2 Minkte 31 - Bible en langue Bulu

Ezékias a beta kôm ésaé betuni

¹ Eyoñe mam mete me nga man, bôte bese ya Israél be nga too be nga so e bitisone ya Yuda a buʼu mekône mʼazezambe a baʼé fe mekône mʼAkéra, a sôʼôlô bito bise ya bikôndôʼô yôbe si; nalé fe metaʼa metunaʼa ya Yuda ase a Bényamin, Efrayim a Manasé. Eyoñe te bone bʼIsraél bese be nga bulan e bitisone biap.

² Ane Ezékias a nga telé betuni a Belévit ane minsamba miap mi né, môt ase avalʼane ésaé jé é né, betuni a Belévit asu mimvean ba diʼi ngumba, mimvean ya nlatane ngbwa, ésaé nkañan, asu mebôk a bia ya ékañaʼa, e mimbé ya minkane mi Nti.

³ Njô bôt a nga ve ngab akume dap asu mimvean mia diʼibane ngumba, mi ya mametyé a mamengôʼé, a mi ya Sabat, meté me ngon a mebôk , aval é ne ntilan e metiñ me Nti.

⁴ A nga jô ayoñ a e bôt be too Yérusalém na be ve e ngap ja yiane betuni a Belévit.

⁵ Eyoñ nkobô wuna ô nga mialan, bone bʼIsraél be nga ve bembômô be fôn, mfefé woon, mbon, wôé a biôm bise bia yô afan abui abui; be nga soo fe ngab awômô ya biôme bise.

⁶ Avale te fe bone bʼIsraél a Yuda be nga too e bitisone ya Yuda be nga ve ngab awômô ya beta mimbame biyem a bone mimbame biyem, a ngab awômô ya biôm bi nʼétyi mbie bi nga veban asu Nti e Zambe wop, a mbie be nga bo abui mevis.

⁷ Be nga taté mbôane mevis e ngone lale, a man e ngone zamgbwale.

⁸ Ane Ezékias ba be bivete bié be nga zu yene mevis a botane Nti a ayoñe bôte dé Israél.

⁹ Nde Ezékias a nga sili betuni a Belévit minsili ajô mevise mese.

¹⁰ Eyoñe te ntuni nnen Azariahu ya nda Sadok a nga yalane nye na: Nté ane be nga taté na ba zuu biôm ba kandé e Nda Nti, bi kusa di biôm mebum me kui bia minlem, mebukaʼa me ne fe vʼabui abui, amu Nti a maneya botan e bôte bé; abime da bebe yôp nde é ne ntaʼane mevise ma.

¹¹ Ane Ezékias a nga ve abendé na be kôme bitune bi nda e Nda Nti; nde be nga kôme bie.

¹² Ane be nga soo biôme bi mbe nkandan, ngab awômô a biôme bi nʼétyi avale bi mbe. Mone lévit jôé na Kônaniahu nye a nga baʼale bie, ba monyañe wé Siméyi a too baʼa.

¹³ Yehiél, Azaziahu, Nahat, Asaél, Yérimôt, Yôzabad, Eliél, Yismakiahu, Mahat a Benayahu, be mbe befombô ésaé, Kônaniahu a monyañe Simeyi be too be bivet, avalʼane abendé njô bôt Ezékias a Azariahu, évete ya nda Zambe é mbe.

¹⁴ Mone Lévit jôé na Koré, e mone Yimna, mbaʼale mbé ya jôp da tôô, a nga baʼale mimvean mia veban ane nlem wo kômbô, mie be nga ve Zambe, asu ya kabe biôm ba kandé mfaʼa Nti a biôme bia dañ étyi.

¹⁵ E bitisone betuni: Eden, Minyamin, Yasua, Semaéyahu, Amariahu a Sekaniahu be nga tele nye mefefe asu ya kabe bobenyañe biôme mvoʼé , benya bôtô a bongô, avalʼane minsamba miap mi né,

¹⁶ Ataté ba be mbe nlañan be too mimbu mila a lôte valé, a kui ba bese be mbe be nyiʼine Nda Nti môs ôse asu ya bo ésaé, avalʼane biyoñ bi ésaé biap a minsamba miap bi né;

¹⁷ be nga ve fe betuni be mbe nlañan, ane menda me bôte map me né, nalé fe Belévit, ataté mimbu mewôm mebaé, a lôte valé, avalʼane biyoñ bi ésaé biap bi ne ntelan a avalʼane minsamba miap mi né,

¹⁸ be nga ve fe ékôane bôt ése é nga lañeban, a bendaé bap bese e binga bap, bobefame bap a bobebinga, amu be nga ve bebien ngumba asu ésaé ya vôm a nʼétyi.

¹⁹ Mfaʼa bone bʼAron, betuni mbe be nga too afan, mefôla ma bômane bitisone biap, tison ése é nga bili mingum mi bôt, be loʼone be a môé map, asu ya ve bôte bese mengap e betuni été; be nga ve fe Belévit be nga lañeban mengap.

²⁰ E jam Ezékias a nga bo e Yuda ase été nde le; a nga bo ane mvaé, zôsôô a bebela bi né, e mise me Nti, e Zambe wé.

²¹ Esaé ése a nga bo été asu nkañane ya Nda Zambe, metiñ a mebendé, a jeñe Zambe, a nga bo je a e nleme wé ôse, a mam me nga wulu nye mvoʼé .