2 Minkte 6 - Bible en langue Bulu

¹ Eyoñe te Solômon a nga jô na: Nti a nga jô na: A ye tabe e dibi été!

² Ve ma me lôñeya wo Nda ya tabe, e vôm wo ye tabe nnôm éto!

³ Ane njô bôt a nga kôñelan asu dé a botan ékôane bôt ése ya Israél. Ekôane bôt ése ya Israél é nga tele tetele.

⁴ Nde a nga jô na: Ebotan a Nti, Zambe Israél, Nyô a nga kobô ésaa wom David a anyu dé émien, a Nye ate a tôé mejô a nga jô a mo mé.

⁵ Ataté e môs me nga vaa ayoñe bôte dam e si yʼEjipte, me nji tebe tison éziñ, e meyoñ mese ya Israél été, na e nne jôé dam da ye tabe été, a me nji ke tobe môte na a bo évete ya bôte bam Israél;

⁶ ve me nga tobe Yérusalém na jôé dam é tabe été, a me nga tobe David na a bo évete ya ayoñe bôte dam Israél!

⁷ Osimesane ya lôñe Nda asu jôé Nti, Zambe ya Israél, ô mbe e nleme David ésaa wom.

⁸ Ve Nti a nga jô David ésaa wome na: Amu ô biya ôsimesan e nleme wôé été na wo lôñe Nda asu jôé dam, ô nga yeme bo na ô bi ôsimesane te e nleme wôé été.

⁹ Ve da sake wo wo ye lôñe nda , amu e mone wôé, nyô a ye so abume dôé, nye a ye lôñe Nda asu jôé dam.

¹⁰ Nti a tôéya nkobô a nga kobô: Me tebeya éjiane David ésaa wom a me tabeya éto njôane ya Israél avalʼane nkobô Nti ô mbe, me lôñeya Nda asu jôé Nti, Zambe Israél.

¹¹ Me futiya éwolo e nda éte été, nje é bili élate Nti a nga bo a bone bʼIsraél.

Meyeʼelane me Solômon

¹² Ane Solômon a nga tebe tetele ôsu ataʼa metunaʼa Nti, asu é lumu nye ékôane bôt ése ya Israél. Nde a nga same mo yôp.

¹³ Amu Solômon a nga bo ataʼa mvot a telé de ézezañe nseñ; ataʼa te é mbe ayap méta ébaé a étun, ndam méta ébaé a étun a ôyabe yôp méta jia a étun. A nga tebe yôp a kute meboñe si ôsu ékôane bôt ése yʼIsraél. Nde a nga same mo yôp a jô na:

¹⁴ A Nti, Zambe Israél! Zambe mfe a nji bo ane wo e yôp a e si: wo baʼale élat a mvam e be bebo bisaé bôé ba wulu vôm ô né a nlem ôse!

¹⁵ Ajô te ô nga baʼale jam ô nga jô e be mbo ésaé wôé David, ésaa wom; a e jam ô nga jô a anyu dôé, wo tôé de e môse wu a wo wôé.

¹⁶ Eyoñe ji, a Nti, Zambe ya Israél, baʼaleʼe e be mbo ésaé wôé David ésaa wom e jam ô nga jô nye na: Wo ye bo te jemban ôsu viam e môt a tyendé wo, a too éto njôan Israél, jame da e ne ve na, bone bôé be tabe ntyel e zene jap été a be wulu, ane metiñe mam me né, aval ô nga wulu be ma.

¹⁷ Eyoñe ji, a Nti, Zambe Israél, nkobô ô nga kobô mbo ésaé wôé David ô ntoo ñhe ve tôéban!

¹⁸ Jia! Ye bebela na Zambe a ye tabe ba môta binam e si nyô? Tame yene na yôp ba yôbe ya môp bi se nguleya yiane wo, ngumane ki e nda me maneya lôñe nyô!

¹⁹ Ve da na a Nti, e Zambe wom, tame vôʼôlô meyeʼelan me mbo ésaé wôé a minjaʼane mié, wôʼôk a nyoñe meyeʼelan me mbo ésaé wôé a yeʼelane wo.

²⁰ E mise môé me tame kuiban môs ba alu e nda nyô, e vôme womien ô nga jô na e vana nye jôé dam da ye tabe! Vôʼôlôʼô meyeʼelan me mbo ésaé wôé a bo e vôme nyô.

²¹ Wo ye vôʼôlô minjaʼan mi mbo ésaé wôé a ayoñe bôte dôé Israél, éyoñ ba ye yeʼelan e vôme nyô! Wo wo ye wôk ataté vôm ô too, ataté yôp; wo ye wôk a wo ye jamé!

²² Nge môt éziñ a bo e môt a too nye bebé abé , a be yemete nye na a kane ngana, nge ngana éte ja boban ôsu ya ataʼa metunaʼa, e nda nyôna été,

²³ wo wo ye wôk ô too yôp, wo ye bo jam éziñ a tyiʼi bebo bisaé bôé ajô, asu ya ve môt a ku étom mekua, a wua mbia mboone wé e nlô wé yôp, a kalé zôsôa môt a bo nye ane zôsôô wé a né.

