2 Minkte 34 - Bible en langue Bulu

Yôzias, njô bôte ya Yuda

¹ Yôzias a nga bili mimbu muam éyoñ a nga tebe njô bôt a a nga jôô mimbu mewôm mela a wua e Yérusalém.

² A nga bo mam me ne mvaé e mise me Nti a wulu e mezene me David ésaa wé. Teke liʼi me mbo nnôm nge mbo ngal.

³ E mimbu muame ya njôane wé, valé a ngenan ésoé, a nga taté na a jeñ e Zambe David ésaa wé; e mbu awôm a baa ñwô a nga taté na a fubu Yuda a Yérusalém ajô bito ya bikôndôʼô yôp, mekône mʼakéra, biveʼela bezambe a bengunemelan be ne mboon a nyeman étyé.

⁴ Be nga sôʼôlô metaʼa metunaʼa Bebaal si émien a too, a nga baʼé fe biôme ba diʼi beôlobinda bi mbe été yôp; a nga buʼu mekône mʼakéra, bengunemelan be ne nkpwelan a ba be ne mboon a nyeman étyé, a nga diʼi be be bo vʼasub asup, a kut asube te e mesoñe ba be nga tyiʼi be biôm;

⁵ A nga diʼi bivese betuni e metaʼa metunaʼa mabe yôp. Avale te nde a nga fubu Yuda a Yérusalém.

⁶ E bitisone bi Manasé, Efrayim, Siméon a kui Néftali, e biliʼi biab été, mbômaʼan, a nga sôʼôlô metaʼa metunaʼa si,

⁷ a nga sañ mekôn mʼakéra a bengunemelan be ne nkpwelan bifuse bifus a bo bie asup; a nga baʼé bengunemelane ya kañe jôp e si ése ya Israél. Mvus éte nje a nga bulan e Yérusalém.

⁸ Mbu awôm a muame ya njôane wé, a nga lôme Safan, mone Atsaliahu, Maséyahu évete tison a Yôa mone Yôakaz, mbaʼale mintilan na be kôme Nda Nti e Zambe wé, asu ya fubu si ya Yuda a Nda Zambe.

⁹ Nde be nga ke be njôô betuni Ilkiya, a be nga soo e moné bôt be nga ve Nda Zambe, nye Belévit be ne bebaʼale mimbé be nga nyoñ ataté Manasé, Efrayim, a Israél mboʼo ase, a Yuda ase a Bényamin; éyoñe te be nga bulan e Yérusalém.

¹⁰ Be nga kalane nye e mo me ba be nga bili mbeʼe ya bo ésaé e Nda Nti. Balé ki be nga kalane nye e be bôte bebien be nga bo ésaé, be saék e nda Nti mfaʼa ya yemete a kôme Nda;

¹¹ balé bete ki be nga ve nye bebo biôm, belôñe menda, asu ya kuse mbaane mekok a bilé bi ne asu ya late nda , a asu ya bo mendile menda bejô bôte ya Yuda be nga tyam.

¹² Bôte bete be nga bo ésaé mvoʼé . Be mbe éjôé Yahat ba Abdias si, Belévit ya bone be Merari, nalé fe éjôé Zakari a Mesulam si, Belévit ya bone be Kehat, mbe be nga bili ésaé ya fombô avalʼésaé ja wulu.

¹³ Belévit bete bese be mbe mintyetyeñe bebôme mezik. Be nga bili ésaé mimbeʼe be nga fombô fe ba bese ba bo ésaé, akôlô ésaé ji a kui ji évok; Belévit befe be mbe beyeme bekalate, bivet a bebaʼale mimbé.

Kalate metiñ e nda Zambe été

¹⁴ Eyoñ be nga kuli e moné bôt be nga ve Nda Nti atan, ntuni Ilkiya a nga some kalate metiñe Nti a nga ve Môze.

¹⁵ Nde Ilkiya a nga jô Safan, ñyeme bekalate na: Me someya kalate metiñ e Nda Nti. Ane Ilkiya a nga ve Safan kalate.

¹⁶ Safan ki a nga zuu kalate e be njô bôt a kate fe nye mame ya ésaé a jôʼô na: Bebo bisaé bôé be maneya bo jam ése be nga bendé be;

¹⁷ be maneya ve moné a mbe e Nda Nti a kalane nye e mo betebʼôsu a e bôt ba bo ésaé.

