2 Minkte 25 - Bible en langue Bulu

Amatsia, njô bôte ya Yuda

¹ Amatsia a nga tebe njô bôt a too mimbu mewôm mebaé a mitan, a nga jôô mimbu ébu e Yérusalém. Nyia wé a mbe a too Yérusalém jôé na Yôadan.

² A nga bo mam me ne zôsôô e mise me Nti, ve nleme wé ô mbe nkaban.

³ Eyoñ éjôé é nga bo ngu e mo méé, nde a nga wôé bebo bisaé bé be nga wôé njô bôt ésaa wé.

⁴ Ve a nji ke wôé e bone bap, amu a nga bo ane e ne ntilan e metiñ été, e kalate Môze, vôme Nti a ve abendé di na: Bʼésaa ba ye bo te wu ajô ya bon , a bon ba ye bo te wu ajô bʼésaa, ve môt ase a ye wu ajô ya abé dé.

⁵ Ane Amatsia a nga sulane bôte ya Yuda a telé be ane menda bʼésaa me né, bivete betoyini a bivete mintet asu Yuda ase a Bényamin; a nga bo élañe bôt ataté mimbu mewôm mebaé, a lôte valé, a nga yene mintobane mi bôt toyini mintete mila be too nguleya ke wosan, be yeme belan akoñ a ében.

⁶ A nga nyoñe fe biwôlô mimben toyini ntet, Israél été, a yakaʼane be a mfeʼe wé tañe betalañ be argent ntet.

⁷ Nde môta Zambe éziñ a nga zu jô nye na: A njô bôt, nkane bita yʼIsraél ô boʼo te wulu a wo amu Nti a nji bo be Israél a e be bone bʼEfrayim bana bese.

⁸ Nge mia be be mia ke, toʼo na ô ne éwôlô e mewosan, Zambe a ye fôʼô wo ôsu besiñ, amu Zambe a bili nguleya volô, a bili fe nguleya bo na môt a tôbane njuk.

⁹ Ane Amatsia a nga jô môta Zambe na: Me bo aya mfaʼa betalañ be argent ntet me veya nsamba Israél? Môta Zambe a nga yalane na: Nti a ne nguleya ve wo a dañ abime te.

¹⁰ Eyoñe te Amatsia a nga kandane minsamba mi bôt mi nga so nye Efrayim, na mi bulan e male map. Ve be nga yaa Yuda mbia ñyaan, nde be nga bulane male map be wôʼô mbia ôlun.

¹¹ Ane Amatsia a nga yemete ngule jé a jôô bôt. A nga ke e mbiʼili nku a bôé toyini bôt awôme ya bone be Séyir.

¹² Bone be Yuda be nga nyoñe toyini bôt awôm ya be be, a kee be abôbôn akôme yôp. Nde be nga sôʼôlô be be bete abôbôn akôme wé, nde bese be nga mane fiti.

¹³ Ve da, bôte ya nsamba Amatsia a nga titane na ba be be be bo te ke bita be nga mialan e bitisone ya Yuda, ataté Samari a kui Bétôroñ. Be nga wôé bôt toyini éla a ndamane biôm abui.

Yôas, njô bôte ya Israél a bôé Amatsia

¹⁴ Eyoñ Amatsia a nga bulan a kooé na a maneya dañe bôte ya Edom, ane a nga soo bezambe yʼEdom a nyoñe be ane bezambe bé; a nga kute be meboñe si a diʼi be beôlobinda.

¹⁵ Eyoñe te ayaa Zambe e nga yôñe Amatsia nyô, a a nga lôme nkulu mejô be nye a jô nye na: Amu jé ô nga beta ke nyoñe bezambe ya ayoñe bôte te éyoñ be nji kui na be nyii bôte bap e mo môé?

¹⁶ A ngenan a kobôʼô nde Amatsia a jô nye na: Ye bi nga telé wo ô bo môt a ve njô bôte mefek? Sukuʼu valé! Amu jé wo kômbô na be bôme wo? Nde nkulu mejô a nga mane nkobô a jôʼô na: Ma yeme na Zambe a tyiʼiya na a ye jiane wo, amu wo te bo jame te a amu ô nji kômbô wôʼô melebe mam.

¹⁷ Eyoñ a maneya bo ékôan, Amatsia, njô bôte ya Yuda, a nga lôme bôt be kate Yôas, e mone Yoakaz, e mone Yéhu, njô bôte yʼIsraél na: Zaʼak, bia wo bia ye tômetan!

¹⁸ Eyoñe te Yôas, njô bôte ya Israél nye fe a lôme bôt be kate Amatsia njô bôte ya Yuda na: Ndôé ya Libañ é nga lôme sédre ya Libañ tyiñe na: Vaʼa mone wom ngo jôé a luʼu je! Ve betite ya fé be ne Libañ be nga lôt a mane tibi ndôé.

¹⁹ Ô nga bôé bʼEdomite, nalé wo jô, ajô nleme wôé wo bo mebun a wo ve womiene duma. Eyoñe ji tabeʼe ñhe si jale dôé. Amu jé wo kômbô futi womien e jam da suʼulane wo abé ? Wo ye ku mia Yuda nsamba.

²⁰ Ve Amatsia a nji wôʼô nye, amu jame te e nga so be Zambe, nalé ba ye veban e mo besiñ. Amu be nga ke nyoñe bezambe yʼEdom.

²¹ Ane Yôas, njô bôte yʼIsraél a nga bet; nde be nga tômetan ba Amatsia, njô bôte ya Yuda e Bétsemék ya Yuda.

²² Ane Israél a nga bôme Yuda, a môt ase a nga tup e nda éndelé jé.

²³ Yôas njô bôte ya Israél, a nga bi Amatsia, njô bôte ya Yuda, e mone Yôas, e mone Yoakaz mbôk e Bétsemék. A nga kee nye e Yérusalém, nde a nga sale mfine ya Yérusalém tañe méta mintete mibaé, ataté mbé yʼEfrayim, a kui mbé ya Akot.

²⁴ A nga nyoñe or ase a argent a biôm bise bi nga too e Nda Zambe, e nda Obéd-Edom, a mefoʼo mese ya nda njô bôt; a nga bi fe minkôm a bulane Samari.

²⁵ Amatsia e mone Yôas, njô bôte ya Yuda, a nga nyiñ mimbu awôm a mitan mvus awu Yôas e mone Yoakaz, njô bôte ya Israél.

²⁶ Mimboon mi Amatsia mivok, mi ya atataʼa a mi ya asuʼulan, mi ne ntilan e kalate bejô bôte ya Yuda a Israél.

²⁷ Eyoñ Amatsia a liʼiya Nti, be nga bôndé feʼe ya wôé nye Yérusalém, nde a nga tup a ke Lakis; ve be nga tôñe nye Lakis e vôm be nga wôé nye.

²⁸ Be nga beʼe nye e bikabela yôp a jame nye ba bʼésaa e tisone ya Yuda.