2 Minkte 22 - Bible en langue Bulu

Akazia, njô bôte ya Yuda

¹ Ane bôte ya Yérusalém be nga bo na Akazia, e mone wé a nga dañe mongô a jôô éjiane jé; amu nsamba bôt ô nga zu minkan ba Bearabe be nga wôé mintôle mise. Nalé ate Akazia, e mone Yôram, njô bôte ya Yuda a nga jôô.

² Akazia a nga bili mimbu mewôm menyin a mibaé éyoñ a nga tebe njô bôt; a nga jôô mbu wua e Yérusalém. Nyia a mbe jôé na Atali ngone Omri.

³ Nye fe a nga wulu e mezene ya nda Akab, amu nyia a mbe a vaʼa nye melep asu ya bo abé .

⁴ A nga bo mam me ne abé e mise me Nti, avalʼane nda Akab, vôm ate a nga nyoñe bevee melep , asu njañane wé, éyoñ ésaa a wuya.

⁵ A nga kañese wulu melebe mab été na ba Yôram e mone Akab, njô bôte ya Israél be ke wosane Azaél, njô bôte ya Siri e Ramôt ya Galad, nde Besirieñ be nga balé Yôram meveñ.

⁶ Ajô te a nga bulane na a ke saébane meveñ Besirieñ be nga balé nye Rama, e Yizrél éyoñ a nga wosane Azaél, njô bôte ya Siri. Azariahu, e mone Yôram njô bôte ya Yuda a nga siliki na a ke jome Yôram mon Akab e Yizrél, amu a mbe a konôk étua abui.

⁷ Amu nkômbane Zambe a amu njañan wé, nde Akazia a nga ke be Yôram. Eyoñ a nga suan, a nga kui atan ba Yôram na be ke tôbane Yéhu, e mone Nimsi, nyô Nti a nga woʼo mbone na a jiane nda Akab.

⁸ Mbôlô Yéhu ba nda Akab be mbe metyamaʼan, nde a nga koone bivete ya Yuda a bone be bobenyañ bʼAkazia, ve wôé be.

⁹ A nga jeñ Akazia, nde be nga bi nye Samari vôm a nga ke sobô. Be nga zuu nye be Yéhu a wôé nye. Nde be nga jame nye, amu be mbe be jôʼô na: E mone Yôzafat, nyô a nga jeñe Nti a nleme wé ôse, nye le. Môt éziñ a nji liʼi e nda Akazia a too nguleya jôô.

Atali, njô bôte minga ya Yuda

¹⁰ Eyoñ Atali, nyia Akazia, a yeneya na mon a wuya, a nga kôlô si a jiane mvoñe bôt ése é nga yiane nyoñ éjôé e Yuda.

¹¹ Ve Yehôsavat, ngone njô bôt, a nga nyoñe Yôas, e mone Akazia a vaa nye ézezañe bone be njô bôt be nga yiane wu a futi nye ba minga a baʼale nye, étune nda binoñ. Nalé ate Yehôsavat, ngone njô bôte Yôram, nga ntuni Yehôyada, a mbe kale Akazia, a nga solé nye e mise me Atali, ane a nga bo teke wôé nye.

¹² A nga tabe mimbu misaman a solô, ba be be e Nda Zambe été. Nté te ôse Atalie ki a jôʼô.