2 Minkte 23 - Bible en langue Bulu

Ba telé Yôas njô bôt

¹ Mbu zamgbwale, Yehôyada a nga tyiʼi na a nyoñe bivete mintet: Azariahu e mone Yeroham, Yismaél e mone Yéhôhanan, Azariahu e mone Obéd, Maséyahu e mone Adayahu, Elisafat e mone Zikri na be bo élat a nye.

² Ane be nga wulu e Yuda a sulane Belévit ya bitisone bise e Yuda a bivete meyoñ ya Israél, nde be nga bulan e Yérusalém.

³ Ane ékôane bôt ése é nga bo élat a njô bôt e Nda Zambe été. Yehôyada a nga jô be na: E mone njô bôt nye nyô. A yiane jôô avalʼane Nti a nga jô ajô bone be David.

⁴ Mia ye bo avale di: Ngabe lale ya be mia, betuni a Belévit mia bo ésaé môse Sabat, e menyiin, mia ye bo bebaʼale mimbé,

⁵ ngabe lale fok ja ye tabe e nda njô bôt a nyô fok e mbé ya mbôkaʼa; bôte bese ba ye tabe e minseñe ya Nda Nti.

⁶ Môt éziñ a boʼo te nyiin e Nda Nti, veñgeveñge ve betuni a Belévit ba bo ésaé môs ôte: mbe be ne nguleya nyiin amu be ne ntelane ya bo ésaé. E bôte bese ba ye bo nsamba bebaʼale Nti.

⁷ Belévit ba ye bômane njô bôt njiñelete, môt ase a bili mengale mo; môt ase a ye kômbô nyiin e Nda Nti ba ye wôé nye; mia be njô bôt boʼone nsamba e vôm ase a ke.

⁸ Ane Belévit a Yuda ase be nga bo avale ntuni Yehoyada a nga jô. Be nga nyoñ, môt ase, e bôte bé, ba be nga yiane nyiin ésaé môse Sabat a ba be nga kôlô ésaé, amu ntuni Yehôyada a nji ke suu minsamba mi mbe ésaé.

⁹ A nga ve bivete mintet mekoñ a mevale biben bi njô bôt David bi nga too e nda Zambe.

¹⁰ A nga telé bôte bese, môt ase a bili akoñe dé mo, ataté akuʼu nda ya mbo nnôm a kui akuʼu ya mbo nga, bebé ataʼa metunaʼa ya Nda Zambe, asu ya bômane njô bôt.

¹¹ Nde be nga kuli e mone njô bôt atan, be jalé nye kuron a mendem me njô bôt: ane be nga telé nye njô bôt. Yehôyada a bone bé be nga woʼo nye mbon a yôtane na: Enyiñe njô bôt é boʼo ayap!

¹² Eyoñ Atali a nga wôʼô zôʼé bôt be nga mate mimbi a nyoñe njô bôt a mevak, ane a nga ke mfaʼa bôt be mbe e Nda Nti.

¹³ Nde a nga fombô a yene na njô bôt a tele e vôme wé a yiane tebe yôp anyiine ya Nda; bivet a beloñe metoñ be tele e fefele njô bôt; bôte bese be mbe mevaʼa été, metoñ me kobôʼô; beyeme mezik be bômôk biôme biap, be wuluʼu fe mam mese ya mevak. Nde Atali a nga nyabe mengômesane mé a yône na: Njoñ! njoñ!

¹⁴ Ane ntuni Yehôyada a nga kuli bivete mintet atan mbie bi nga jôô nkane bita a jô bie na: Kelane nye atan, atane ya nkaʼalé! Môt ase a ye tôñe nye a ye wu a nkpwaté mekôn! Amu ntuni a nga jô na: Mia ye bo te wôé nye e Nda Nti.

¹⁵ Ane be nga bi Atali, a kee nye mfaʼa ya nda njô bôt, éyoñ a nga kui mbé bikabela, be nga wôé nye valé.

¹⁶ Ane Yehôyada a nga bo élat e zañe jé émien, bôte bese a njô bôt, asu ya na be bo ayoñe bôte Nti.

¹⁷ Ane bôte bese be nga ke e nda baal, be mane tyame je, be mane buʼu metaʼa metunaʼa a biveʼelaʼa bié a wôé fe Matan, ntuni baal, ôsu metaʼa metunaʼa.

¹⁸ Yehôyada a nga kalane mbaʼalane ya Nda Nti e mo betuni a Belévit. David a nga kabe be minsamba e Nda Nti asu ya ve Nti mimvean mia diʼibane ngumba, avale e ne ntilane kalate metiñ me Môze, e mevaʼa été a e bia été, avale David a nga yeʼele.

¹⁹ A nga telé bebaʼale mimbé ya Nda Nti, nalé jôm é ne te mfuban ja ye bo te nyiin a zen éziñ.

²⁰ Ane Yehôyada a nga nyoñe bivete mintet, benya bôtô, e ba be nga bili éjôé be bôt, a bôte bese; a nga bo na njô bôt a sis a kôlô Nda Nti, be nga tyii mbé ya yôp a nyiin e nda njô bôt, nde be nga tooé njô bôt éto njôane yôp.

²¹ Bôte bese be nga vak a tison é mbe ne mieññ. Ve be nga wôé Atali a nkpwaté mekôn.