2 Minkte 24 - Bible en langue Bulu

Yôas a ésaé jé

¹ Yôas a nga bili mimbu zamgbwa éyoñ a nga tebe njô bôt, a nga jôô mimbu mewôm menyin e Yérusalém. Nyia wé a mbe jôé na Sibya ya Birséba.

² Yôas a nga bo mam me ne mvaé e mise me Nti nté ôse ntuni Yehôyada a nga vee.

³ Yehôyada a nga luʼu Yôas binga bebaé, ndʼa nga biaé bobefam a bobebinga.

⁴ Eyoñe mam mete me maneya, Yôas a nga tyik e nleme wé été na a beta kôme Nda Nti.

⁵ Nde a nga sulan betuni a Belévit a jô be na: Kelan e bitison bise ya Yuda a tôkane moné Israél ase été asu ya kôme Nda, e Zambe wônan, mbu ane mbu. A boʼon avôle ya bo jame te! Ve Belévit be nji ke avô.

⁶ Ajô te njô bôt a nga loone Yehôyada évete betuni a jô nye na: Amu jé ô nji ke yemete Belévit na be ke Yuda a Yérusalém a nyoñe toya Môze, mbo ésaé Zambe a ékôan Israél ase be nga tyik asu nda éndelé é bili éwolo élat?

⁷ Amu mbia minga ba loon Atalie a bone bé be nga suu na Nda Zambe é mane ndaman, be nga belane fe belane biôme bise ya Nda Nti bi nʼétyi asu Bebaal.

⁸ Ane njô bôt a nga bendé na be bo éwolo a bôôé je atan, mbé ya Nda Nti.

⁹ A kalane foé e Yuda a Yérusalém na ba yiane zu ve Nti e toya Môze, mbo ésaé Zambe, a nga tyiʼi nkôte si na Israél a yiane ve.

¹⁰ Ane bivete bise a bôte bese be nga vak, be nga zu ve moné a futi nye éwolo a kui vôme ya jalé je.

¹¹ Eyoñ éyoñ Belévit ba yiane liti njô bôt éwolo te é nga kpwaan, a éyoñ be nga yene na moné a ntoo abui, ñyeme bekalate njô bôt a mbaʼale akume ntuni nnen be nga zu, be mane vaa moné éwolo a zuu nye asu ya futi nye e vôm a yian. Be nga bo nalé môs ôse, a be nga toʼé moné abui.

¹² Ane njô bôt a Yehôyada be nga kee nye môt a wulu bisaé asu melôñ ya Nda Nti, be nga yaʼane beba mekok a bebo bisaé ba kôme nda Nti, a bebo bisaé ba saé étyé a mvot asu nkômane Nda Nti.

¹³ Ba be mbe na ba bo bisaé be nga taté na ba saé, a ésaé é nga ke ôsu e mo map. Be nga bulane be Nda Zambe aval é mbe, a be nga yemete je.

¹⁴ Eyoñ be nga man, be nga zuu mebukaʼa me moné ôsu be njô bôt a Yehôyada, a be nga kôme biôm a mebukaʼa mete asu Nda Nti: Biôm asu ésaé ya Nda Zambe a mimvean ba diʼi ngumba, bisua a biôm bi ne or a argent. Be nga taté na ba ve mimvean mia diʼibane ngumba te jôʼé, nté ôse Yehôyada a nga vee.

¹⁵ Ane Yehôyada a nga yômbô, njalan a melu, asuʼulan a nga wu; a mbe mimbu ntet a mewôm mela éyoñ a nga wu.

¹⁶ Be nga jame nye tisone David, ba be bejô bôt, amu a nga bo mbamba be mam Israél a mfaʼa Zambe a Nda jé.

¹⁷ Eyoñe Yehôyada a wuya, bivete ya Yuda bi nga zu kute meboñe si ôsu be njô bôt, nye ki ve tabe, a wôʼô be.

¹⁸ Ane be nga liʼi Nda Nti, Zambe bʼésaa bap, a be nga kañe mekôn mʼazezambe a bengunemelan. Ajô te ayaa Zambe e nga biban e Yuda a Yérusalém amu aval ékobe te.

¹⁹ A nga lôme bekulu mejô be be asu ya bulane be be Nti a melebe map, ve be nji kee melo wé.

²⁰ Ane Nsisime Zambe ô nga bi ntuni Zekaria e mone Yehôyada, nye ve tebe bôt e ngame yat a jô be na: Avale di nde Zambe a kobô na: Amu jé mia mia tyame miñyeʼelan mi Nti? E mame menan ma ye bo te ke ôsu. Amu mi liʼiya Nti, Nye fe a liʼiya mia.

²¹ Nde be nga jañele nye a lume nye mekok , avale njô bôt a nga bendé be, e nseñe ya Nda Nti.

²² Njô bôte Yôas a nji fe simesan abime mvam Yehôyada ésaa Zekaria a nga bo nye, ve a nga wôé mone wé. Eyoñ a nga zu wu, Zekaria a nga jô na: Nti a yenek e jam da mane boban a Emien a siliʼi wo sitoʼo yʼété.

²³ Mbu ô nga tôñe valé, nde nkane bita Besirieñ ô nga zu wosane Yôas. Be nga dili si Yuda bita a tisone Yérusalém, be nga mane wôé bivete bise ya ayoñ a lôme biôm be nga sa e be njô bôte ya Damas.

²⁴ Nkane bita Besirieñ ô nga so ô bili ve bôte tyôtyoé, ve Nti a nga ve nkane bita ô nʼabui e mo mé, amu be nga liʼi Nti, Zambe bʼésaa bap. Mfaʼa Yôas, nkane bita Besirieñ ô nga ve nye melep ,

²⁵ a éyoñ be nga bulan, be nga liʼi nye beta nkôkon. Bebo bisaé bé be nga bôndé feʼe ya wôé nye amu metyi me bone be ntuni Yehôyada, nde be nga wôé nye énoñe jé yôp. Eyoñ a wuya, be nga jame nye e tisone David, ve sa ki e mesoñ bejô bôt.

²⁶ E bôt be nga bôndé feʼe ya wôé nye mbe ba: Zabad e mone Siméat, mone Amonit, a Yehôzabad, e mone Simrit, mone Môabit.

²⁷ E bone bé, anene ya mimbeʼe mié, nkômane nda Zambe, ye mam mete me nji bo ntilan e kalate mfasane mame ya kalate bejô bôt? Ane Amatsia mone wé a nga jôô éjiane jé.