2 Minkte 9 - Bible en langue Bulu

Njô bôte minga ya Saba a ke jome Solômon

¹ Eyoñe njô bôte minga ya Saba a nga wôʼôtane duma Solômon, nde a nga zu e Yérusalém na a veʼele Solômon a mesoé me ba. Beta nsamba bôt a nga tôñe nye mvus a bekamel be beʼe beôlobinda be ne mbamba menyum, abui or a mekoʼo me ne édima. Ane a nga zu be Solômon a kate nye e mam mese me mbe nye nlem .

² Solômon a nga yeʼele nye e mam mese a nga sili, teke jam éziñ e mbe Solômon nsolan nde a nji bo nguleya liti nye.

³ Ane njô bôte minga ya Saba a nga yene feʼe Solômon, e nda a nga lôñ,

⁴ bidi ya tawôlô wé, bitabaʼa bebo bisaé bé, bisaé a mengômesane me bôt be mbe be boʼo nye bisaé, e bôt ba labe nye mendim a mengômesane map, abet da ke e Nda Nti; nde a nga bi ébuʼanyu a mo.

⁵ A jô njô bôte na: Nde jam me nga wôk me too si jam é mbe ñhe foʼo été ajô mimboone miôé a e feʼe jôé!

⁶ Me mbe teke buni e jam be mbe be jôʼô été te na me zu a yen a mise mam. Ve me yeneya na be nji ke kañete ma foʼo vʼéfase ya anene feʼe dôé. Wo dañ e jam me nga yem e nkañete ya duma dôé été.

⁷ Mvom a bôte bôé, mvom a bebo bisaé bôé, mbe be tele wo ôsu éyoñ ése, a mbe ba wôʼô feʼe jôé!

⁸ Ebotan a Nti, e Zambe wôé, Nyô a nga nyeʼe wo a tooé wo éto njôane jé ane njô bôt asu Nti e Zambe wôé! Amu Zambe wôé a nyeʼe Israél a a kômbô bo na a tabe nnôm éto, nde a nga telé wo de njôô wop, ô bo nya ntyiʼane mejô a zôsôô .

⁹ Ane a nga ve njô bôte betalañ be or ntet a mewôm mebaé, étua abui beôlobinda be ne mbamba menyum a mekoʼo me nʼédima. Beôlobinda be nji beta yené be too ane ba njô bôte minga ya Saba a nga ve Solômon.

¹⁰ Bebo bisaé be Uram a ba be Solômon be nga soo or ya Ofir, be nga soo fe bilé bi sañtal a mekoʼo me nʼédima.

¹¹ Njô bôt a nga belane bilé bi Sañtal asu mezene ma ke e nda Nti a e nda njô bôt, nalé fe asu memvet a bingombé beyia bia. Avale bilé te e nji ke tame yené e si ya Yuda.

¹² Njô bôte Solômon a nga ve njô bôte minga ya Saba jôm ése a nga kômbô, jôm ése a nga sili, a lôt abim a nga zu ve njô bôt. Mvus éte a nga bulan a ke e si jé, émien a bebo bisaé bé.

Akume Solômon

¹³ Mbu ôse, or a nga so Solômon a mbe betalañ mintete misaman, mewôm mesaman a besaman,

¹⁴ te lañe nyô befaʼa or a bebo makit be nga so nye; bejô bôte bese ya Arabi a bengovina ya si yʼIsraél fe be nga zu ve Solômon or a argent.

¹⁵ Njô bôte Solômon a nga bo beta biben bi or a ne mbiban mintete mibaé, a nga belane kili or ésaman asu ében ése yʼété,

¹⁶ a nga bo fe biben bi or a ne mbiban bi too tyôtyoé mintete mila, kili or éla asu ében ése yʼété; njô bôt a nga futi bie e nda afane ya Libañ.

¹⁷ Njô bôt a nga bo beta éto njôane mimbañ a yañe je a or a ne mfuban .

¹⁸ Eto te é mbe é tele ékôndôʼô yôp é bili ôbet ô too mendaa mebo mesaman, nalé fe ételé mebo or é tii éto; fefel éto ése é mbe é bili vôm ba beté mo; bengbwengbwem bebaé be tele e fefele ébeté mo,

¹⁹ a bengbwengbwem awôm a bebaé be tele e bitelé mebo bisaman yôp e li a li. Avale jame te é nji tame boban éjôé éfe.

²⁰ E biôme bise njô bôte Solômon a nga belane bie asu menyu bi mbe mboon a or; bisua bise ya nda ya afane Libañ bi mbe mboon a or a dañe mfuban; teke jôm é mbe mboon a argent: be nji ke lañe na argent a ne jôm melu me Solômon.

²¹ Amu njô bôt a nga bili besitima be wuluʼu ôsé a kui Tarsis a bebo bisaé be Uram; mimbu milale mise, besitima be nga so Tarsis be beʼe or, argent, mimbañ, bekoé a anon e ne menen.

²² Njô bôte Solômon a mbe éwôlô a dañe bejô bôte bese ya si mfaʼa akum a fek.

²³ Bejô bôte bese ya si be nga jeñe na be tôbane Solômon a wôʼô feʼe Zambe a nga futi abume dé été.

²⁴ Môt ase ya be be a nga soo mimveane mié, biôm bi ne mboon a argent a or, mengômesan, mengaa, beôlobinda, bikabela a bemulé. Nalé a nga bobane mbu ôse.

²⁵ Solômon a nga bili mebemba toyini ényin asu bikabela a bevagoñ a bewulu bikabela toyini awôm a ébaé mbe a nga ke a tooé e bitison ba baʼale biôme mewosan a e Yérusalém, bebé a njô bôt.

²⁶ A nga dañ bejô bôte bese ataté ôsôé Yordan a kui e si Befilisteñ a minné yʼEjipte.

²⁷ Njô bôt a nga bo na moné a bo abui e Yérusalém ane mekôk; a nga bo fe na bilé bi sédre bi bo abui ane bilé bi Sikomor bi ne e Séféla.

²⁸ Be nga zuu Solômon bikabela bi soʼo Ejipte a mesi mese.

Awu Solômon

²⁹ Mimboone mi Solômon mivok, mi ya atataʼa a mi ya asuʼulan, mi ne ntilan e kalate mimboon mi nkulu mejô Natan, e nkulane mejô Ahiya ya Silô, a e miñyenane mi ñyene mam Yédô a nga yene be Yérôbôam, e mone Nébat.

³⁰ Solômon a nga jôô Israél ase e Yérusalém mimbu mewôm menyin.

³¹ Mvus éte, a nga bômbô vôme wua ba bʼésaa; be nga jame nye e tisone David ésaa wé, a mone wé Rôbôam a nga jôô éjiane jé.