2 Minkte 32 - Bible en langue Bulu

Senakérib a kui Yuda bita

¹ Eyoñe mam mete a mbamba mimboon mite bi maneya, njô bôte ya Asiri, Senakérib, a nga zu Yuda a vule minkane ya wosane bitison ya Yuda bi bili alem na a nyoñe bie.

² Eyoñ Ezékias a nga yen ane Senakérib a zu, a bili ôvañe ya wosane Yérusalém,

³ nde a nga bo ésok ba be bivete bié a mimbene mié ya mewosan, ane be ne dibe menjeñe mendim me ne e Yérusalém atan.

⁴ Ane be nga volô nye a nsamba bôt ô nga sulan; nde be nga dibe menjeñ mendim mese a ôtôñ ô mbe ô lôtôk e temeteme si éte. Be nga sili na: Amu jé bejô bôte ya Asiri ba ye koon abui mendim éyoñ ba ye suan?

⁵ Ajô te Ezékias a nga yemete éjôé jé; a nga beta lôñ akaʼa ése e nga too ntyaman, a bete de a kui azomezome menda bemombô ba tabe; a nga lôñ ataʼa afe atan; a nga beta kôme Milô e tisone David été ngu; a nga bo bôte na be lui nye abui mekoñ a biben.

⁶ A nga telé bivete bezimbi e be bôt, a kôane be e fefele jé, vôme mbé yʼakak ô né. Nde a nga ve be ngule nyô a jôʼô be na:

⁷ Yemane ngu a bo ayok! Te koone woñ nge fôʼôban ôsu njô bôte ya Asiri a ôsu ézuʼu bôt é ne nsamba wé, amu bi bili ngu mfaʼa wongan a dañe mfaʼa wop;

⁸ e ngame jé é bili ve nsamba mewosane môta binam, ve bia, bi bili Nti, e Zambe wongan, Nyô a ye volô wosan asu dangan. Ane mejô me Ezékias njô bôte ya Yuda, me nga ve bôte ngule nyô.

Mbañete Njô bôte Senakérib a lôme bôt be too Yérusalém

⁹ Eyoñe mam mete me maneya, nde Senakérib, njô bôte ya Asiri, a nga lôme bebo bisaé bé Yérusalém (valé a too tisone Lakis a nsamba mewosane wé ôse); a nga lôme be e be Ezékias, njô bôte ya Yuda a e be ba bese ya Yuda be mbe Yérusalém, asu ya kate be na:

¹⁰ Avale di nde Senakérib, njô bôte ya Asiri a jô na: Tine ya ndi jenan é ne jé ane mia kañese tabe Yérusalém mbômaʼan a bita?

¹¹ Ye Ezékias a nji duʼu mia a kômbô na mi wu zaé a évé éyoñ a jô na: Nti, e Zambe wongan, a ye kôté bia e mo me njô bôte ya Asiri?

¹² Ye sa Ezékias nye a nga tyame bito ya bikôndôʼô yôp a metaʼa metunaʼa me Nti, a ye sa nye a nga jô Yuda a Yérusalém na: Mia ye kute meboñe si vʼataʼa metunaʼa da ôsu, a mia ye diʼi beôlobinda été yôp?

¹³ Ye mi ne mesi mevok, mamien a bʼésaa bam? Ye bezambe meyoñe ya mesi mete be nga bi foʼo nguleya kôté mesi map e mo mam?

¹⁴ Mbé, e bezambe bese ya meyoñe mete, mme bʼésaa bam be nga jiane ne meñ, a nga bo ngule ya kôté bôte bé e mo mam, ane e Zambe wônan a ne ngule ya kôté mia e mo mam?

¹⁵ Ajô te te bunane meduʼan mʼEzékias avale te! Te bunane nye, amu teke Zambe ya ayoñ éziñ, nge éjôé éziñ, a ne ngule ya kôté ayoñe bôte dé e mo mam a e mo bʼésaa bam, avale te fe bezambe benan be se nguleya kôté mia e mo mam!

