2 Minkte 35 - Bible en langue Bulu

Abôʼô Pak, awu Yôzias

¹ Yôzias a nga bo abôʼô Pak e Yérusalém asu duma Nti, a be nga tyiʼi éyeme Pak e ngon ôsu é too melu awôm a menyin.

² A nga telé betuni e bisaé biap a yemete be ngu mfaʼa ésaé ya nda Nti.

³ A nga jô Belévit be nga bo ésaé ya yeʼele Israél ase a e mbe be nga vebane be Nti na: Bôʼan éwolo é nʼétyi e nda Solômon mone David, njô bôte ya Israél a nga lôñ; mi nji yiane beta beʼe je bituu. Eyoñe ji, boʼone Nti, e Zambe wônan bisaé, a ayoñ Israél dé.

⁴ Boʼone ngômesane ane menda me bôte menan me né, ane minsamba mienan mi né, aval ane kalate David, njô bôte Israél a né, avalʼane nkômane mame mone wé Solômon ô né.

⁵ Tebaʼan e vôm a nʼétyi ane mevale menda me bôte bobenyoñ, bone yʼayoñ me né, a avalʼane menda me bôte Belévit me ne nkabane minsamba.

⁶ Tyiʼan éyeme Pak, tunane miabebien a kômesane Pak asu bobenyoñ éyoñe mia bo avale nkobô Nti a nga kobô Môze ô né.

⁷ Yôzias a nga nyoñ e mimbame mié été, bone mintômba a bikela toyini mewôm mela, a ve be ane biyeme ya Pak, asu bôte bese be nga too valé, nalé fe benyaʼa toyini élaa.

⁸ Bivete bié fe bi nga bo nalé te ntindan asu bôt, betuni a Belévit. Ilkiya, Zakari a Yehiel, betebʼôsu ya Nda Zambe, be nga ve betuni bityiʼa asu Pak: bone biyem toyini ébaé a mintete misaman a biyem bi nʼanen (benyak) mintete mila.

⁹ Konaniahu, Semaéyahu a Netanéel, bobenyañe bé: Akabiahu, Yeiel a Yôzabad, bivete Belévit, be nga nyoñ, asu Belévit, bone bityiʼa asu Pak toyini étan a beta biyem mintete mitan.

¹⁰ Esaé é nga kômban, a betuni be nga tebe tetele ba be Belévit, avalʼane minsamba miap mi mbe a avalʼane abendé njô bôt e mbe.

¹¹ Be nga tyiʼi Pak; betuni be nga miam metyi be nga nyoñ e mo Belévit, a Belévit be nga soé bityiʼa bikôp.

¹² Nde be vaa mimvean mia diʼibane ngumba a ve mie menda me bôte ya ayoñ na be liti mie Nti, avalʼane é ne ntilan e kalate Môze; avale te fe e nga boban mfaʼa beta biyem.

¹³ Be nga bo na be yame Pak e nduan, avale nyeʼelan ô né, a be nga bo na be yame biôm bi nʼétyi e be mbômeyô été, e be minkeññ a e befandé été; a be nga kabe bie mbile mbi e be bôte bese ya ayoñ.

¹⁴ Wôna be nga yame ngabe jap a nyô betuni, amu betuni; bone bʼAron, be nga bo ésaé ya ve mimvean mia diʼibane ngumba, a mevoñ a kui e zañ alu; ajô te Belévit be nga yame ngabe jap a nyô betuni bone bʼAron.

¹⁵ Beyia bia, bone bʼAsaf be nga too vôme wop, ane abendé David e mbe, nalé fe di Asaf, Héman a di Yedutun, ñyene mame njô bôt a bebaʼale mimbé, be mbe be tele e mbé ôse; be nji fe bi afôla ya beta liʼi ésaé jap, amu e bobenyañ bap, Belévit, be nga yame bidi bi mbe ngabe jap.

¹⁶ Avale te nde ésaé ése Nti é nga kômbane môs ôte asu ya jeme Pak a ve mimvean mia diʼibane ngumba ataʼa metunaʼa Nti yôp, ane abendé njô bôte Yôzias e mbe.

¹⁷ E bone bʼIsraél be nga too valé be nga jeme Pak éyoñe te a abôʼô belet é nji bi mvusu tañe melu zamgbwa.

¹⁸ Avale Paʼa te é nji tame jemban e Israél ataté melu me nkulu mejô Samuel. Teke wua ya bejô bôte ya Israél a nga jeme Pak é funaʼane nyô Yôzias, betuni a Belévit a Yuda ase a ba bese ya Israél be nga too valé, a bôte be too Yérusalém.

¹⁹ Pak éte é nga jemban e ngon awôm a muame ya njôane Yôzias.

Amané ya njôane Yôzias

²⁰ Eyoñe mam mete mese me nga man, éyoñe Yôzias a maneya beta kôme Nda Nti, Nékô, njô bôte yʼEjipte, a nga bet asu ya ke wosan e Karkémis, ôsôé Efrat. Ane Yôzias a nga ke tôbane nye.

²¹ Nde Nékô a nga lôme nye bekate mbañete be kate nye na: Bia wo bi ne za ajôô, a njô bôte ya Yuda? Me nji zu dene na me wosane wo; ve ma zu wosane nda bôte bia je bi bili bita. Zambe a te jô me na me bo avô. Te tebe Zambe ngame yat, nye a ne ngame jam, a za tyame wo.

²² Ve Yôzias a nji ke saʼale nye, nde a nga tyendé mengômesan asu ya wosane nye, teke vôʼôlô mejô me Nékô, mme me nga so anyu Zambe. Nde a nga zu wosan e mbiʼili Megidô.

²³ Ane bewua bilaé be nga wua bibaé bi élaé e nyôle Yôzias, nde njô bôt a nga jô bebo bisaé bé na: Bekaʼane ma, amu me bili abé abui.

²⁴ Ane bebo bisaé bé be nga beʼe nye a vaa nye e vagoñe wé, be futi nye e vagoñe baa wé a kee nye e Yérusalém. Yuda ase a Yérusalém be nga jaé meyeb me Yôzias.

²⁵ Yérémi a nga té ngume jia asu Yôzias; beyia bia bese, befam a binga, be nga kobô ajô Yôzias e bia bi ñyône biab été a kui môse wu, a be nga bo de mvinda Israél. Bia bite bi ne ntilan e kalate miñyôn été.

²⁶ Mimboon mi Yôzias mivok a zôsôa mboone mame wé, ane mam me ne ntilane e metiñ me Môze me né,

²⁷ Mimboone mié ya atataʼa a mi mia suʼulan, mi ne ntilan e kalate bejô bôte ya Israél a Yuda.