2 Minkte 33 - Bible en langue Bulu

Ejôé Manasé

¹ Manasé a nga bili mimbu awôm a mibaé éyoñ a nga tebe njô bôt, a nga jôô mimbu mewôm metan a mitan e Yérusalém.

² A nga bo mam me ne abé e mise me Nti. A nga vu bʼangôndô be mam meyoñe Nti a nga wôlé biôm ôsu bone bʼIsraél be nga bo.

³ A nga beta lôñe bito ya bikôndôʼô yôp, mbie ésaa wé Ezékias a nga tyam, a nga lôñe Bebaal metaʼa metunaʼa, a nga telé mekône mʼazezambe a nga kute meboñe si ôsu ya nsamba ateté ya yôp a kañe wô.

⁴ A nga lôñe metaʼa metunaʼa e Nda Nti a nga jô na: Jôé dam da ye tabe Yérusalém nnôm éto.

⁵ A nga lôñ ateté ése ya yôp metaʼa metunaʼa e minseñe ya Nda Nti.

⁶ Emien a nga diʼi bone bé nduan e mbiʼili Bén-Inom, a nga bo majik a ngbwee; a nga telé bebiʼi bekôn a mimvimviʼi; a nga soñe Nti nté ôse a nga ke ôsu a bo mam me nʼabé e mise mé.

⁷ A nga telé ngunemelan é ne nkpwelan a nga bo e Nda Zambe; e too ke na Zambe a nga jô David a mone wé Solômon na: E Nda nyôna a e Yérusalém me nga tobe e meyoñ mese yʼIsraél été na ma ye futi jôé dam nnôm éto.

⁸ Ajô te ma ye bo te beta kee Israél ôyab a si me nga ve bʼésaa, nge ba bômbô évévé ya bo mam mese me nga liti be e be Môse: metiñe mese, memvinda a minjôan.

⁹ Manasé a nga yale Yuda a bôte be too Yérusalém fé a kui na be nga bo abé a dañe meyoñe Nti a nga jian ôsu ya bone bʼIsraél.

¹⁰ Ane Nti a nga kobô Manasé a ayoñe dé, ve be nji ke tabe ntyee.

¹¹ Ajô te Nti a nga zuu bivete ya nsamba mewosane njô bôte ya Asiri na bi wosane be; be nga bi Manasé a menen mʼakop, be kaʼa nye a ngôkobe mvot é ne mimbaʼa mibaé a kee nye Babilôn.

¹² A too ôlune wé été, nde a nga jeʼe Nti, e Zambe wé, amu a nga sili émiene si beta nsilan ôsu Zambe bʼésaa bé,

¹³ a a nga yeʼelane nye. Nde a nga kañese, ve wôʼô meyeʼelane mé a bo nye na a beta zu e Yérusalém a kee éjôé ôsu. Eyoñe te Manasé a nga yeme na Nti Nye a ne Zambe.

¹⁴ Eyoñe mam mete me maneya a nga lôñ akak atane ya tisone David, e Gihôn mfaʼa jôp da tôô, e mbiʼili, a kui anyiine mbé bekos; akaʼa te e mbe e bômaʼan Ofel, a a nga bete de ôyabe yôb abui; a nga futi bivete bezimbi e bitisone bise ya Yuda bi bili alem.

¹⁵ A nga vaa bezambe bikuu a éveʼela jé e Nda Nti, nalé fe metaʼa metunaʼa mese a nga lôñ e nkôle ya Nda Nti a e Yérusalém; a nga wua me e tison atan.

¹⁶ A nga lôñ ataʼa metunaʼa Nti, a nga tyiʼi mimveane ya nlatane ngbwa a mvean akéva été yôp, a a nga jô Yuda na a bo Nti, Zambe ya Israél ésaé.

¹⁷ Ve bôt be nga ke ôsu a beta tyiʼi biôm e bito bikôndôʼô yôp, ve be tyiʼi bie foʼo vʼasu Nti e Zambe wop.

¹⁸ Mimboon mivoʼo Manasé, meyeʼelan a nga yeʼelane Zambe wé, mejô beyene mam be nga kobô nye a jôé Nti, Zambe Israél, me ne ntilan, e mimboone bejô bôte ya Israél.

¹⁹ Meyeʼelane mé a avale Zambe a nga yalane nye, abé dé a melo mé, mevôm a nga lôñe bito bikôndôʼô yôp a telé mekôn mʼAkéra a biveʼela bi ngunemelan , te na a sili émiene si, mam mete me ne ntilan e kalate Hôzayi.

²⁰ Manasé a nga bômbô vôme wua ba bʼésaa, be nga jame nye e nda jé. E mone wé Amon a nga jôô éjiane jé.

Amon njô bôte ya Yuda

²¹ Amon a nga bili mimbu mewôm mebaé a mibaé, éyoñ a nga tebe njô bôt; a nga jôô mimbu mibaé e Yérusalém.

²² A nga bo mam me nʼabé e mise me Nti, aval ésaa wé Manasé a nga bo; a nga tyiʼi bengunemelane bese ésaa wé a nga bo biôm a kañese be.

²³ A nji suu émiene si ôsu Nti avale Manasé ésaa wé a nga bo, ve nye, Amon, a nga bo mame ya dañe ve émiene mekua.

²⁴ Bebo bisaé bé be nga bôndé feʼe ya bo nye abé a wôé nye e nda jé.

²⁵ Ve bôte ya si Yuda be nga wôé ba bese be nga bôndé feʼe ya bo njô bôt Amon abé , a be nga telé mone wé Yôzias éjiane jé.