¹⁶ Ane bebo bisaé be Senakérib be nga ke ôsu a kobô Zambe, Nyô a ne Nti ésas a Ezékias mbo ésaé wé,

¹⁷ wôna Senakérib a nga tili bekalate ya soñe Nti, Zambe Israél, a kobô nye nkpwala a jôʼô na: Avale bezambe meyoñe ya si nyô be nga bo te kôté meyoñe map e mo mam, avale te fe Ezékias a ye bo te kôté bôte bé e mo mam.

¹⁸ Bebo bisaé be Senakérib be nga yôtane tyiñe yôp, e nkobô Beyude, e be bôte ya Yérusalém be nga too akaʼa yôp, asu ya sise be na be ko woñ, ndemben ba ye nyoñe tison.

¹⁹ Be nga kobô ajô Zambe ya Yérusalém ane nyô a kobô ajô bezambe meyoñe ya si nyô, mbe be ne mboon a mo me bôt.

²⁰ Ane njô bôt Ezékias a nkulu mejô Ezayi, e mon Amots, be nga yeʼelan asu jame te a yône yôp be Zambe.

²¹ Nde Nti a nga lôme éngele, nye ve mane wôé biwôlô bewosan bise, bivete bezimbi a e bôt be bili beta bito e minkan mi njô bôte ya Asiri. Nde a nga jibi bulan e si jé asu njalan a ôson, a éyoñ a nga nyiin e nda Zambe wé, bone bé bebien be nga wôé nye a nkpwaté mekôn.

²² Avale di nde Nti a nga nyii Ezékias a bôt be too Yérusalém e mo me Senakérib njô bôte ya Asiri a e mo besiñe bé bese, ane a nga ve be mvoʼé mimfaʼa mise.

²³ Bôt abui be nga zuu mimvean e Yérusalém asu Nti, a memvaka asu Ezékias njô bôte ya Yuda, nye meyoñ mese me nga dañe nyeʼe ataté éyoñe mam mete me nga boban.

Amané ya éjôé Ezékias

²⁴ Melu mete, Ezékias a nga too bebé ya wu; nde a nga yeʼelane Nti a Nti a nga yalane nye a ve nye ndi nleme ya na a ye yet,

²⁵ Ezékias a nji bo avale da yian a mvaé a nga nyoñe be Zambe, a amu mebune ya nleme wé, a nga dutu ayaa be émien, e be Yuda a Yérusalém.

²⁶ Vʼakôsa bo mebune ya nleme wé, Ezékias a nga sili émiene si nalé fe e bôt be nga too Yérusalém, ajô te ayaa Nti é nji ke zu be be nté ôse a nga vee.

²⁷ Ezékias a nga bi étua abui akum a duma; a nga kôme mevôme ya naane argent, or, mekoʼo me nʼédima, bityitaʼa, biben a biôme bi ne tañ anen mevale mese.

²⁸ Nalé fe mevôme ya nane blé, woon a mbon; mevôme mevale biyem mese ma di, a mebemba asu mimbame biyem.

²⁹ A nga lôñ émiene bitison a a nga bili mintômba, bikela a benyak abui abui, amu Zambe a nga ve nye étua abui akum.

³⁰ Ezékias a nga dibe vôme mendime ya Gihôn akôé ma kui a véé me e nkôle si mfaʼa jôbe da tôô e tisone David. Mam mese Ezékias a nga bo me nga wulu mvoʼé .

³¹ Eyoñe biwôlô bi bôte ya Babilôn bi nga zu jome nye asu ya yem étua jam é nga boban e si, éyoñe te Zambe a nga liʼi nye a futi nye meveʼele asu ya yem e mam mese a nga bili nleme wé été.

³² Mimboone mivoʼo Ezékias a nga bo, mi ya mbunane wé, mi ne ntilan e ñyenane nkulu mejô Ezayi e mone Amots, a kalate bejô bôte ya Yuda a Israél.

³³ Ane Ezékias ba bʼésaa be nga bômbô vôme wua; be nga jame nye bebé e zene ja bete mesoñ me bone be David; éyoñ a nga wu Yuda ase a e bôt be too Yérusalém be nga wumulu nye. E mone wé Manasé a nga jôô éjiane jé.