2 Minkte 36 - Bible en langue Bulu

Yoakaz, njô bôte ya Yuda

¹ Ane bôte ya Yuda be nga nyoñe Yôakaz, e mone Yôzias a telé nye njô bôt éjian ésaa e Yérusalém.

² Yôakaz a nga bili mimbu mewôm mebaé a mila éyoñ a nga tebe njô bôt a a nga jôô ngon éla e Yérusalém.

³ Njô bôte yʼEjipte a nga vaa nye éto e Yérusalém, émien a nga lume si ya Yuda aleman tañe betalañ be argent ntet a talañ or wua.

⁴ Ane njô bôte ya Ejipte a nga telé Eliakim a mbe monyañe Yôakaz, nde a nga tyendé nye jôé a yôlé nye na Yéhôyakim. Ane Nékô a nga nyoñe monyañe wé Yôakaz a kee nye Ejipte.

Yehôyakin, njô bôte ya Yuda

⁵ Yehôyakin a nga bili mimbu mewôm mebaé a mitan éyoñ a nga tebe njô bôt, a a nga jôô mimbu awôm a wua e Yérusalém. A nga bo mam me nʼabé e mise me Nti, e Zambe wé.

⁶ Nébukatnétzar, njô bôte ya Babilôn a nga bet a wosane nye, a kaʼa nye a bibôñeté bi mvot, asu ya kee nye e Babilôn.

⁷ Nébukatnétzar a nga kee biôme ya Nda Nti e Babilôn a futi bie e nda njô bôte jé e Babilôn.

⁸ Mimboon mi Yehôyakin mivok, bʼangôndô be mam a nga bo, a mam me mbe be nye, mam mete me ne ntilan e kalate bejô bôte ya Israél a Yuda. Mone wé Yehôyakin a nga jôô éjiane jé.

Yehoyakim, njô bôte ya Yuda

⁹ Yehôyakin a nga bili mimbu muam éyoñ a nga tebe njô bôt; a nga jôô ngon éla a melu awôm e Yérusalém. A nga bo mam me nʼabé e mise me Nti.

¹⁰ Eyoñe mfefé mbu ô ntoo bebé, njô bôte Nébukatnétzar a nga zuu nye e Babilôn a bidima bi biôme ya Nda Nti. Nde a nga telé Sedékias monyañe Yehôyakin njô bôt e Yuda a Yérusalém.

Sédékias, njô bôt a suʼulan e Yuda; Yérusalém a nyoñeban

¹¹ Sedékias a nga bili mimbu mewôm mebaé a wua éyoñ a nga tebe njô bôt, a nga jôô mimbu awôm a wua e Yérusalém.

¹² A nga bo mam me nʼabé e mise me Nti, Zambe wé; a nji ke sili émiene si asu nkulu mejô Yérémi nyô a nga kobô a jôé Nti.

¹³ A nga bene fe bene njôane Nébukatnétzar njô bôt, nyô a nga bo nye na a kane ngana a jôé Nti; a nga bo ntip a bo fe nleme wé ayet éyoñ a nga yiane bulane be Nti, Zambe Israél.

¹⁴ Bivete bise ya betuni a bôt be nga bo mbia be mame melo, be tôñe bʼangôndô mimboone ya meyoñ; be nga ndaman étyi ya Nda Nti, nje Emien a nga telé étyi e Yérusalém.

¹⁵ Nti, e Zambe bʼésaa bap, a nga taté bene be anyu minlômane mié, amu a nga kômbô nyii bôte bé a Nda jé Emien.

¹⁶ Ve be nga woé minlôman mi Zambe, be nga biasé mejô mé a kobô bekulu mejô bé ébiasé, akekui na ayaa Zambe e bet ayoñe dé nyô a te ke biañ ya jeʼé de.

¹⁷ Eyoñe te Nti a nga bete njô bôte Bekaldééñ a wosane be, a a nga wôé bisoé bendômane biap e nda Zambe a nkpwaté mekôn; a nji nyii toʼo ésoé ndôman, toʼo ésoé ngone minga, toʼo nnôm, toʼo fam é mbili nyube nlô. A nga kee biôm bise e mo mé.

¹⁸ Nébukatnétzar a nga kee biôm bise ya Nda Zambe e Babilôn, benya bôtô a bongô, akume ya nda Nti a akume njô bôt a di bivete bié.

¹⁹ Be nga diʼi Nda Zambe, be nga sôʼôlô akaʼa ya Yérusalém si; be nga diʼi menda me njô bôt mese yʼété e nduan a tyame bidima bi biôm bise.

²⁰ Nébukatnétzar a nga kee ba bese be nga fam nkpwaté mekôn e Babilôn; be nga bo bebo bisaé bé émien a ba be bone bé akekui éyoñ éjôé ya Perse é nga tebe,

²¹ nalé ate nkobô Nti a nga kobô anyu nkulu mejô Yérémi wo ye tôéban na: Si ya Yuda ja ye bo bilik tañe mimbu mewôme zamgbwa, akekui éyoñ awoʼon dé é maneya, mfaʼa ya duan biyoñ ya awoʼon be nji ke semé.

Kalate ôvaʼa ngu Sirus a nga tili

²² Mbu ôsu Sirus, njô bôte ya Perse a nga jôô, nalé nkobô Nti a nga kobô anyu be Yérémi wo ye tôéban, Nti a nga vele nsisime Sirus, njô bôte ya Perse ôyo, nye ve mialan e foé nyô e si jé ése, tyiñe yôp a tili fe na:

²³ Avale di nde Sirus, njô bôte ya Perse a jô na: Nti, Zambe ya yôp, a veya ma bijôé bise ya si, a a veya ma ésaé ya lôñe nye nda e Yérusalém Yuda. Za ya be mia a ne môte ya ayoñe dé ete? Nti, e Zambe wé, a tabeʼe be nye a a ntoo ve bet a ke Yérusalém.