²⁴ Nge ayoñe bôte dôé Israél da bômban ôsu be besiñe bé, amu be boya wo abé; nge ba bulane be wo a kañe jôé dôé, nge ba yeʼelan a sili wo mam e nda nyô,

²⁵ wo wo ye wôk ô too yôp. Wo ye jamé abé ya ayoñe bôte dôé Israél a wo ye bulane be e si ô nga ve be a bʼésaa bap!

²⁶ Nge yôp da diban a mveñ ja bo te noñ amu abé be ne bo wo; nge ba yeʼelan e vôme nyô, a kañe jôé dôé, a bulane mvus mfaʼa ya abé dap, amu nsamelan wo ye samele be,

²⁷ wo wo ye wôk ô too yôp. Wo ye jamé abé ya bebo bisaé bôé a di ayoñe bôte dôé Israél!

²⁸ Eyoñe mfumbale zaé a ye kui e si. Eyoñe bim a ye kui, nge bidi bia viele a nge sun ja kui, nge bitandak nge bikukum bia kui, éyoñe besiñ ba ye dili ayoñe bôte dôé bita e si jé été, e mimbé mié, éyoñe bibubua a akon mevale mese bia ye kui,

²⁹ e meyeʼelane mese a njaʼan ôse môt éziñ a ayoñe bôte dôé ya Israél ése ba ye liti wo, a kooé na môt ase a yemeya ébubua jé a mintaé mié, a a sameya mo mfaʼa ya Nda nyô,

³⁰ wo wo ye vôʼôlô e yôp vôm ô too; wo ye jamé a bulane môt ase avalʼane mezene mé me né, e wo wo yeme nleme môt ase, amu wo étam wo yeme nleme ya bôt.

³¹ Ndemben ba ye ko wo woñ a wulu e mezene môé nté ôse ba ye nyiñ éfuse si ô nga ve bʼésaa bangan!

³² Avale te fe nneñ, nye a nji bo môte ya ayoñe bôte dôé Israél, éyoñ a ye so e si é nʼôyap, amu jôé dôé e nʼanen, akule wo dôé é ne ngu a e wo wôé ô ne nsaman, éyoñ ba ye zu yeʼelan wo e Nda nyô,

³³ wo wo ye wôk e yôp vôm ô too, nde wo ye ve jôm ése nneñ a sili wo, éyoñe te meyoñ me bôte mese ya si nyô ma ye yeme jôé dôé, asu ya ko wo woñ, avalʼane ayoñe bôte dôé Israél, a éyoñe te ba ye yeme na ba loone jôé dôé e nda me maneya lôñe wo nyô.

³⁴ Eyoñ ayoñe bôte dôé da ye kui a ke wosane besiñe bé, be tôñôk e zene wo ye lôme be; nge ba yeʼelane wo, be fombôʼô mfaʼa ya tisone nyô, nje ô nga top, a mfaʼa ya Nda me maneya lôñe jôé dôé,

³⁵ wo ye wôʼô meyeʼelan a minjaʼane miap ô too yôb a volô be.

³⁶ Eyoñ ba ye bo wo abé , amu teke môt a ne te bo abé , éyoñe wo wôʼô be ôlun a ve be e be besiñ, éyoñe bôt ba ye bi be minkôm ba ye kee be minkôm e si é nʼôyap nge bebé,

³⁷ nge ba bulan e be bebien, be too si ba ye bo minkôm, nge ba bulane be wo a jaʼé wo mam e si be ne minkôm be jôʼô na: Bi boya abé , bi boya bikop, bi boya mbia jam!

³⁸ Nge ba bulane be wo a nlem wob ôse a e nsisime wob ôse, a nge ba yeʼelane wo e si minkôme miap, e vôm be nga kee be minkôm, mesu map me lôô mfaʼa si ô nga ve bʼésaa bap, tison ô nga top a e nda me lôñeya jôé dôé.

³⁹ Wo ye wôʼô meyeʼelane map a minjaʼane miap e yôp vôm ô too, a wo ye volô be. Wo ye jamé ayoñe bôte dôé abé be nga bo wo!

⁴⁰ Eyoñe ji, a Zambe wom, e mise môé me kuibaʼan a melo môé me tame vôʼôlô meyeʼelan ma boban e vôme nyô!

⁴¹ Eyoñe ji, a Zambe a too nnôm éto, kôlôʼô si, zaʼak a tabe e vôme wôé ya awoʼon, womien a éwolo ya ngule jôé. Betuni bôé, a Zambe a too nnôm éto, be jaé nyian ane ngômesan, a bebuni bôé be ntoo ve vak e mvom été.

⁴² A Zambe a too nnôm éto, te ben éñwôé a ne ñwoʼone mbon. Simesaʼane mbamba be mam mese ô nga bo David mbo ésaé wôé.