¹⁸ Safan, ñyeme bekalate a nga kate fe njô bôte na: ntuni Ilkiya a te ve ma kalate éziñ. Nde a nga lañe nye njô bôt a too.

¹⁹ Eyoñe njô bôt a nga wôʼô mejô ya metiñ, a nga nyabe mengômesane mé.

²⁰ Ane njô bôt a nga bendé Ilkiya, Ahikam, mone Safan, Abdon, mone Miké, Safan ñyeme bekalate a Asaya mbo ésaé njô bôte na:

²¹ Kela yemelane nkômbane Nti asu dam a asu mebukaʼa me Israél a Yuda ajô mejô ya kalate a te some nyô, amu ayaa Nti é maneya sôébane be bia di e ne anen, amu bʼésaa bangan be nji ke baʼale nkobô Nti a bo aval ése é ne ntilan e kalate nyô.

²² Ane Ilkiya a ba njô bôt a nga liti, be nga ke be nkulu mejô minga, Ulda, nga Kalum, mone Tôkehat, mone Asra, mbaʼale mengômesan. A nga too Yérusalém, e mfefé tison. Be nga kobô nye avale e mbe njôan.

²³ A nga jô be na: Avale di nde Nti, Zambe Israél a jô na: Katane môt a te lôme mia be ma na:

²⁴ avale di nde Nti a jô na: Ma ye zuu bidim e vôme nyô a e be bôt be too été avalʼane biyoʼé bise bi ne ntilan e kalate ba te lañe njô bôte ya Yuda bi né.

²⁵ Amu be liʼiya ma a diʼi bezambe befe beôlobinda; asu ya bo me na me wôʼôlun a mimboone mise ya mo map, nde ayaa dam é sôébaneya e vôme nyô, a da ye bo teke dim.

²⁶ Ve mia ye jô njô bôte ya Yuda a te lôme mia mi yemelane nkômbane Nti na: Avale di nde Nti, Zambe Israél a jô ajô ya mejô wo te wôʼô na:

²⁷ Amu mejô mete ma te bi wo nlem , amu wo te suu womiene si asu Zambe éyoñ wo te wôʼô mejô mé ma wosane vôme nyô a bôt be too été, amu wo te suu womiene si asu dam, amu wo te nyabe mengômesane môé a yôn asu dam, me fe me wôʼôya, nalé Nti a jô.

²⁸ Ma ye nyoñe wo e vôme bʼésoo be né, wo ye nyoñebane mvoʼé e soñe jia ya mesoñe môé, a mise môé ma ye bo te yene bidime bise ma ye zuu bie vôme nyô a bôt be too été. Nde be nga ke kate njô bôt éyalane te.

Yuda a vumelan élate ba Zambe

²⁹ Ane njô bôt a nga lôme tyiñe na be sulane bemvendé bese ya Yuda e Yérusalém.

³⁰ Wôna njô bôt a nga bete nda Nti, a bôte bese ya Yuda a e bôt be too Yérusalém, betuni, Belévit a bôte bese, ataté bôbenen a kui ba be ne tyôtyoé. A nga lañe mejô mese ya kalate élat be nga some Nda Nti e melo map.

³¹ Njô bôt a nga tele vôme wé asu Nti, nde a nga bo élate te é too na: A tôñe Nti a baʼale mebendé mé, memvinda mé a minjôane mié a nleme wé ôse a ényiñe jé ése, a bo avalʼane mejô yʼélat me ne ntilane kalate ate me né.

³² A nga bo na e bôte bese be nga too Yérusalém a e Bényamin be nyiin élate te; a e bôt be too Yérusalém be nga bo avalʼane élate Zambe, e Zambe bʼésaa bap é né.

³³ Yôzias a nga vaa bʼangôndô be biôm be nga so mesi mese be too asu bone bʼIsraél. A nga tindi e bôte bese be nga too Israél toʼo ba kañese nge bene na be bo Nti, e Zambe wobe bisaé. Nté ôse a nga vee, be nji ke ke Nti, e Zambe bʼésaa bab ôyap.