2 Minkte 4 - Bible en langue Bulu

¹ A nga bo ataʼa metunaʼa mvot, ayap méta awôm, ndam méta awôm, ôyabe yôp méta étan.

² A nga bo mañ me mvot méta étan, ataté akuʼu di a kui di avok, éveʼela jé é too njiñelete, ôyabe yôp tañe méta ébaé a étun, mbômaʼan a too tañe méta awôm a étan.

³ Biveʼela beyôm benyak bi mbe e mañ me mvot mete si, bi bômaʼane me vôm ase. Méta ése é nga bili beyôm benyaʼa bete mewôm mebaé minnoñ mibaé. Be nga bo benyaʼa bete éyoñe fe be nga bo mañ me mvot.

⁴ Mañ me mvot me nga bete e beyôm benyaʼa be mvot awôm a bebaé yôp; belaa yʼété be nga lôô mfaʼa yʼakôé, belaa mfaʼa jôp da dim, belaa mfaʼa ya nké a belaa mfaʼa jôp da tôô, memvuse map ki mfaʼa ya été, e mañ me mvote si.

⁵ Nkuʼu mañ ô mbe afip sentiméta muam. Nka yʼété ô mbe nkôman ane nka beta élaé a ne éveʼela sam ayañ. Be mbe nguleya futi mendim été tañe lita toyini ntet a mewôm mebaé.

⁶ A nga bo befandé awôm a telé betan mbo nnôm, betan mbo ngal asu mewoban; be mbe fe be sôbe mimvean mia diʼibane ngumba été. Mañ me mvot me mbe asu betuni na be woban été.

Biôm bikpwembé bi nga veban

⁷ A nga bo bibeʼe belambe awôm a or, avalʼane njôane yʼété ô mbe. A nga telé bie e beta aba ya nda Zambe, betan e mbo nnôm a betan e mbo ngal.

⁸ A nga bo fe betawôlô awôm a telé fe be e beta aba ya nda Zambe, betan e mbo nnôm a betan e mbo ngal. A nga bo fe bisua bi or ntet.

⁹ A nga bo nseñ asu betuni a e beta nseñ a ne anen, nalé fe mimbé ya nseñ a nga tube mimbôʼô yʼété a mvot.

¹⁰ A nga telé mañ me mvot e mbo nnôme ya nké mfaʼa da tôô.

¹¹ Uram a nga bo memvé, biwôlô asup a bisua ba futi mendim ntuni a miam ataʼa metunaʼa, éyoñe te a nga mane bo ésaé ése njô bôte Solômon a nga bendé nye asu Nda Zambe:

¹² Beta mekôn mebaé me bili biyeyase mendoʼo mebaé e soʼo mekône yôp a mevote mebaé asu ya buti biyeyase mendoʼo bi mbe e mekône yôp,

¹³ bibuma bi grenade mintete minyin asu mevot mebaé; avot ése minnoñ mi grenade mibaé asu ya buti biyeyase mendoʼo ya mekône yôp.

¹⁴ A nga bo bitebaʼa a bo befandé e bitebaʼa yôp;

¹⁵ Mañ me mvot avale dé étam, beyôm benyak awôm a bebaé be too me si.

¹⁶ Nalé fe memvé, biwôlô asup, bilum, biôm bite bise mbie Uram-Abi a nga bo njô bôte Solômon asu Nda Nti, bi mbe mboon a mvot ja ngemban.

¹⁷ Njô bôt a nga bo na be nyemé bie e njeʼese Yordan, e zañe Sukôt a Séréda.

¹⁸ Solômon a nga bo biôm bite étua abui akui vôme ya bo te fe yem abime mvot é mbe.

¹⁹ Solômon a nga bo fe biôm bivoʼo bise asu nda Zambe: ataʼa metunaʼa or; betawôlô e vôm be mbe be betéʼé e belet é nʼétyi;

²⁰ bibeʼe belambe a belambe be nya or bap, mbe be nga yiane baʼé ôsu ya vôm a nʼétyi, avale njôan ô né,

²¹ mesam belambe a mebas me or, or a dañe mfuban .

²² Atyeñ, bisua ba futi mendim betuni ba miam, bilaé, bikanda bi nduan mboon a nya or; bivin bi or asu mbé ya nda été, anyiine vôme yʼétyi ya bityi a asu mbé ya Nda, anyiine ya Nda Zambe.