e mvuse nkôlane wom, mi bo ngule ya baʼale miñyeʼelane mite.

¹⁶ Bi nji bo mia na mi yem éwôlô nzuane Nti Yésus Krist a zene ya abeñe minkañete, ve a ñyenane bi nga yene nye a mise mangan étôtoʼo jé été.

¹⁷ Amu a nga nyoñe duma a étôtok e be Zambe Esaa éyoñe tyiñ é nge so abeñ étôtoʼo Zambe é jôʼô na: Nyôna a ne mone wom ma dañe nyeʼe me futiya ndi nleme jam ése be nye.

¹⁸ Biabebien bi nga wôʼô tyiñ éte é soʼo yôp éyoñe bia be nye bi nga too nkôl ô ne étyi.

¹⁹ Ajô afe na, bi bili nkobô bekulu mejô, ñwô ô ne bia mbôkaʼa, mia kabe, éyoñ mia beme mise menan été aval ane e lampe a faé e vôm a ne dibi, akekui éyoñe môs wo sa a ôteté ya mame tyé wo téé e minleme mienan été.

²⁰ Osusua, tataʼa yemane de nya ñyemane na, teke nkulane mejô ô ne e kalate Zambe été ô ne ajô atyeñe môt éziñ;

²¹ ve bebela na, sake nkômbane môt ñwô wo soo nkulane mejô, ve bôt be nga ve bôt be nga kobô señe Zambe a ngule Mfufube Nsisim.