2 Minkte 28 - Bible en langue Bulu

Akaz, njô bôte ya Yuda

¹ Eyoñ Akaz a nga tebe njô bôt, a nga bili mimbu mewôm mebaé. A nga jôô mimbu awôm a misaman e Yérusalém. A nji bo mam me ne mvaé e mise me Nti, avale David ésaa wé a nga bo.

² A nga wulu e mezene bejô bôte ya Israél, a nga bo bo bengunemelan asu Bebaal.

³ A nga diʼi beôlobinda e mbiʼili bone be Inom, a nga diʼi bobefame bé nduan, a tôñe bʼangôndô mimboone meyoñe Nti a nga titan ôsu bone bʼIsraél.

⁴ A nga ve bityiʼa a beôlobinda e bito ya bikôndôʼô yôp, e minkôle yôp a e élé ése é ne nyumi si.

⁵ Nti, e Zambe wé a nga ve nye e mo me njô bôte ya Siri; Besirieñ be nga bôé nye a bi abui bôte ya ngame jé mimbôk, a kee mie Damas. A nga keebane fe e mo me njô bôte ya Israél, nyô a nga dañe nye bita beta ndañan.

⁶ Péka, e mone Remaliahu, a nga wôé môse wua, bôte ya Yuda toyini ntet a mewôm mebaé, bese biwôlô bi bôt, amu be nga liʼi Nti, Zambe bʼésaa bap.

⁷ Zikri, mbene ya Efrayim, a nga wôé Maséyahu, e mone njô bôt, a wôé fe Azrikam, njôô ya nda njô bôt a Elkana baʼa njô bôt.

⁸ Bôte ya Israél be nga bi mimbôk e be bobenyañe ya Yuda bôte toyini mintete mibaé: binga, bobefam a bobebinga be nga nyoñe be abui akum. Be nga kee akume te e Samari.

⁹ Nkulu mejô Nti a nga too wé jôé na Obéd. A nga zu tôban e nsamba bita ô nga bulane Samari. A nga jô be na: Mi lôô na ayaa dé été nde a yaa Yuda, Nti, Zambe bʼésoo benan, a veya be e mo menan, a mi maneya wôé bevoʼo yʼété a abui njet nje é beteya éduñ a kui yôp.

¹⁰ Eyoñe ji mia jô na bone be Yuda a Yérusalém bete mia zu veñesane be bebo bisaé befam a bebo bisaé be binga benan! Ve da na ye mia fe mi nji bi mekua e be Nti Zambe wônan?

¹¹ Eyoñe ji, vôʼôlaʼane ma, mia yiane suu minkôm mi maneya bi e bobenyoñ été mi bulan e male map; amu mbia ayaa Nti a ne be mia.

¹² Bôte bevoʼo ya ba be mbe bivete ya bone bʼEfrayim môé na: Azariahu e mone Yôhanañ, Bérékiahu e mone Mekilémôt, Ezékias e mone Kalum a Amasa e mone Adlayi, be nga tebe ba be nga so bita ngame yat.

¹³ Be nga jô be na: Mia ye bo te nyiñeli minkôm mite vana, amu mboone te ô ne asu ya ve bia mekua e mise me Nti, mia kobô ajô ya kôʼôlan abé dangan a bikobe biangan; amu ékobe jangan é ne adit a ayôñ yʼayaa dé é ne nyôl Israél.

¹⁴ Eyoñe te bezimbi be nga suu mimbôk a akum ôsu bivet a ékôane bôt ése.

¹⁵ E bôt be nga loon a biyôlé biap be nga tebe a nyoñe mimbôk; be nga belan akum asu ya jalé e bôt be mbe soé biôm; be nga ve be biôme ya jaé a besilefas, be nga ve be bidi a menyu, be nga sôbe be meveñ, be nga nyoñe ba bese be mbe te nguleya wulu a beté be bijakase yôp, a kee be Yérikô, tisone melen, e be bobenyañ. Mvuse valé, be nga bulan e Samari.

Akaz a sili mvolan Asiri

¹⁶ Melu mete, njô bôt Akaz a nga lôme nsili mvolan e be bejô bôte ya Asiri.

¹⁷ Ane Beédomite be nga beta zu, a bôé Yuda a kee nye minkôm.

¹⁸ Befilisteñ be nga kui ôban e bitisone ya Seféla a Négéb ya Yuda; be nga nyoñe Bétsemék, Agalôn, Gedérôt, Sôkô a minlame mié, Timna a minlame mié, Gimzô a minlame mié a be nga tabe été;

¹⁹ Amu Nti a nga samele Yuda amu Akaz, njô bôte ya Israél, nye ate a nga wua nzametaʼan e Yuda été a dañe liti ékotekote mboon e be Nti.

²⁰ Tiglat-Piléser, njô bôte ya Asiri, a nga zu wosane nye, a bo nye ane nsiñ teke suʼu nye.

²¹ Amu Akaz a nga mane vaa biôm e Nda Nti, e nda njô bôt a nyô bivet, asu ya ve njô bôte ya Asiri mimvean. Ve jame te e nji volô nye jôm.

²² Nté a mbe ôlun été, a nga ke ôsu a bo te ve Nti mewôk, nye, njô bôt Akaz.

²³ A nga tyiʼi bezambe ya Damas be nga bibi nye biôm a a nga jô na: Amu bezambe bejô bôte ya Asiri ba zu volô be, ma ye ve be bityiʼa na be zu fe volô ma! Ve be nga viane bo tine ya nkuane wé a wu Israél ase.

²⁴ Ane Akaz a nga tôkane biôme ya nda Nti a sañe bie bifus. A nga dibe mimbé ya Nda Nti, a nga lôñ émien metaʼa metunaʼa e mevôm mese ya Yérusalém,

²⁵ a a nga telé bito ya bikôndôʼô yôp e tison ése ya Yuda asu ya diʼi bezambe befe beôlobinda. Nalé ate a nga bo Nti, e Zambe bʼésaa bé na a wôʼô ôlun.

²⁶ Mimboone mivok a nga bo, bisaé bié bise, bi yʼatataʼa a bi bia suʼulan, mam mete me ne ntilan e kalate bejô bôte ya Yuda a Israél.

²⁷ Ane Akaz ba bʼésaa be nga bômbô vôme wua, a be nga jame nye e tisone Yérusalém, amu be nji futi nye e mesoñe bejô bôte ya Israél. E mone wé Ezékias a nga jôô éjiane jé.