2 Minkte 7 - Bible en langue Bulu

Njô bôt a bôte bevoʼo bese ba tyiʼi Nti biôm

¹ Eyoñe Solômon a nga mane yeʼelan, nde nduan é nga sis é soʼo yôp a diʼi mvean wo diʼibane ngumba a biôme ba tyik, a étôtoʼo Nti é nga jaé e nda .

² betuni be nji jaé e nda Nti.

³ Bone bʼIsraél be nga yene nduan a étôtoʼo Nti bi sisik e nda , nde be nga kumbu mesu me butu si e nseñe mekoʼo yôp, be nga kute meboñe si a kañe Nti be jôʼô na: Amu a ne mvaé, amu mvame jé é too nnôm éto!

⁴ Ane njô bôt a ngum ayoñ ôse be nga ve bityiʼa ôsu be Nti.

⁵ Njô bôte Solômon a nga ve benyaʼa toyini mewôm mebaé a ébaé, nalé fe mintômba a bikela toyini ntet a mewôm mebaé. Nalé ate njô bôt a ayoñe bôt ése be nga bo abôʼô ya diine Nda Zambe.

⁶ Betuni be nga tele mevôm ba bo ésaé jap a Belévit fe be nga tele be bili bibômebômé asu Nti, mbie njô bôte David a nga bo asu ya kañe Nti, éyoñe David a nga ve be ésaé ya kañe Nti be jôʼô na: Amu mvame jé é too nnôm éto. Betuni be mbe be loñe metoñ be too be bebé, a Israél ase a nga tele tetele.

⁷ Ane Solômon a nga telé ézezañe nseñ ô ne ôsu ya Nda Nti étyi; amu a nga ve mimvean ba diʼi ngumba a mevoñ bityiʼa ya nlatane ngbwa, amu ataʼa metunaʼa mvot Solômon a nga bo é nji bo nguleya yiane mimveane ba diʼi ngumba, mimveane ya mefup a mevoñ.

⁸ Solômon a nga bo abôk te tañe melu zamgbwa, ba Israél ase; angôndô ya beta nsamba a nga so ataté anyiine Amat a kui ôtôñ Ejipte.

⁹ E môse muame, nde be nga bo beta abôk a too anen; amu be nga bo mevaʼa ya diine ataʼa metunaʼa tañe melu zamgbwa, a bo abôk tañe melu zamgbwa.

¹⁰ E môse mewôm mebaé a lale ya ngone zamgbwale nje Solômon a nga suu bôt be ke menda bindelé map. Be nga fôn, nlem ô too mevak amu mvaé Nti a nga bo David, Solômon a Israél, ayoñe dé.

Nti a yené e be Solômon éyoñe baa

¹¹ Eyoñe te Solômon a nga sondô nda Nti a e Nda njô bôt. E mam mese a nga kômesane na a bo asu nda Nti a nda njô bôt me nga wulu mvoʼé .

¹² Ane Nti a nga yené e be Solômon a alu a jô nye na: Ma te wôʼô meyeʼelane môé a ma tabe vôme nyô ane nda ba tyiʼi biôm.

¹³ Eyoñ ma ye dibe yôp a mveñ te fe beta noñ, éyoñe ma ye bendé bitandaʼa na bi di si, éyoñ ma ye lôme bim e be bôte bam,

¹⁴ nge ayoñ bôte dam, e vôme jôé dam da loban, da sili ebiene si, é yeʼelan a jeñ asu dam, nge da bulan e mbia mezene mé, ma ma ye wôʼô de, me too yôp, a jamé de abé dé, a yete si jé.

¹⁵ Ataté éyoñe ji, e mise mam ma ye yombô a melo mam ma ye vôʼôlô meyeʼelan ma boban e vôme nyô.

¹⁶ Ataté éyoñe ji ma top a telé nda nyôna étyi ya na jôé dam é tabe été nnôm éto, a e mise mam a e nleme wom bia ye tabe été éyoñ ése.

¹⁷ Wôna womien, nge wo wulu vôme me né, avale ésoo David a nga wulu, asu ya bo mam mese me nga bendé wo, nge wo baʼale memvinda a minjôane miam,

¹⁸ ma ye telé éto njôane jôé avale me nga tiñeti a ésoo David na: Môt a ye bo te jembane wo asu ya jôô Israél.

¹⁹ Ve nge mia bulane mvus a liʼi memvinda a mebendé mam me teléya mia ôsu, nge mia ke kañe bezambe befe a kute be meboñe si,

²⁰ ma ye vaa mia e si me nga ve mia a ngu, ma ye ben e nda me nga telé asu jôé dam é ke ma ôyap, a ma ye bo je jôme nkana a ôson e be meyoñ me bôte mese.

²¹ Toʼo na nda éte é ne za avale ôyabe yôp, môt ase a ye lôte je bebé a ye kam a jô na: Amu jé Nti a nga bo si a nda nyô avale di?

²² A ba ye yalane na: Amu be nga liʼi Nti, e Zambe bʼésaa bap, nyô a nga soo be si yʼEjipte, amu be nga timbi a bezambe befe, a kute meboñe si ôsu viap a kañe be; ajô te a nga zuu bidim bise bi e be be.